經過咗一次咁驚心動魄嘅經歷,我仲諗緊點同小南相處,點知佢話咁快就丟淡咗件事,同我繼續嘻嘻哈哈咁打鬧,繼續食佢煮嘅飯,繼續幫佢刷牙。

咁又係嘅⋯嗰啲事情,男女朋友之間都會做嘅⋯⋯

喂!黃家星!你諗咗啲乜嘢呀?你咁淫邪嘅?

第二朝去到學校補課,我周不時都要拍一拍自己控制啲邪念。

唉呀⋯我仲係對嗰件事耿耿於懷。





補完課之後,Miss Li呢位訓導主任就喺班上宣布下個禮拜唔使再補課,因為臨近開學,佢都要開始著手於開學前後繁重嘅工作。

都啱嘅⋯仲有兩個禮拜多啲就開學,亦係我再次變成中六學生嘅時候。

不過依家有咗小南,擁有咗佢嘅意義相比起為咗阿爸而入大學就大得多了。

以前為咗人哋嘅期望而付出,如今係為咗小南呢個女仔,一個同我心意相通嘅人,為咗佢做嘅事,一切都值得。

就算我一無所有,只要有小南留喺我身邊就足夠。





但係搵方法養得起佢都係一個問題。

始終呢個世界冇童話⋯⋯