《台灣個表妹嚟咗我屋企住》【完】: (一百零四)純品啲好

眨下眼又一日⋯⋯

呢一日，我喺小南間房入面，拎起佢啲小說嚟睇，而小南就挨喺我膊頭上靜靜咁陪住我。

咦！唔係，應該話係不停騷擾住我。

「表哥呀表哥～」#:)#lme

「啦啦～啦啦～」





小南又哼起嗰首佢自稱好鍾意嘅歌。

「啦啦啦啦啦～啦！啦！啦啦～」

「啦啦啦啦啦～啦！啦！啦啦⋯⋯」

「屌！你啦完未呀？好煩呀。」我終於按耐不住，柔柔咁推開佢個頭。

點知佢又挨返過嚟，「吹咩？嘻嘻⋯⋯鬼叫你掛住睇書唔理我咩？」





「我有理你㗎，我有聽你哼歌㗎。」我話。

「係咩？」小南將身體向我靠得更近，又喺耳邊柔聲細語：「你知我哼緊咩歌咩？」

「唔知喎。」好在我夠定力，能不受小南嘅騷擾。

「唔知嘅話我就繼續煩住你，嘻！」自從有咗小南之後，就成日畀佢撒嬌，一方面係幾爽嘅，可以享受下被愛嘅滋味，但另一方面都幾煩，搞到我書又溫唔到，連睇小說都唔得。

「我先唔驚你呀。」





「係喎⋯⋯我想問點解表哥你成日都講一啲語氣好重嘅字嘅？」

我見小南係認真咁問，我都認真咁回答：「咩字呀？」

「你頭先講嗰啲⋯⋯咩嘢屌呀。」小南一派天真咁話。

可以將個「屌」字讀得咁正經，真係少有。

但講起嚟，都係第一次聽見小南講粗口⋯⋯

不過都啱嘅，識講廣東話唔等於識講埋粗口，唔通小南阿媽會教埋佢問候別人娘親咩？我諗冇一個母親會咁啩？

「嗯⋯⋯粗口嚟，唔好學。」我笑咗笑。

「啫係咩呀？」





「唔學得㗎，講粗口好冇禮貌㗎。」

「咁你又講？唔理呀！快啲教我呀！」小南死心不息，勢要學講粗口，仲要起身挨埋落嚟。「快啲教我講啦！嚟啦！啦啦啦啦啦⋯⋯」

小南嘅噪音攻擊，實在令我頂唔順，我連本書都放埋一二邊，雙手撳住耳仔，開始進入投降狀態。

「啦啦啦啦！快啲教我講啦！啦啦啦啦啦啦！」

「放過我啦，你個肥豬南。」

「唔制喎！啦啦啦啦！」

佢一定係痴咗線，邊有女仔會要人教佢講粗口㗎⋯⋯





咁嘅話⋯⋯又玩下佢先。

「好啦！我教你啦！」我搣長佢肥嘟嘟嘅臉頰。「你唔好再啦啦啦我，好冇？你乖乖地坐低先啦。」

「好嘢！你終於肯教我啦！」小南笑嘻嘻咁坐喺床上。

「但你記住唔好同人講喎。」我好似老師咁說教。

「嗯！」

「屌！呢個字，知唔知點解？」我問。

「我就係唔知先叫你教下我，你又問返我⋯⋯」

我先露出狡猾嘅微笑，再話：「意思係指⋯⋯嗰日我同你山上面咩呢⋯⋯」





小南一聽，立即面紅耳赤，然後嬌羞咁話：「你個衰人，仲敢提返起喎⋯⋯嗰日呀⋯⋯哼⋯⋯如果我有咗BB咁點算喎？」

「咁你問個屌字點解，真係咁嘅意思呀嘛。」我話。「同埋⋯⋯有咗咪生出嚟囉。」

「講你就叻啫！我同你都讀緊書㗎⋯⋯」嬌滴滴嘅小南送咗幾個粉拳畀我。

我溫柔咁一手攬住佢，然後好堅定咁講：「我會負責任㗎！絕對！唔會！令你擔驚受怕。」

而事實上，我都係講真。

如果真係出咗嘅啲咩意外，我可以連書都唔讀，負起照顧小南嘅責任，就算幾辛苦都無所謂，因為我早就認定小南係我真命天女。

或者我同小南真係有所謂嘅宿世姻緣，所以我愛得佢好深。





「哼⋯⋯衰人星，咁你諗好咩名未呀？」小南好開心咁問。

「名？」我聽後，呆咗。

「係呀！我哋啲仔女個名呀！諗定先就啱㗎啦！」

「吓⋯⋯小南你唔係真係有咗呀嘛？」

雖然我早就有心理準備，但事情真係殺到埋嚟嘅時候，難免會一時接受唔到。

屌呀！唔通我真係咁快做人爸爸？

小南呆呆咁眨一眨眼，再搣返我塊臉。

「你諗咗咩呀？我都冇話我有咗，叫你諗下名咋，第日同你結咗婚先算啦。」小南話。

「結婚？」我聽完，又呆多次。

「乜你唔想娶我咩？」喺我懷裡嘅小南問。

「想⋯⋯」我嘅腦海不禁浮現出小南穿起婚紗嘅幸福模樣。「點會唔想喎⋯⋯」

「咁你諗好名未呀？」

我攬住小南又不自覺地笑起嚟，享受緊咁幸福嘅時光。

「喂呀！又唔理我！」

「諗緊呀嘛！」

「咁你諗完未呀？」

「諗好㗎啦，男仔呢就叫家駒，我偶像都係叫家駒。」

「咁女仔呢？」

「女仔呀⋯⋯叫星嵐啦！有我同你個名嘛。」

「嘻嘻⋯⋯白痴！我邊有話過要幫你生呀？」

正當我講到眉飛色舞，原來小南又成功戲弄我。

但被戲弄，亦好開心。

之後我哋又開始咗無聊但甜蜜嘅情話⋯⋯

最後，我成功扯開咗教佢講粗口呢個話題，廢事小南學識咗講粗口之後，會不停屌我老母，老母畀人屌得多，或多或少都會唔開心，更何況我連老母都冇。

小南都係純品啲好呀。