《台灣個表妹嚟咗我屋企住》【完】: 結局.惜別
結局.惜別
六日裏面，我曾經問過小南好多次會唔會返嚟。
佢答我，一定會。
我唔敢肯定答案嘅真偽，只敢用呢六日去珍惜同佢相處嘅時光。
儘量去埋一啲我想帶佢去嘅地方。
而外公同兩個表姐，就畀阿爸帶咗去游車河，特登畀啲空間我同小南。
「喂呀！你笑下啦，成日都苦瓜乾咁。」
「嗯⋯⋯」
「你再唔笑我就嬲㗎啦！」
「唔好嬲啦！咁⋯⋯咁你要走呀嘛。」
「我講咗十萬次啦，我會返嚟㗎。」
「嗯⋯⋯」
但我對住小南，始終都打唔起精神。
我倆恍如即將分手嘅情侶⋯⋯
相處再無起伏，平淡得很。
面對佢嘅離開，我束手無策。
我真係好冇用⋯⋯
一日有二十四個小時，但當你真係認認真真咁去珍惜每一分每一秒嘅時候，你先至會發現⋯⋯
時間根本唔夠。
好快，已經係最後兩日。
同完小南去多次溜冰，我就畀佢拉咗我去搭小巴。
小巴⋯⋯
一樣我以為我呢一世都唔會再搭嘅交通工具。
因為媽媽就係同我一齊搭小巴嗰陣時發生意外。
當時我在場，架車翻側嘅時候，佢第一時間用身軀保護住我，所以我只係受咗少少傷，但媽媽⋯⋯
本來都驚到死，對小巴有好強烈嘅陰影，點知仲要比小南夾硬拉咗上嚟坐，勾起我嘅悲痛回憶。
如果嗰日媽媽冇保護我，佢就唔使⋯⋯
諗到呢度，我就忍唔住伏於小南嘅大髀上。
淚水亦忍唔住溢出⋯⋯
「星⋯⋯星？」
「嗯？」
「你做乜喊喎？」
小南嘅心思細密，任何事都同過佢嘅法眼。
「冇⋯⋯冇呀。」
「唔好唔開心啦，你唔開心⋯⋯我都唔開心㗎啦⋯⋯」小南嘟起個嘴。
我企返起身，將佢攬進懷內。
「傻豬，都話咗我冇唔開心⋯⋯我只係⋯⋯」
「只係咩呀？」
「唔捨得你⋯⋯」
「唔捨得都要捨得㗎啦，過兩個禮拜啫。」
小南講就輕鬆，佢完全唔知道對一個人嘅思念，係一種超級痛苦嘅虐待。
兩個禮拜，見唔到小南嘅樣，聽唔到佢把聲，食唔到佢煮嘅飯。
呢種日子我都唔知點過好。
「可⋯可唔可以唔好走。」我有啲咽喉咁講。
「唉呀！你講咗二十萬次啦！唔理你呀。」
小南冇再回答，只伏於我嘅心口瞓咗。
我凝望窗外嘅景色，諗下聽日帶小南去邊好。
最後一日，應該做咩好，做咩都好，小南都會離開我。
小巴嘅限速器不斷咁響，好快就到咗屋企樓下。
但願有一日，小巴司機真係會睇下個限速器，揸得慢啲，等我同小南嘅相處時間多啲。
轉眼間，已經到咗八月三十號。
估唔到喺四十二日入面，我會同一個本來全無交集嘅女仔經歷咗咁多事情。
佢帶畀我嘅快樂，我會永世難忘。
喺呢四十二日之前，黃家星只係一個死廢青，朋友唔多，畀女飛過，終日沉溺於喪母之痛中，唔識得何謂開心、何謂快樂。
淨係掛住做一啲人哋嘅期望，冇諗過自己嘅目標同將來。
但如今，黃家星呢個人，佢終於識笑，因為有一個女仔成日都氹佢笑，將傻氣感染畀佢。
傻傻地嘅黃家星，漸漸搵到屬於佢自己嘅目標，就係要有能力照顧好一個女仔，盡最大努力畀到幸福佢。
呢個先係佢嘅人生目標，由一個女仔身上搵到嘅目標，目標名稱叫做「愛一個人」。
而呢個女仔就叫做程小南，係黃家星嘅表妹。
最後一日，
我同小南喺屋企靜靜咁渡過，冇太多情話、亦冇太多嬉戲，我只係想靜靜咁攬實佢。
太陽落山，變成落霞孤鶩嘅黃昏。
或者到最後，我會變回一隻孤鶩，繼續孤單咁喺天空上飛翔。
阿爸繼續帶走咗外公同兩個表姐，所以可以畀我同小南單獨相處多啲。
「星星⋯⋯我煮飯畀你食好冇呀？」小南問。
「乜你有買餸咩？」
「我前日偷偷地買咗，放咗喺雪櫃。」
「哈哈⋯⋯你都幾鬼馬。」
「想喺臨走前畀個驚喜你呀嘛。」
「好呀，咁你去啦，講明先呀，煮得唔好食我唔食㗎！」
「食咗咁日多都驚唔好食？放心啦你！」說罷，小南就走咗入廚房。
我嘅腦海又閃出一啲畫面⋯⋯
小南第一日嚟嗰陣嘅三餸一湯。
「其實可以嘅話，我煮都得嘅⋯」小南怕怕羞羞咁講。「如果你地唔嫌我煮得難食嘅話⋯」
「點會呢？」我莫名有種歡喜從心底裏湧出嚟。「估唔到你識煮飯喎。」
「因為我細細個就要幫手煮飯畀屋企人食，所以⋯⋯」
「咁咪會煮得好好食囉？」
「都唔算好食嘅，哈哈⋯⋯」
「你會煮啲咩先？我都好耐冇食過煮家菜啦。」
諗下諗下，小南已經煮好咗，仲拎埋啲飯餸出嚟。
「快啲過嚟食啦表哥！」
「嗯。」
我行過去餐桌上坐低，品嚐「最後一餐」。
原來越有意義嘅晚餐，係最平凡簡單。
喺我眼前嘅餸菜，
一碟蝦仁炒蛋⋯⋯
一碟菜心炒牛肉⋯⋯
一碟葱香黃花魚⋯⋯
我都鍾意食嘅嘢喺晒眼前，感覺好似返咗去第一日嘅晚上，不過今晚獨特啲，只有我同小南兩個撐枱腳。
「你快啲食舊蛋啦！」小南用筷子夾起蛋塊放到我嘅口裏。「有我餵埋你食呀！係咪好好味呢？哈哈⋯⋯」
看見小南淺淺一笑，我亦都笑住咁講：「好甜。」
呢種甜，有別於第一次好難食嗰種甜，而係充滿愛意嘅一種，以食物溶化人嘅心靈。
所以呢一刻，我個心好甜，同時，都好痛。
「我哋咁樣都幾似兩公婆喎。」我話。
「食嘢啦老公！」小南再夾啲魚畀我食。
我一食，咀嚼唔夠半秒，眼淚又湧出嚟。
今次我耷低頭，任由淚水滴落我碗白飯。
「做咩又喊呀？」小南笑一笑我，然後行過嚟身邊攬住我。「唔好再喊啦，白痴表哥。」
而我都係忍唔住問：「你一定要走？」
「係呀係呀，我講咗三十萬次啦！你真係好長氣！」
「冇⋯我冇事，繼續食飯啦。」
白飯好鹹，因為有我嘅眼淚。
最後一晚，就係咗完結。
小南，聽朝就走。