《台灣個表妹嚟咗我屋企住》【完】: (九十四)支牙刷冇啦

而嗰晚，小南就忍唔住喺屋企嘔咗出嚟，搞到成地下都勁污糟，我要拖乾淨塊地，又要參考阿yo說法，放佢喺床再整條暖毛巾敷喺佢額頭上，望住本來幾辛苦嘅佢慢慢冇咩事，我先至安心落嚟。

就等呢個傻妹瞓下啦⋯⋯

繼續補課，但個心就飛咗去小南度，好想知佢醉咗之後好返啲未。

返去屋企第一時間睇下小南點，點知佢安然無恙咁喺梳化上睇緊電視。

不過我問返佢尋日嘅事，佢就好似斷咗片咁咩都唔記得哂。





咁嗰句鍾意我所有嘢到底係咩意思呀，雖然我好想知道，但見小南咩都記唔起，就由佢成為一個不解之謎啦。

反正答案如何，我同小南依然相戀。

之後又繼續食住家飯，睇下電視又一日⋯⋯

臨上床瞓前，我又寫下日記。

「唉呀！」





突然之間，喺廁所傳出咗叫聲⋯⋯

為咗去調查下發生咩事，我九秒九衝咗過去廁所嗰邊。

點知一睇⋯⋯

見到小南憂傷咁望住個屎坑，唔知做乜嘢。

「咩事呀小南？」我問。





「嗚⋯⋯表哥，Hello Kitty跌咗落廁所呀！」:~(

「吓？」本來不明所意嘅我行近過去再仔細一睇。「哦⋯⋯牙刷啫。」

幾驚以為係講緊我送畀佢嗰隻Hello Kitty。

「咩嘢牙刷啫呀？佢對我嚟講好有感情㗎！我細細個開始就用佢嚟刷牙㗎喇！諗住帶埋佢嚟香港用，點知就客死異鄉⋯⋯點算呀⋯⋯」失去咗寶貴嘅物件，小南成個人都變得沒精打采。

「有咩點算喎，你咁唔捨得，執返起嚟用咪得囉。」我話。

「你又講得啱喎⋯⋯」聽完我咁講，小南真係伸手入屎坑想攞返支牙刷。

「喂喂⋯⋯」我立即制止咗佢。「污糟㗎喇，傻㗎咩你？」

「唔咁做可以點算喎⋯⋯」小南耷低頭話。





「咁幫佢火化囉⋯⋯」我提議話。

「火化？咩火化呀？」小南問。

「啫係沖廁呀。」

如是者，小南就聽我講沖咗廁，親手送別一支陪伴多年嘅牙刷，心情難免係好沉重。

「表哥呀⋯⋯牙刷佢會去邊㗎？」小南傻傻咁問我。

沖得落廁所，梗係會去咗大海。

不過我就好白痴咁答返佢⋯⋯





「牙擦會去到一個好遠好遠嘅地方⋯⋯」

講完連我自己都想笑，搞到好似死咗人咁款。

小南似乎都有啲明白，點下頭咁。

雖然我講完都唔明自己噏乜。