《台灣個表妹嚟咗我屋企住》【完】: (二)你快樂嗎？

「唔好走呀！」我喺到追住一個痩弱嘅背影。

「對唔住⋯」一把溫柔中帶點歉意嘅聲線傳到我耳邊。

從聲音得知我追住嘅係一個女仔。

但我無論點追，都追唔到佢，反而畀佢愈走愈遠⋯⋯

最後嗰個女仔消失喺我眼前。





呢個畫面好陌生，同時又好熟悉。

係真實？定係假象？

失去嘅感覺⋯好痛苦。

「⋯⋯」

原來已經係朝早。





我瞓咗係張床上面望住個天花板，拍一拍自己塊面，先發現自己原來只係發咗一場夢。

再望過去枱上面一大堆嘅試卷，睇嚟應該係我讀書嘅壓力太大，先會發埋呢啲夢。

我起身行過去枱面，慢慢將啲試卷疊好⋯⋯

我叫黃家星，啱啱喺前日放完榜。

知道自己DSE成績唔好，唔夠分入U，但又好想入U讀自己想讀嗰科，因為咁就揀咗repeat中六，其實想入U都係全因為阿爸。





幾年前，媽媽因為交通意外離開咗我同阿爸，而呢幾年阿爸就作為一個極之稱職嘅單親爸爸一直照顧住我，無奈嘅係我好唔爭氣⋯⋯明明好渴望報答阿爸，我將所有時間心機放哂入DSE，偏偏考出嚟嘅成績都讀唔到大學，雖然阿爸冇講啲咩嘢，但我好清楚佢心入面依然係望子成龍，對我有好高期望。

所以今次repeat，我發誓一定要成功考上大學！於是我就再一次博哂老命咁去狂操試卷同溫書。

我疊好哂啲卷之後，又拎返本中文書出嚟溫。

可能就係因為咁⋯⋯搞到自己勁大壓力。

依家係七月中，正值炎炎夏日，大部份學生都已經放緊暑期，每日都去唔同地方吃喝玩樂，相反我就每日留喺屋企間房入面溫書，亳無生活樂趣可言，即使明知條路幾咁辛苦但都要捱落去。

老實講⋯⋯用本來去玩嘅時間畀哂DSE，值得咩？唔值得我都知啦，但個教育制度係咁樣我都冇計，如果有得揀⋯⋯我都想好似出面啲人咁周街去玩，只可惜人生本來有好多嘢都冇得揀，有時所謂嘅有得揀都係迫於無奈咁去揀。

就係咁樣，我由朝早一直溫書一直溫到晏晝。

雖然咁講，但我都係人嚟，吊頸都要抖下氣，通常溫到晏晝我都會食個飯，聽下歌，休息一陣。





我拎返部鎖咗入櫃嘅手機出嚟，然後瞓落張床，㩒咗下隨機播放，再望住個天花板聽住首歌⋯⋯

『你不是真正的快樂』
『你的笑只是你穿的保護色』
『你決定不恨了 也決定不愛了』
『把你的靈魂 關在永遠 鎖上的軀殼』

點解⋯⋯我會無緣無故喊嘅?

我嘅眼淚原來已經整濕咗成個枕頭。

『這世界 笑了 於是你合群的一起笑了』
『當生存是規則 不是 你的選擇』
『於是你 含著眼淚』

『飄飄盪盪 跌跌撞撞的走著』

其實⋯⋯我寧願簡簡單單去過每一日。

其實⋯⋯我並唔快樂。

其實⋯⋯我想喊好耐。