《台灣個表妹嚟咗我屋企住》【完】: (十五)嚟香港嘅原因

一聽到觀塘呢個名，小南神色都變埋，好似覺得好意外咁。

「表哥，我哋去咗觀塘？」小南問。

「嗯，係呀。」車門打開後，我同小南就慢慢咁行出車廂。

「又會咁啱嘅⋯⋯」小南自言自語咁話。

「乜嘢咁啱？」





「冇嘢⋯⋯」

「咁我哋快啲行啦，你又話肚餓。」

「嗯⋯⋯」

見小南嘅樣好似好奇怪點解我會帶佢嚟呢到，佢一路上一直皺住眉頭，好想問我，但又唔問⋯⋯而出咗站之後，佢就突然拉住我。

「表哥，等等！」





「做咩嘢？」我擰轉頭望向小南，見到佢一副極之疑惑嘅樣子。

「你⋯係咪知道咗喇？」

「知道咩？」

「知道咗嗰啲嘢呀！」

「邊啲呀？」





「嗰啲囉⋯你真係知道咗？」

「你講白啲啦。」

「我嚟香港嘅原因呀！」小南好嚴肅咁講。

果然⋯冇估錯表妹嚟香港係想搵佢男朋友，而佢嘅男朋友就係喺尋人網到嗰位陳先生，住喺觀塘嘅陳先生，所以一聽到我帶咗佢嚟觀塘，佢就明白我知道咗個原因，但我知道咗又如何呢？點解我會帶佢過嚟嘅？唔通嚟搵佢嘅男朋友？突然之間我做咗一件連我自己都不能理解嘅事情。

但眼前嘅小南係我識咗佢呢幾日以嚟最嬲嘅樣，呢種嬲係冇任何面部表情，而係將怒火收埋喺心底隨時會爆出嚟嘅嬲，而且佢係嬲到想喊咁，呢一刻我知無論點講佢都會好嬲我，可能係因為我查過佢⋯想知道佢嘅袐密，又冇尊重佢嘅私隱。

我最驚嘅真係女仔喺我面前喊⋯⋯

我哋兩個企咗喺觀塘車站嘅出口，人來人往嘅路上就好似一對小情侶喺到鬧緊交⋯⋯

我見狀，就直接咁表明：「你嚟搵男朋友囉。」





「吓⋯⋯」小南嘅神色又轉一轉，顯得有啲不知所措又有啲失落，然後低頭沉默咗一陣。「你講緊嘅男朋友係咪指我上網搵嘅嗰個人呀？」

「係呀，我講緊姓陳嗰個人。」我話。

「哦！即係你偷睇過我上網啲嘢啦！」

「咁啱睇到咋，咁⋯⋯佢真係你男朋友？」

「哈哈⋯⋯」

小南無啦啦笑起上嚟，我真係唔明呀，你唔係應該會好嬲㗎咩？但睇嚟佢冇因為我查佢嘅嘢而嬲我。

我發現，我永遠都冇可能捉摸得到眼前呢個女仔。





「其實呢⋯⋯」小南笑住話。「佢係我嘅筆友，唔係我嘅男朋友嚟㗎。」

「筆友？」原來我一直都估錯咗⋯⋯聽到係小南嘅筆友，我嘅心情就不能自控咁由地獄上返天堂。

「冇錯呀，係我喺香港嘅筆友，唔係男朋友嚟。」

「咁你嚟香港係因為想嚟搵佢？」

「都算係嘅⋯想見下佢真人囉。」

「哦⋯⋯」依一刻我終於明白哂，其實小南只係嚟見下筆友，係我自己多心諗多咗。

「咁你知道佢住邊咩？」我問。

「知道呀！佢有寫過個地址畀我。」小南答。





「咁你講個地址畀我聽，我帶你去搵佢啦。」其實我都好想睇下小南筆友嘅真人。

「你都想去見下佢？」

「係呀。」

「都得嘅⋯⋯」小南好似有啲唔願意咁。「咁你聽住喇喎，地址應該係觀塘偉業街⋯⋯」

「等陣先呀⋯⋯」我聽完個地址之後都要拎部手機出嚟睇下Google Maps，因為我都唔係好熟觀塘。「哦，好近啫，跟住我行啦。」

「嗯⋯好呀。」

就喺烈日當空之下，我帶住表妹，睇住Google Maps都唔識去嘅情況底下，喺觀塘嘅大街小巷行嚟行去，都搵唔到咩嘢偉業街。當你有地圖都唔識去嘅地方，嗰個地方就彷如世上最遙遠嘅距離，唔講我都唔覺自己原來係路痴，就係咁行到我同表妹都成頭大汗，但依然搵緊嗰個地方。





「搵到未呀？我就快餓死又熱死啦表哥。」小南已經喺到叫苦連天。

「應該去到㗎啦喎⋯⋯」我望住Google Maps，感覺好似去咗外太空咁。

正當我諗緊帶表妹去食啲嘢休息下先嘅時候⋯⋯

「表哥！」小南行先幾步，然後指住一幢古舊嘅唐樓。「係咪依度呀？」

「嗯⋯⋯」我仔細咁對一對個地址。「偉業街xxx號⋯⋯啱啦就係依度啦⋯⋯」

「好嘢！咁上去啦！」

冇諗過一個住台灣嘅人都畀我熟過香港，真係好慚愧。

而我就緊張過表妹咁同佢一齊行入去呢幢唐樓，準備去見下佢嘅筆友。