計計埋埋,除咗有時候我同小南會出街食之外,小南都已經煮咗好多餐好好味嘅晚餐畀我同阿爸。

而今日又三個人三餸一湯嘅時候,小南就表示佢開始技窮。

「表哥呀,你仲想食啲咩呀?因為我見姨母煮過啲嘢食我都差唔多煮過晒。」

「吓⋯⋯佢煮得咁少㗎咩?應該唔止嘅,我記得佢仲煮過好多好多。」

「咁⋯⋯姨丈你鍾意食啲咩呀?」小南又想嚟老爺政策呢一套。





「我冇乜所謂呀,星仔食得嗰啲我都食。」阿爸話。

阿爸講得冇錯,佢真係冇特別鍾意食嘅嘢,我食咩佢就食咩,都食物一向都冇乜要求,所以咁多年嘅外賣都可以忍受得到。

「咁呀⋯⋯」望住小南為咗一餐飯而相當苦惱嘅樣子,從中可以看得見一位賢妻嘅風範。

「不如我再搵搵啲相畀你睇下啦,咁咪唔使你諗囉,不過⋯⋯」我甜笑住咁講:「表妹你煮咩都咁好食㗎啦。」

「嘻嘻⋯⋯」小南好似好勉強咁笑緊。





突然之間,我感受到枱下有隻腳踢一踢我。

係喎!我唔記得咗阿爸在場,但我竟然仲同小南公然調情。

「阿阿⋯⋯阿爸你話係咪先?小南餐餐飯都咁好味。」我試圖自圓其說,希望唔會引起阿爸嘅疑心。

「嗯,係呀係呀,小南煮飯真係好叻。」阿爸平淡咁講,好在過到骨啫。

「嗱!阿爸都話係呀!所以表妹你煮咩都無乜所謂。」正常講嘢背後,卻是一額汗。





「嗯!不過我都係諗唔到喎,你再去搵啲相畀我睇下啦。」小南話。

「咁我一陣去間房拎出嚟畀你哋啦。」阿爸話。

「哦⋯⋯好呀。」我答。

點解好似有種咁奇怪嘅感覺?

我記得上一次想拎相嘅時候,阿爸又係唔想我入佢間房拎,神神秘秘咁。

莫非佢好似當初嘅小南咁,都有啲不可告人嘅秘密?