《台灣個表妹嚟咗我屋企住》【完】: (二十一)書展

好快又到咗一年一次嘅書展日。

眼前又係人山人海，聽到嘅又係熟識嘅說話⋯⋯

「嘩！咁年好多新書呀。」

「依本嘢正，等咗好耐。」

「咁多人嘅。」



「喂⋯喂⋯個作家嚟咗喇，我哋快啲去囉簽名喇。」

「條隊咁長㗎⋯⋯等死人咩？」

「龍尾依邊呀！龍尾依邊呀！」

「乜你咁耐先嚟㗎，依家先到嘅。」一個女仔翹住手扁曬嘴咁同一個男仔講，好明顯係個男仔激嬲咗女朋友。

如果唔計上年⋯⋯其實每年我都會嚟，因為除咗有好多唔同嘅新書都喺書展到首賣之外，仲有一啲我好鍾意嘅網絡作家會喺嗰度開簽名會。



如果一本書有作家嘅親筆簽名，唔知點解係會覺得特別好睇，特別有意義。

而鍾意文字嘅我一定要嚟，而且仲要攞一個作家嘅簽名。

雖然我真係每年都嚟，但今年仲要帶多一個人嚟⋯⋯

「書展？即係咩嚟㗎表哥？」

「 即係⋯平時去圖書館睇書，買下書咁囉，不過書展即係有幾間圖書館合併埋一齊咁樣囉。」 我試下同小南解釋。「帶埋你去喇。」



「好呀！我想去睇下呀！」小南興奮咁話。

心入面突然出現咗一個疑問，雖然帶佢去書展，但係小南會唔會睇書㗎呢？於是我好奇咁問佢。

「小南，你鍾唔鍾睇書㗎？」

「吓？我鍾意呀！」小南諗咗一諗，跟住話：「我喺台灣都帶咗啲書嚟喎，表哥你想唔想睇下？」

「⋯⋯」估唔到小南同我一樣都係書蟲。「今晚返嚟先睇下喇，唔急嘅。」

「好呀！咁我哋出發喇。」

就係咁，我就帶埋小南嚟到書展，眼前人來人往嘅情況完全不遜色於去迪士尼嗰陣時，原來香港仲有咁多人鍾意睇書。

但係啲人多到又令我有啲抖唔到氣，有啲莫名其妙嘅恐懼感。



由入口去到書展裏面，呢種感覺就不斷加劇。

「真係好似好多間圖書館喎。」相比之下小南又好似大開眼界嘅，感覺上好驚喜。

「其實又唔可以話係圖書館嘅⋯⋯」我話。

「表哥我哋去嗰邊呀，嗰邊有好多歷史書呀！」說罷，又畀小南拖住咁走。

「喂喂⋯⋯」小南又無視咗我嘅呼喚。