《台灣個表妹嚟咗我屋企住》【完】: (一百零六)騷擾攻擊

食完飯之後，就執埋啲碗碟交畀我洗。

我洗哂碗後一出到客廳，就見到阿爸擺咗一本相簿喺枱面。

「星仔小南，嗱！你哋睇下啦，我去沖個涼先呀。」跟住阿爸就拎埋衫褲行咗入廁所。

「嗯！唔該姨丈！」小南拉住我隻手過去：「表哥你快啲過嚟啦。」

「唔知姨母仲煮過啲咩嘢食呢？」小南好期待咁翻開本相簿，但神色又突然轉得疑惑。「咦⋯⋯呢啲好似唔食得㗎喎。」





「咩嘢呀？」我拎過嚟一睇，原來係我細個嘅相。「我嚟㗎！梗係唔食得啦。」

「嘻嘻⋯⋯唔怪得之咁肥啦，成隻人形豬咁。」小南嘅語調輕佻中帶點諷刺嘅味道。

居然咁話我⋯⋯

「我先唔係人形豬呀！」我拎本相簿輕輕咁拍咗落去小南個頭度。

「拍我個頭？」小南不甘示弱，扎好馬步就準備好出招⋯⋯「豬豬豬豬豬豬豬豬豬豬豬豬～」





仆街喇！又係騷擾攻擊？

「哎呀！好煩呀！」

我舉手投降後，就打算進入阿爸間房睇下有冇其他真係嘢食嘅相片可以參考下。