《台灣個表妹嚟咗我屋企住》【完】: (七十七)張保仔洞

等呀⋯⋯等呀⋯⋯等呀⋯⋯

結果喺條長過萬里長城嘅人龍等下郁下，先接近到入口位置，而前面嘅情況，我都唔係咁清楚，只見間唔中會有啲人走返出嚟。

其實我都係第一次去張保仔洞⋯⋯唔知入面係點嘅呢？

喺太陽落山之前，我同小南總算係去到入口。

但所謂嘅入口，就係一個向下嘅窿，而且呢個窿係好黑好黑。





正正係刺中小南怕黑嘅弱點喎⋯⋯

「呢度⋯落去？」預先仲好期待嘅表妹即時縮沙。

「應該係呀。」

「吓⋯⋯」

我見到旁邊有個阿叔喺度買電筒，我諗落得去邊都要用電筒啦啩？如果唔係點睇路。





「表哥⋯我怕黑喎⋯⋯」

「又係你自己話嚟嘅。」

「咁人哋唔知呢度咁黑呀嘛！」

若然係上次喺黑暗中體驗館咁，我都可以拖住小南隻手行，等佢冇咁驚，但係今次條路咁窄，應該就冇呢個機會啦。

不過佢都唔使驚！我部電話都有電筒功能。





「一係咁，表哥行先你跟住我，我用電話照住前面條路等你冇咁驚啦，好冇？」

「嗱！我信你㗎喇！」

「放心啦。」

跟住，我哋就開始一步一步咁向住呢個神秘嘅洞穴探險。

好黑⋯⋯張保仔洞入面真係好黑同好陰森，如果冇電筒肯定會伸手不見五指。

開頭有啲梯級，我同表妹慢慢咁行落去後，就係一條頗為簡單嘅路。

我就拎起電話照住條路，小心翼翼咁樣行。

跟住我尾嘅小南一直用力咁扯住我衫尾，為咗令我件衫唔好咁快報銷，我就講下嘢等小南放鬆下。





「喂⋯⋯表妹。」

「嗯？」

「我想問呢⋯⋯點解你想嚟嘅？」

「你問⋯⋯點解我想嚟？」小南對於我呢個問題思考咗一陣，然後反問返我：「表哥，你有冇聽過鄭芝龍呢個人呀？」

鄭芝龍？冇記錯好似係一個歷史人物。

「好熟，但唔記得啦。」我回答。

「因為我之前睇過一本書⋯入面就有講過呢個人物，佢係一個好出名嘅海盜嚟㗎！」小南話。





「咁⋯關張保仔咩事？」

「咁兩個都係海盜呀嘛，我純粹想嚟睇下海盜嘅基地係點咋。」

「但係表妹⋯⋯」

「嗯？但係咩？」

「呢個係張保仔嘅藏寶地點，而唔係佢嘅基地喎⋯⋯」

「係呀⋯⋯」

聽完我咁講，感覺到喺我身後嘅小南柒到唔敢再出聲，好靜咁跟我行。

到咗中間嘅路，都有啲崎嶇難行，而且去到某一個位置更要烏低身行，好麻煩的，興幸小南冇好似之後喊驚咁嘈住哂，只係有時講我一兩句咁。





行到咁上下，小南就問我：「表哥到未呀？」

我冷冷咁拋下一句：「我點知啫？」

佢再問：「點解啲路好似越嚟越窄咁嘅？」

窄？畀小南咁講一講，我先發覺條路真係幾窄，明明開頭好闊㗎喎。

「吓⋯⋯係喎⋯⋯」

「嗱！我冇講錯啦？」

「嗯，我知啦！一定係你肥得滯！」





「你話咩話？」說罷，小南就柔柔咁拍打我嘅背脊。「你再話我肥，我唔客氣㗎！」

「得啦得啦，唔話你肥啦，肥妹！」我帶啲挑釁性咁講。

「你仲講！」小南輕輕拍我。

我見路係越窄，但係前方嘅位置開始泛起光芒，我部電話嘅照明功能都隨之而冇用。

咁即係代表到咗出口⋯⋯

「到咗啦！表妹，我哋可以離開張保仔嘅基地喇！」我故作興奮，實質係曲線恥笑小南嘅誤解。

「哼⋯⋯」

向住前方嘅光走，上返奇特嘅梯級，終於離開咗呢個鬼地方，成功地征服咗張保仔洞。

再次呼吸返屬於自由嘅空氣，大自然嘅氣息最吸引我，始終被困住嘅感覺唔好受。

小南見我好似有啲呆滯咁，就喺我面前揮揮手。

「喂喂！星星表哥！」

「吓⋯」

「做咩呆咗呀你？」

「邊有喎？冇呀⋯⋯」

「冇？咁依家去邊度呀？」

去邊度⋯⋯好問題！

我望望手錶，見到距離還車仲有一段時間，就決定帶住表妹踩住架三輪車好好喺鬧市中奔馳一番。

再順便去買我鍾意食嘅紅豆餅先！