《台灣個表妹嚟咗我屋企住》【完】: (八十四)愛意

「小南⋯⋯做咩喊呀？傻妹⋯⋯」我將小南攬得更緊。「我仲生勾勾喺度呀！」

「嗚嗚⋯⋯」而小南仍然喊到收唔到聲，甚至惹嚟路人嘅注視。

「唔好喊啦，我心痛㗎。」最驚係女仔喊嘅時候，我又唔知做咩好。

「嗚⋯⋯」小南喊到成個身有少少震。

點先唔好再喊呀？人人都望住我同你，好似我非禮緊你咁呀⋯⋯





「嗱！再喊就以後唔帶你出街㗎啦！」我溫柔中帶點霸道咁講。

小南聽到之後，果然冇再喊，但仍然耷住個頭。

「其實⋯⋯」佢平復咗心情後，先至開聲話：「我一直都好驚㗎，好驚你會知道呢個秘密⋯⋯好驚我會鍾意你⋯⋯好驚你又會鍾意我，但係如果我哋真係一齊，又唔知你會有啲咩意外，把聲真係好真㗎！我唔知點做呀⋯⋯」

面對別人軟弱嘅一面，最好就係陪住佢，留喺佢身邊。

「我信你喇！唔理把聲同你講啲咩嘢都好，唔好理乜咪得囉，使乜理佢講乜啫？既然我哋命中注定要喺埋一齊，冇嘢可以阻擋得到。」我好堅定不移咁話。「就算要死，我都會咁鍾意你！」





「星星表哥⋯⋯嗚⋯⋯」小南呢個喊包又嚟料啦。「我都⋯⋯好鍾意⋯⋯你㗎⋯⋯」

我鬆開雙手，走到佢面前。

「傻妹⋯⋯唔好喊啦。」我伸手為佢抹走眼淚。

「咁眼淺㗎你⋯⋯再喊就唔靚㗎啦。」我輕輕吻一吻佢嘅額頭。

「咁你唔可以拋低我㗎啦⋯⋯」小南緋紅嘅臉頰，害羞得好可愛，而臉上未乾嘅淚痕，就顯得楚楚可憐。





「絕對唔會！我一定會養到你肥肥白白，一齊睇住我哋啲仔女出世，跟住⋯⋯」

「喂呀！好骨痹呀！」小南終於笑返，笑住咁阻住我講我嘅鴻圖大計。

「咁你係咪即係應承咗㗎啦？」我同樣笑住咁問。

「嗯⋯⋯係呀！傻瓜！」

親口聽到小南咁講，今次輪到我想喊添⋯⋯

發夢都冇諗過，從第一眼見到小南開始，都會有一日有機會可以擁有得到佢，擁有呢個我好鍾意嘅女仔。

原來鍾意一個人，唔使好耐嘅時間，有時候從第一眼其實已經確認咗彼此之間嘅緣份。

就係咁，台灣個表妹成為咗我嘅女朋友。





「喂⋯⋯傻係得我可以用嚟話你㗎咋！」我摸一摸小南嘅頭，然後話：「傻傻地嘅豬！」

「你話咩話？你先係豬呀！」小南又對我使用扭耳仔攻擊。

「呀！！！痛⋯痛呀！」我就以生命值硬接。

中咗佢一招後，搞到我生命值得返一滴，要立即使用回血技能，就係偷偷地再錫佢一下。

「哎呀，你又⋯⋯」我回完血後，小南塊面就立即紅晒。

「咁返去啦！」

「嗯⋯⋯」





喺返屋企嘅路上，我主動咁拖住小南隻手，十指緊扣咁喺黑空下漫步。

呢種戀愛嘅感覺好耐都冇試過⋯⋯

睇嚟我哋嘅甜蜜與溫馨就此開始，一對表兄妹正式成為一對小戀人，愛意正在漫天飛舞。