[找數][外傳]「空白的五年」: 重來

記憶並未隨住時間既推移而恢復。

但起碼比起岩岩出院個陣好左，我最近多左好多閃過既畫面。

D畫面好多都係只係一瞬間，而且幾乎每個都係唔同地方。

不過零舍有一個地方係重覆出現左幾次，好似係一個公園黎。

我相信果一個公園對我呢幾年應該好重要，但我無辦法再記起更多，每次想記起更多個頭就會痛。

啊，我真係好無用。

但佢仍然肯留係我身邊。

Cherry：「點呀你？出黎食早餐啦。

」

我：「嗯…而家出黎。」

最近都係咁，佢一直都陪住我。

雖然之前係自己提出個好任性既要求，但我無諗過實行上黎係會咁尷尬…

我居然要同一個女神級既女仔一齊生活，仲要平時自己同佢無乜兩句…

佢仲要好體貼咁照顧我，真係有少少唔好意思。

我真係要快D記番起D野先得，唔係既話終有一日會尷尬死。

「今日，不如同我出去行下？」

佢係我食緊早餐果陣咁講，嚇左我一跳，D蛋幾乎係個鼻到噴左出黎。

好似真係第一次有女仔約我出街，呀，唔係，呢幾年都應該有既，係我唔記得左啫。

我故作冷靜，用個好平靜既語氣應佢。

我：「嗯，無所謂吖，出去行下都好。」

無錯，我係講真既，出去行下都好，呢幾日我都係留係屋企，出去轉兩個圏可能可以記番D野。

Cherry：「嗯，咁你食完早餐抖陣就換衫啦，我有好多地方想同你去。」

我：「了解。」

佢聽到我話好之後好似好開心，成個人好好笑容咁走入佢間房。

佢都應該好辛苦架啦…我居然係呢D時候先唔記得哂同佢之間既事…

所以，而家就陪下佢啦…

過多一陣，我就開始換衫，我揀左件背心加件裇衫當外套咁著。

換好衫之後，我下意識咁摸一摸自己條頸，好似少咁D野咁。

嘛，由佢啦，應該唔係D乜重要野黎既。

不過今日係星期日，周圍都會好多人，佢想同我去邊？

唔知點解我唔敢問佢，可能我仲係覺得好尷尬啦。

佢帶住我去坐巴士，係平時返學校既巴士。

我：「eh..我地要返學校？」

我始終都忍唔住問。

Cherry：「Bingo，真係聰明。」

睇黎佢係想帶我去學校，睇下可唔可以刺激到我D記憶。

佢真係用心良苦，居然肯為我做咁多野。

坐左一陣巴士，係我幾乎訓著果陣就到左，我烏下烏下咁落車，幾乎仆街。

Cherry：「小心D吖傻佬。」

我：「唔該。」

佢好快反應咁扶一扶我，令我好窩心。

我好似開始鐘意左佢。

落左車之後我地兩個好快咁行到學校，嘩好似好多野唔同左咁。

我：「哈哈…同我印象中好似唔同左咁既..」

Cherry：「外表睇落唔同左啫，但有D野係唔會變架，我地入去啦。」

我知佢呢句説話另有意思，我知道。

我拖慢腳步，慢慢咁參觀六年後既學校。

好多野都變左，學生會室靚左，小食部唔同左，連樓梯間D牆都唔同左色。

Cherry：「你仲記唔記得自己係幾樓上堂？」

我：「梗係記得啦，C班係四樓嘛。