「喂⋯⋯」

畀小南無視咗我之後,佢就拖咗我嚟好多歷史書同古代文學類攤位呢邊,原來佢嘅口味同我一樣喎⋯⋯唔知佢會唔會鍾意睇言情小說呢?

「表哥你睇下,真係有好多書喎。」小南指住一片書海話。

「嗯⋯⋯」

鬼唔知咩多書?我心入面係咁諗但冇講出嚟。





有時覺得表妹都幾煩膠,成日一發現新大陸就鬼殺咁嘈,不過都難怪嘅,佢見識少呀嘛。

但佢都唔會知道呢一大堆睇落咁新淨嘅書喺書展完咗之後都會畀人當成垃圾就咁掉哂。

喺香港,文字真係一文不值⋯⋯

講真我覺得真係好無奈,明明係一堆有溫度嘅文字用心血拼砌出嚟嘅書本,偏偏就咁白白浪費咗。

就好似一段感情咁,明明雙方都出咗好多好多嘢,經歷過好多風雨,但係最終都可能因為某啲原因而要分開,到咗最後都寫唔出一個幸福嘅故事。





通常嚟得書展都唔會諗住打書針㗎喇⋯⋯偏偏小南居然無視咗我,一個人睇起書上嚟,見佢拎起本某朝代嘅歷史書喺度好入迷咁睇。

又真係幾似我喎⋯⋯

「喂,表妹。」我叫佢,但冇反應。

「喂!小南。」今次我加埋動作,我用隻手指篤一篤佢有啲肥嘅面頰。

「唉呀,做咩呀你,做咩篤我塊臉啫。」佢終於有反應。





「冇嘢呀⋯」

「哼!冇嘢你又篤。」小南嬲嬲地咁又用隻手指係咁篤我嘅手臂。

「咁我見你冇反應先篤下你啫。」我話。「不如我哋去嗰邊周圍行下喇。」

「咁呀⋯⋯都好嘅。」佢答應。

之後我哋就沿路一直行,沿途有漫畫店,又有啲攤位唔知賣啲咩,總言之就係五花八門喇,其實話去周圍行下係假,我真正嘅意圖係想行去一個地方。

「依邊龍尾呀!依邊龍尾呀!」一個貌似店員嘅人攞住一支寫住龍尾嘅牌,企喺鐵梯上大聲咁講。

喺佢身邊亦有一條好長好長嘅隊。

跟住我都同小南過埋去排隊。





「表哥呀,做咩嚟排隊嘅?」小南問。

「因為表哥想拎一個作者嘅簽名囉,表妹你畀啲耐性一齊等下好冇?」我回答。

因為希望小南唔好走開,所以先至要留佢喺身邊,雖然我有佢嘅電話號碼,但係如果佢走開咗,喺呢個咁大嘅會展入面,我又要慢慢咁搵佢,同埋喺咁多人嘅環境裏面,有佢喺我身邊會多咗一份安全感。

「吓⋯好囉。」小南好似有啲不滿。「咁個作者係邊個嚟㗎?」

「你應該都唔識㗎喇,佢係寫網絡小說嘅,佢啲愛情小說都幾好睇㗎,仲有出實體書㗎。」我嘗試向小南解說一下。

「咁你得閒就畀我睇下啦。」

「好呀,返去屋企之後畀你睇下」我話。





最後我哋就等⋯⋯等⋯⋯等⋯⋯終於排到我喇,我立即拎出一本言情小說出嚟交畀嗰位作者簽名。

「我好鍾意你啲故仔㗎!」

「哈哈⋯多謝你。」

跟住就dead air咗⋯⋯

嗰位作者叫玉子蛋糕,睇落個樣好似得廿幾歲咁,好後生,我將佢本著作攞畀佢簽名,睇住佢喺本書上面簽咗個名,真係令我覺得好開心,但估唔到嘅係我哋平時睇開嘅網絡作家,真人同想像中真係有好大嘅出入。

之後我就同小南行下流行文學嗰邊,喺嗰邊嘅人流更加多,好彩有小南陪住我行,死喇!點解我咁驚孤獨一個嘅?前年嚟嘅時候都唔係咁㗎。

書展真係唔啱嚟打書釘,反正咁多人,而又唔係得今日先會開,我就決定擇日再嚟,因為身處於人群之中,感覺唔好受。

所以我就同小南講:「喂⋯小南,不如我哋走喇。」





「吓!咁快就走?」我都估到佢唔會願意。

於是我要出殺手鐧對付佢。

「去食嘢啦,食啲嘢先喇。」我以較溫和嘅語氣話:「驚你又肚餓呀。」

「咁都好喎,快啲去喇!」小南好爽快咁答應我。

果然不出我所料,佢又中計了。

我哋向住出口進發,本來應該走得到⋯⋯

突然小南停低腳步同我講。





「表哥,我要去一去廁所呀!」

「咩⋯」我連個話字都未講出聲,佢就已經一支箭咁衝咗走,好快連人影都唔見埋,拋低我一個係人群之中。

我開始有啲抖唔到氣,個心突然間跳得好快好快,身邊嘅人就好似一層又一層嘅布咁包住咗我,我連想都個篤個窿,抖啖氣嘅氣力都冇,陌生嘅身影不斷從身邊走過,伴隨住嘅係恐懼感。

喺迪士尼嘅時候都冇咁勁⋯⋯

「喂⋯喂⋯救⋯」我用盡氣力咁嗌。

開始仲覺得頭暈⋯希望嗌可以引起身邊人注意,可以幫幫我手,但好似冇人理會我,而雙腳都開始有啲支撐唔住,軟咗落嚟,嗰刻我好想有自己熟悉嘅身影即刻帶走我,救一救我。

慢慢就感受到啲窒息嘅感覺,死亡嘅氣味衝我而嚟。

點算呢?點算呀?

當我覺得有啲撐唔住時,忽然畀人推一推撞,我就成個人跌咗落地下,而雙眼嘅視線亦都開始變得模糊不清,只係聽到好微弱嘅聲音徘徊喺耳邊。

「表哥!」

「阿星!」

係兩把截然不同嘅聲音⋯⋯

我係咪已經要上天堂⋯⋯