《台灣個表妹嚟咗我屋企住》【完】: (七十六)三輪車

唔講唔知，三輪車真係好鬼難踩，成日踩踩下會傾咗去右面，用咗好多力氣同心血先學得識駕馭咋。

每次差唔多炒車嗰陣，小南都會鬧下我。

「你踩好啲啦！」

「嗯⋯⋯」

「你想謀殺我咩？」



「都幾想㗎。」

「炒啦！炒啦！」

「邊有呀？」

真心想同佢講一句⋯⋯

咁叻，你踩呀！



言而，我哋並唔係漫無目的咁周圍去，小南喺單車鋪嘅時候問過老闆去邊度好，而個老闆就教咗佢去呢個張保仔洞。

所以我哋其實係向坐呢個目的地出發，沿住海邊一直行，清爽嘅海風拍打我嘅臉龐，喺路上又可以欣賞下迷人嘅海景，呢種感受都唔錯。

終於踩到去張保仔洞嘅附近，要過去必須徒步上山，因此只好放低架單車。同小南行一邊路仔。

可能小南本身對呢樣嘢有興趣，故此要佢去行山都冇大吵大鬧。

小南可以飲住支水行，補充返啲失去咗水份，相反我就冇啦，只有不斷咁流汗。



直到我啲汗流到咁上下，而小南支水都飲到剩返一半，就有一條長長嘅人龍呈現係我哋眼前。

啲人真係好多，我諗咁樣等法，天黑都未到我哋。

「表妹，好多人喎⋯⋯」我話。

「唔緊要啦，一場嚟到唔通走咩？」小南話。

「吓⋯⋯乜你好想睇下咩？」我問。

「梗係啦！山長水遠嚟到喎，表哥⋯⋯你唔係想走啩？」小南意味深長咁望住我。

我深知如果呢一刻離開，實會畀小南用佢嗰支得返一半水嘅水樽扑爆我個頭，雖然冇咩耐性嘅我好想走，但係喺小南嘅武力威逼下我亦只能乖乖就範。

「唔⋯唔係，點⋯點會呢？」我結結巴巴咁講。



「咁我哋就等下啦，嘻嘻⋯⋯」原本一面認真嘅小南甜絲絲咁笑起上嚟。