《台灣個表妹嚟咗我屋企住》【完】: (九十五)等我幫你

「咁依家點算好呀？我仲未刷牙喎⋯⋯」小南問。

我望一望洗手盆，又望下屎坑，不禁驚嘆小南居然有能力將支牙刷飛到九丈咁遠。

再望多望⋯⋯

我就大膽提議：「用我嗰支刷囉⋯⋯」

「吓⋯⋯你講真㗎？用你嗰支會唔會冇咁好呀？我用開自己嗰支㗎嘛⋯⋯」小南似乎有啲憂慮。





「唔使驚喎，我嗰支冇跌過落屎坑㗎。」

「咁呀⋯⋯」小南猶豫咗一陣，令我萌生咗個想法⋯⋯

「一係我幫你刷囉。」我話。

「使咩你幫我喎⋯⋯」

「試下啦。」





「唔制呀。」

結果唔知點解奇奇怪怪咁，我真係拎住牙刷係小南嘅口腔內柔柔咁刷，有時刷到佢痛，就會受到佢嘅攻擊，跟住我落啲牙膏再刷，又幫佢拎水杯漱口。

好似照顧緊個小朋友咁。

成件事係都做完先覺得又奇怪，又無聊⋯⋯

但係感覺又係好甜蜜，好溫馨⋯⋯