直去到第二日,我補完課就馬上飛去超級市場買返支牙刷畀小南。

當然係有小南最鍾意嘅Hello Kitty公仔圖案喺上面啦。

唔知拎返去畀小南,佢會有啲咩反應呢?我好想佢解鎖多啲權利畀我呀!

我興高采烈咁行返屋企,一打開門,客廳入面唔見佢。

行入阿哥間房又唔見佢,唔通⋯⋯





我推開自己嘅房門,然後大嗌:「犯人快啲舉高雙手!」

冇估錯,小南果然係安坐喺電腦凳上,笑嘻嘻咁喺我間房入面用緊部電腦。

「表哥你返嚟喇?」小南笑容滿面咁講。

「係呀。」我放低個書包,然後行近小南身邊想睇下佢做緊咩。「上緊咩網呀你?」

「唔係上網呀,我想學英文咋。」





學英文?

正當我有一絲懷疑小南嘅說話時,就留意到枱面上有一盒打開咗嘅CD盒,而𥚃頭嘅CD早就逃之夭夭。

細看之下,係寫日文嘅CD盒?

大獲啦!!!

「隻碟呢小南?去咗邊呀?」我好緊張咁問,好驚畀小南破解得到當中嘅玄機。





「碟?哦⋯喺電腦入面呀。」小南回答。

「咩話?」我嘅反應好大,搞到小南嚇咗一跳。

「係⋯係咪有咩事呀?」

要熄機,呢個唯一嘅化解方法。

但係主機位置又喺小南嗰邊,我完全冇辦法過到去,只可以用手動嘅方式。

「係呀係呀,小南你快啲畀返部電腦我先啦。」心急起嚟,我就想搶走小南正控制住嘅滑鼠。

點知小南居然反抗,唔畀我得逞。

「唔畀喎!你係咪有嘢收埋唔畀我知呀?」小南問。





「冇呀冇呀⋯」我連冷汗都標埋,一心只想搶返電腦嘅使用權。

「冇?你一定有!」小南露出凶狠嘅目光凝視着我。「嗱!男朋友係唔可以對女朋友講大話㗎!」

「吓⋯⋯」我心急就會成個人亂晒㗎喇,一定要冷靜啲先。「有呀有呀⋯」

「講啦咁!」

迫到埋身啦,唯有出此策略啦!

「我⋯」我伸出兩隻魔手向小南腰間進發。「我玩下你咋!」

說罷,我就不停地呵癢着小南。





「哈哈⋯⋯哈哈⋯⋯好痕呀,唔好啦⋯⋯」小南扭動身軀嘅同時,終於失去咗電腦嘅控制權。

既然係咁,只要睇準時機嘅話⋯⋯就可以熄機。

「問你怕未呢?」我笑住講。

「喂呀!怕啦怕啦⋯⋯」小南笑到面紅紅咁對住我。

「真係⋯怕?」

趁住佢唔留意,我將手慢慢放去滑鼠上⋯⋯

「喂!做咩又搞部電腦呀?」

仆街!點都係畀佢發現咗!夾硬嚟啦!





我拎起個滑鼠想篤去關機嘅位置,小南見我咁古怪就衝過嚟想搶,於是我哋就一齊拎住個滑鼠咁撳嚟撳去。

「嘻⋯都話你有嘢瞞住我㗎啦。」

「冇呀冇呀⋯唔係呀,有呀!總之唔可以畀你知道㗎。」

「唔得喎⋯我想知呀。」

小南嘅好奇心真係好恐怖呀!點算好呀?CD入面嘅秘密冇啦冇啦⋯⋯

喺混亂之中,我哋就撳咗一個影片出嚟⋯⋯

冇啦冇啦!我最唔想發生嘅事終於發生啦!我最唔期待的畫面出現了!





不過,根據我過往觀賞嘅經驗,呢啲影片一開頭都係好保守㗎,冇咁快到戲肉,應該冇事嘅⋯⋯

正當我有一秒鐘放心落嚟嘅時候,電腦開始浮現出男女交歡嘅畫面⋯⋯

緊接住係叫聲⋯⋯

「呀⋯呀呀⋯呀⋯吔咩嗲!」

見到小南嘅目光投射喺咁特別嘅畫面上,雙手好自然咁鬆開隻滑鼠,痴痴呆呆咁望住,臉頰漸漸通紅。

媽呀!好尷尬呀!

女教師咁都可以出到嚟,到底小南點搵到佢出山㗎?明明阿榮送畀我嗰日,我將佢收得好埋㗎喎⋯⋯

到最後,我走埋去電腦前熄咗佢。

而小南就呆呆咁望住我,一雙圓圓嘅大眼睛怕怕羞羞咁望住我。

「頭先⋯嗰啲⋯係咩嚟㗎?」小南問。

「嗯⋯⋯」我諗小南份人再純品,都冇可能唔知頭先嗰啲係咩嚟啩。

「吓⋯⋯」

「嗯⋯⋯」

「吓⋯⋯」

「咪咩囉⋯⋯」

跟住小南多番追問,想從我口中得到答案。

但我點講啫?唔通話佢哋做緊啲好開心嘅事咩?

同埋我估小南一定知㗎囉,佢想扮唔知道等大家冇咁尷尬啫,我諗係啩⋯⋯