《台灣個表妹嚟咗我屋企住》【完】: (八十五)幸福嘅開始

白痴表妹同傻瓜表哥一齊後，就開始咗佢哋甜蜜嘅同居生活。

而我呢個傻瓜，仲未諗好應該點話畀阿爸知⋯⋯

話佢知個細仔有拖拍啦，但係對方係佢嘅姪女，如此特別嘅關係。阿爸會接受到嗎？所以我諗多諗，就同小南約定好唔公開住，見步行步啦。

返到屋企，阿爸已經入咗房瞓覺，於是我就等小南沖埋涼嘅時候睇陣電視，然後就輪到我沖涼。

一路沖身，一路思考緊人生，呢個係我每次沖涼嘅必經階段，與世隔絕嘅同時可以畀個腦袋運轉下，轉一轉，我先相信今日所發生嘅事唔係幻覺亦唔係發緊夢。



正當我準備上床瞓嗰陣，就喺房門望見小南企喺度，一身嘅裝束已換上Hello Kitty睡衣。

「做咩呀小南？」我用條毛巾抹住頭行過去。

「表哥⋯⋯你瞓嗱？」小南睇落好似有啲事情猶豫不決。

「係呀，做咩呀？」我繼續問。

「咁今晚⋯喺你度瞓定我度瞓？」小南含羞答答咁望住我。



我一時冇認真諗過呢條問題嘅含意，而衝口而出話：「梗係喺我間房瞓啦！」

因為咁，小南就跟埋我入房⋯⋯

我望住佢，佢又呆呆咁望住我，雙目交接咗好耐⋯⋯

我就問：「咩事呀？」

「你話喺你度瞓嘅。」小南回答。



「吓⋯⋯」

我仍未反應過嚟，小南就熄埋燈，緊閉雙眼咁推咗我落張床上面。

「快啲瞓啦！」

眨吓眼，我又同小南瞓喺同一張床上，但有別於長洲嗰次，今次我哋係面對面咁瞓。

喺呢一刻，眼前嘅女仔係我深愛嘅女朋友，叫做程小南，而唔係表妹。

「表哥呀⋯你做咩係咁望住人喎⋯⋯」小南塊面又紅啦，佢真係好容易就面紅。

「唔望你望邊嗰喎？」喺一個漆黑嘅環境，我突然心血來潮又想調戲下佢。「咦⋯等等！你後面好似有啲嘢喎⋯⋯」

我扮到疑幻似真，小南亦因此上當。



「咩⋯咩嘢呀？」

「好似係⋯有我嘅愛包圍住你。」

「哼⋯無聊！」

小南說罷就擰轉咗身瞓，故意背向住我，而我就當然上前攬住佢。

「你嬲我呀？」我喺佢耳邊輕聲細語。

「做咩攬住人喎⋯⋯」小南摸住我隻有不軌企圖嘅手。

「我驚你夢遊呀嘛！」我話。



「夢遊⋯你點知我會夢遊㗎？」小南好驚訝咁問。

「因為⋯你有一次試過夢遊，遊遊下入咗嚟我間房。」我好坦白咁講，作為男朋友，我唔希望有任何嘢呃住小南。

「衰人表哥！原來嗰次你知嘅！咁蠱惑㗎你！」小南迅速轉返身，一個又一個粉拳打落我心口。

「仲叫我表哥？你唔記得我係邊個啦咩？」我開玩笑咁話。

「死人黃家星！」小南今次動真格，揮出幾個重拳直擊我心口。

「呀⋯⋯」硬食咗幾拳嘅我就差啲吐血身亡。

「打死你呀！」

我溫柔咁捉住佢雙手，靠近佢嘅臉頰，見到佢可愛嘅嘴唇，又想錫落去⋯⋯



「真係打死我？冇人會咁錫你㗎喎⋯⋯」我話。

「使乜你錫我呀？成日都恰我，又攞埋我嘅初吻⋯⋯」小南扁起嘴話。

原來嗰日輕輕一吻，對小南嚟講咁有意義。

「你都有恰我啦。」

「我邊有呀？」說罷，又一拳落喺我心口。

雖然依家同小南互相調戲，幸福無比，但我有預感，將來如果結埋婚，我一定係長期畀小南食住，甚至變埋老婆奴。

咦⋯我係咪諗得太遙遠呢？