《台灣個表妹嚟咗我屋企住》【完】: (十六)筆友
我同小南入走呢幢唐樓，行上去個地址寫嘅嗰層，見到四周十分殘舊嘅環境，令我不斷懷疑自己到底係咪嚟錯咗地方，見到之前嗰位陳生畀人嘅印象應該唔似住喺唐樓。
因為一般住喺呢啲唐樓嘅人都係住喺劏房或者板間房，通常都係一啲草根基層。
小南嘅筆友同我想像中完全格格不入，嗰位青年真係住喺依度？而跟住冇耐我同小南就知道咗個事實，亦都明白哂了。
我同小南企咗喺筆友屋企嘅門口。
「就係呢間屋？」小南問。
「係啩⋯⋯」連我自己都唔係好清楚。
我從門外望嚟望去都搵唔到門鐘呢樣嘢，於是我伸手去敲門。
咚咚！咚咚！
我哋等咗陣都冇人開門⋯⋯
「表哥，你肯定係喺依度？」
「可能佢唔係屋企呢⋯⋯」我未講完，對門就打開咗。
一個中年女人打開咗門，用唔鹹唔淡嘅廣東話問。
「你哋係邊個？」
大獲啦，唔通我哋搵錯屋？定係佢係個筆友嘅阿媽嚟呢?
正當我覺得後者機會大啲，無意中偷望下間屋入面嘅環境先發現自己錯哂，入面其實根本全部都係劏房，中年女人只係其中一個劏房户，如果咁講法嘅話……
「唔該我想搵陳國良。」我話。
中年女人用種好疑惑嘅眼神望一望我同表妹，然後向屋入面大嗌：「肥陳，有人搵你呀！」
跟住中年女人就自己行返入房⋯接落嚟嘅發展亦同我預計中無異。
「屌，乜水呀？」一把歷經滄桑嘅聲線由屋入面傳出嚟。
伴隨住聲音行出嚟嘅係一個食住支煙嘅中年阿叔，肥胖嘅身形，加上第一隻字就爆粗，睇落十足阿雪，唔係孫慧雪呀！係林雪！
嗰一刻，我同小南都呆咗⋯⋯
「你係⋯⋯你係陳國良⋯⋯先生？」
「係呀，你乜水呀？」
「係咁嘅先生⋯我想請問下你⋯」我一本正經咁講。
「嘩嘩嘩！喂，阿哥，又係嚟推鳩我銷？唔撚洗啦。」林雪講完就好快手想閂門。
「等陣先！」我立即拉住對門唔畀佢閂，為咗確認佢真係小南嘅筆友，唔可以畀佢就咁閂門㗎。「喂，陳生，請問你係咪小南嘅筆友？」
「邊個小南呀？」
「程小南呀！」一直喺我背後嘅小南搶住話。
「吓？哦⋯係呀。」
睇嚟事實係所謂筆友，居然係一個好肥嘅中年阿叔，而並唔係乜嘢後生仔⋯我同小南都露出一臉難以置信嘅表情，但畢竟依家網上嘅照片有邊張冇執過？有邊張又係真㗎呢？
「我就係程小南⋯」估唔到小南好快就接受到一直以嚟嘅筆友係咁嘅樣。
「吓⋯」而阿叔亦都一面錯愕，好似唔係咁信自己嘅筆友係個靚女。「你講堅㗎？」
「梗係啦。」我幫小南答。
「哦⋯」只見中年阿叔放低支煙，態度一轉，正常起嚟。
「你係佢男朋友？」阿叔突然咁問我，搞到我都唔知點應好。
「唔⋯」
「唔係呀！佢係我表哥嚟咋。」今次輪到小南好緊張咁搶住幫我答。
「哈哈！」阿叔大笑起嚟。「仲以為你帶埋男朋友嚟。」
「唔係呀⋯」小南面對第一次見面嘅筆友顯得有啲怕羞。
阿叔好斯文咁講：「真係唔好意思！破壞咗我喺你心目中嘅形象。」
如果係香港嘅女仔一見到咁嘅情形，想必會立即擰轉頭走，,然後死都唔想諗返起呢個筆友。
只不過小南呢啲鄉下妹，又點會以貌取人呢？
「冇呀，只係⋯有啲意外啫。」小南微笑咁話：「估唔到一直以嚟同我傾咗咁耐計嘅人係咁嘅樣，有啲意想不到啫。」
「原來你唔介意，哈哈⋯」阿叔接住再話：「咁你今次嚟香港玩？你冇寫信講我知嘅？」
「嗯嗯，係呀，嚟香港玩囉⋯順便嚟睇下你嘅真人，如果一早講你知咪唔驚喜囉。」小南話。
「但我想問點解你識講廣東話嘅？乜你唔係台灣人嚟咩？」阿叔問咗個同我問過一樣嘅問題。
「咁係因為媽媽細細個就教我講，所以咪識囉。」
「原來係咁⋯咁上次嗰單嘢⋯」
「依方面⋯我第日寫信再話你知啦。」
「信⋯係喎，莫非⋯」
「喂！唔可以同人講㗎！」
「嘻，明白啦。」
而夾喺中間嘅我，聽住一啲只有佢哋先明白嘅嘢，我就顯得十分尷尬，完全唔知做咩好，又唔知講咩好⋯⋯
就係咁畀佢哋兩個無視咗我。
佢哋就好似兩父女咁傾計，而我就喺中間成為咗攝石人。
「咁我仲可唔可以寫信畀你？」阿叔問。
「當然可以啦，但係要過多兩個月我返咗台灣先得呀。」
「好！一言為定喇。」
「係！一言為定，咁我要走啦，第日再寫信畀你啦。」
「好，再見。」
「再見啦！」
講完之後小南就拖住我走：「行啦表哥。」
臨走前，暫時唔講粗口嘅林雪企喺門口意味深長咁向我打咗下眼色，莫非佢睇中我？真係嚇咗我一下，冇理由㗎⋯⋯我又唔靚仔，其實我覺得佢有啲熟口面，唔通我哋之前見過面？
唔理佢啦，跟住我就同餓到死下死下嘅表妹去咗附近嘅一間茶記食嘢，再唔同佢食嘢就實煩死我㗎啦，反正成日帶佢去快餐店食，今次就地道啲啦，於是就帶咗佢嚟呢間睇落有好耐歷史嘅茶餐廳。
呢到係一種香港嘅產物。
喺其他國家或者地方都冇可能搵得到嘅茶記，係上一代人同依加呢一代人嘅共同回憶，我記得媽媽曾經都成日帶我嚟茶記食嘢。
「呢到有啲咩好嘢食㗎？」小南問。
「第一次嚟呢啲只有香港先食到嘅餐廳，就介紹你食西多士啦。」 我十分自豪咁講，好想快啲畀小南試下食。
「嗱！你介紹我先食咋。」
「唔好食都唔介紹啦，唔該畀份西多士。」
西多士一嚟到，小南隻眼就發哂光，我叫佢先落蜜糖再食，點知依個傻妹就整到成枱都係蜜糖，隔離枱啲人都望哂過嚟，搞到我勁唔好意思，但小南前世一定係餓死，有理冇理食咗先算。
見到佢食得咁開心，我都好好奇想問返一個頭先想問嘅問題：「你真係唔介意頭先嗰位林雪⋯唔係⋯係陳生個樣？」
「咩嘢呀⋯」小南突然將身體傾前過嚟我到，然後好快咁將佢沾有蜜糖嘅手一嘢拍落我個頭到。「我先冇你咁鍾意以貌取人呀！」
「做咩呀你，整到我個頭都係蜜糖啦。」
「鬼叫你偷睇我啲秘密。」
「邊有呀？」
「仲話冇？衰人表哥，咁你又點知我有個筆友呀？係人都有唔想畀人知嘅秘密㗎啦。」小南好明顯講得有啲嬲嬲地。
「咁啱啫⋯」而我就趁佢一時唔留意，將身體傾過去，將啲蜜糖拍返落去佢個頭到，回敬返佢。
「衰人！」小南嘗試反擊，但都畀我避開咗。
「哈哈⋯你打我唔到㗎啦。」
「呀！好衰呀你！！！」
「哈哈⋯⋯」
我哋就係咁傻下傻下喺呢間觀塘嘅茶記，無視哂身邊嘅人，打鬧一番。
而且我亦見到好多虛浮嘅畫面喺眼前不斷閃過。
經過筆友依件事之後亦都令我諗返起收藏喺我心底裏面嘅秘密，其實每個人都有一個唔想畀人知嘅秘密，我都有。
只係自己嘅秘密從來都冇理由要畀另一個人知道。
冇需要，亦都冇資格。