《台灣個表妹嚟咗我屋企住》【完】: (七十八)懵懵豬

而漸漸地對於架三輪車，我已經駕輕就熟。

我喺人群中以三輪車直路狂奔，只係一見到有警察嘅時候就要叫小南落一落車⋯⋯

去到嗰間不太起眼嘅鋪頭，買咗兩個紅豆餅後，我就同小南一人一個一齊食。

咬落去⋯⋯啖啖嘅紅豆味，真心好正呀！

可惜個餅太細塊，所以我同小南都好快食哂。





有架三輪車喺度，真係覺得阻住哂，去邊都要拎埋佢，好唔方便。

反正時候都唔早，眼見黃昏將至，都係返去還埋車先啦。

於是我就同小南講返去還車，佢就繼續做乘客，我就繼續做出賣勞力嘅司機。

越踩就越攰，望到一面輕鬆嘅小南，真係好想畀佢試試呢一種滋味。

畀佢踩下先都好喎⋯⋯





跟住我就向小南提議話：「表妹呀，不如我哋交換位置好冇呀？」

「吓⋯⋯唔好啦。」

「嚟啦，你頭先先話好易踩。」

「吓⋯⋯」

一開始拒絕嘅表妹喺我不停要求之下交換咗位置，就咁坐上咗踩嘅位，好緊張咁捉住兩邊把手。





見佢手忙腳亂咁樣，踩兩踩又停一停低，成架車仲要向哂右傾，要不斷地花好多氣力先可以向前行。

「表哥⋯⋯救命呀！」一半路程都未到，小南就叫苦連天。

「哈哈⋯⋯你終於知我辛苦啦咩？」呢一刻，我就翹埋雙手坐喺座位上。

「知啦知啦，畀返你啦。」

「唔得喎！繼續啦！」

「可惡呀⋯⋯」小南擰轉面，非常不忿咁望一望我，然後繼續向目的地前進。

遇上咗一條向下嘅斜路，唔知道小南係有心定無意，可能佢真係仲未控制到架三輪車，以極速飛奔向前，作為乘客嘅我都有一瞬間感到生命受到威脅，最後佢收制唔切，撞爛咗一個阿婆嘅鹹魚檔攤。

而個檔攤上，用一堆大發泡膠盒擺放嘅鹹魚就瞬間撞到飛滿一地。





「嗯！」小南心知賴嘢，立即落車幫阿婆執返啲鹹魚。

我見狀，就算唔係我經手，出於對阿婆嘅憐憫之心我都落車幫手。

「對唔住呀⋯⋯唔好意思呀⋯⋯」

萬分歉意嘅小南就不停咁重複依句說話。

個阿婆都一面無奈，唔知畀咩反應好，冇話責罵我哋，只係我隱約聽到佢講咗句：「我啲鹹魚都賣唔出㗎啦⋯⋯仲要咁對我⋯⋯」

執返哂佢啲魚之後，我哋再次道歉，然後匆匆咁離開，離開呢個尷尬之地。

接住嘅路，司機呢個崗位梗係由我呢個表哥做返啦，費事一陣小南又懵下懵下橫沖直撞咁撞親人。





返到去單車鋪還完車之後，我同小南就喺長洲慢步多陣。

原先諗住趁入夜之前離開呢度，返屋企食住家飯，但係意猶未盡嘅表妹就打斷咗我呢個計劃。

小南一邊攬住我嘅手臂，一邊好嬌氣嘅同我講：「星星表哥⋯⋯我想去嗰邊個沙灘行下呀⋯⋯」

「你講笑咋？你想去沙灘行下？」

「嗯！」

頂！咁似上一代人嗰啲電視劇嘅拍拖情節嘅？

係就係好老套，但我都喺半推半就嘅情況下，同小南行咗去沙灘。