《台灣個表妹嚟咗我屋企住》【完】: (三)我冇幸福家庭

喊喊下我又再瞓著咗。

唔知又過咗幾耐⋯⋯

忽然，耳邊傳嚟幾下敲門聲，我因此驚醒過嚟。

「星仔，仲溫緊書？」係我阿爸把低沉嘅聲線，然後佢再話：「快啲出嚟食個飯先啦，我買咗外賣。」

「嗯，我依家出嚟。」我就回應話。





啱啱瞓醒嘅我望一望枱面個鐘，原來已經八點幾⋯我真係瞓咗好耐。

出到客廳，開住部電視機，同阿爸一人一盒外賣，你我深情對望咁食盒外賣，而同阿爸雖有交流，但感覺始終並非一般家庭咁溫馨。

「點呀？盒福建炒飯好唔好食？」

「嗯⋯⋯」

「今日溫書辛唔辛苦？」





「嗯⋯⋯」

「依排夠唔夠錢洗？」

「嗯⋯⋯」

「屌！嗰條友之前唔係吸毒㗎咩？仲畀佢做戲嘅？」

「嗯⋯⋯」





雖然都係閒話家常，但係同大一輩嘅人講嘢無論點都總會有少少代溝，而我有時候都唔知點應阿爸好，加上阿爸做地盤，早出晚歸，好少同佢話有咩交流，我諗唯一嘅交流就只係一齊食外賣嘅呢幾個字，所以我同佢嘅關係可以話係唔算差，亦唔算好。

而外賣，自從媽媽離開咗我地之後，就係阿爸每晚必買嘅嘢，可能一直太依賴居企唯一嗰個女人，故此當失去佢之後，我哋喺生活上都變得不知所措，家常便飯都不復再見，取而代之嘅就係外賣。

但生活慢慢係會習慣，最起碼我冇好似當初咁，日日都食，食到想死咁濟。

「係喎！我哋聽日一齊去接你表妹機。」依句說話由我阿爸口中講出嚟，令我深感疑惑。

「吓⋯⋯表妹？」我問：「乜我有表妹㗎咩？點解我唔知嘅？」

「喺台灣嗰個細表妹呀！」阿爸咁講完，又真係令我諗返起啲嘢，然後佢又話︰「佢打算嚟香港住返個幾月，我哋聽日揸車去接佢啦。」

「哦⋯咁佢住邊？」

「住我哋屋企囉，警告你唔好打人主意呀！」阿爸開玩笑咁叮囑我。





「但係⋯我哋屋企有位咩？」

「你大佬間房囉，條友仔唔見咗咁耐，都唔返嚟住㗎啦。」阿爸有啲嬲咁指住我阿哥間房話。

「哦⋯⋯」

咁又確實係嘅，阿哥真係好耐冇返屋企住，而佢間房亦都掉空咗好耐。

當年佢考完DSE，立即連人影都唔見埋，淨係話去咗Working Holiday，完全忘記咗我同阿爸，而且咁耐以嚟，一個電話都冇打返嚟屋企，真係唔知佢依家係生係死。

諗返起⋯都過咗兩年啦，所以阿爸一提起佢都有啲嬲嬲地。

講返表妹先⋯⋯聽完阿爸咁講，我記得細個嘅時候去過一次台灣探親，仲喺台灣住咗幾日，嗰陣就係有三個女仔成日同我玩，諗諗下都已經係好耐好耐嘅事，唔知道佢哋依家點樣呢?





為咗記返起多啲嗰陣嘅嘢，食完個外賣之後，我就返房搵返哂全部喺台灣時候嗰啲影過嘅相，而啲相就放哂入一個封面舖哂塵嘅相簿入面，打開一睇⋯⋯就見到我細個肥仔嘅樣，真係好懷念。

加上班親戚住喺台南啲鄉下地方，我天生又比較惹蚊，相中嘅我塊臉係畀啲蚊針到豬頭一樣，慶幸我冇因為咁而變得樣衰咗。

再睇下睇下，終於見到有張相係我同三個女仔所影。

喺呢張相入面，我企喺中間，而左邊有個好樣衰嘅大肥妹，右邊就企咗一個樣貌普通但皮膚好黑十足非洲黑人嘅女仔，最右邊就係一個哨牙嘅高妹。

我只係記得其中一個係同我同年紀嘅表妹，其他兩個都係我嘅表姐，但時隔多年，我都唔清楚邊個先係我嘅表妹，只係希望唔係好樣衰嘅大肥妹啦。

再慢慢睇哂本相簿之後，先發現原來得一張相同佢哋嘅合照，其他嘅相好多都係媽媽同其他人影嘅⋯⋯

我記得相比起影相，媽媽永遠都鍾意畀人影，而阿爸就鍾意影人，攝影係佢嘅興趣，但係依家嘅佢已經冇再影相，當年視為寶貝嘅相機連同嗰一堆嘅回憶都放咗入櫃封塵。

我抽起嗰張合照，再放咗喺枱面上，然後我望一望枱面疊試卷，不禁心諗⋯⋯





我嗰位表妹真係幸福，唔使面對嗰個DSE。

或者，每個人擁有嘅幸福都唔一樣。