[找數][外傳]「空白的五年」: 混亂

所有野都黎得好突然。 

一覺訓醒，我居然變左23歳。 

我係咪穿越左去未來？應該唔係吖，呢D野只會出現係電視劇入面架。 

唯一合理既解釋係我失左憶，再無其他合理既講法。 

不過居然話女神Cherry係我女朋友，仲話我地就黎結婚，真係識開玩笑。 



有乜可能吖呢D事，我同佢可以話係兩個世界既人。 

肯定係晨哥趁我暈左呢段時間夾計整蠱我啫。 

大家都鐘意攞我呢D死毒撚開玩笑。 

我之後就跟左美星返屋企，哇個八婆居然有架車。 

但手車認真麻麻，直頭好似開頭加賀揸「凰呀」咁，嚇到我呢。 



咦…「凰呀」..？ 

我好似有D印象…同一個情景我以前好似經歷過… 

屌，個頭又開始痛。師父好撚痛呀！！！  

但呢D野唔止出現左一次咁少，我返到屋企門口個陣又黎。 

有個畫面突然係我腦入面閃過。 



係一個短頭髮既女仔帶住兩個喼坐係我門口。 

啊，真係麻煩，係咪呢段時間都會係咁啊屌？ 

不過返到屋企感覺真好，起碼仲係一個熟悉既環境。 

我一下就撻落張梳化，嘩都係屋企好。 

咦，屋企都有好似有D野唔同左咁，嘛話哂都過左六年，唔同左少少都好正常啫。 

美星：「細佬，認真答我，你真係對Cherry一D印象都無？」

美星突然好認真咁問我，認真到我嚇左一嚇。 

我：「屌，真係唔記得吖八婆，對佢既印象咪就係全級公認既女神囉。我連你幾時返左香港都唔記得吖。」 



美星：「屌，偏偏係呢個時候先黎唔記得，你真係無撚用。」 

我：「屌，你估我想架咩，我仲係度懷疑緊你地係咪夾埋玩我添呀，明明我同佢平時都無兩句，居然話我地會結婚？」 

美星：「唉，你睇下自己銀包。」 

銀包？我知我窮，你都唔洗叫我睇架。 

但我發現原來係另一回事，美星叫我睇銀包原來另有含意。 

銀包入面有張即影即有既相，係我同Cherry既合照。 

張相入面既我居然會著suit，真係不可思議。 



更不可思議既係，我係相入面居然攬住佢條腰，好似好close咁。 

我究竟同佢… 

我開始掩住自己塊臉，合上眼，嘗試去記返起D野。 

好多好零碎，好糢糊既野係我腦入面閃過，但我無辦法將佢好好咁組合起黎。 

「記事簿」 

呢三個字突然彈左出黎。 

我好似係大海中搵到燈塔咁，有左一個方向。 

我行入自己房，開始起勢咁搵一本藍色既記事簿。 



搵左十分鐘左右，幾乎反轉左成間房，我終於搵到佢。 

本記事簿保存得好好，用一個透明既封套入住左。 

我好心急咁拆開佢，好想快D睇到入面究竟寫左D乜。 

我唔知入面有乜，但我就覺得呢本野對而家既我好重要好有用。 

我好快咁睇完本野，之後對天花版長嘆左一下。 

「魯路修你真係好醒目。」 

我忍唔住要讚下當年既自己，居然可以預計到會有呢一日。 



本野記錄低好多有關Cherry既野，好似鐘意咩顏色之類。 

不過呢D都唔重要，如果無篇前言，呢本野可以當係一個跟蹤狂既記錄。 

因為篇前言，我認清楚左一樣野。 

佢係我女朋友，呢個係事實，當年我仲好愛佢。 

但同時我亦開始非常自責，我居然會唔記得左一個我曾經咁愛既人。 

「曾經」呢個字用得岩唔岩呢？我唔知我早幾日仲係咪愛佢添。 

不過晨哥話過我同Cherry就快結婚喎，咁我應該仲係愛佢既。 

啊屌，仲係好混亂吖屌，好想記起哂呢六年既野，咁我應該可以無咁辛苦。 

突然，我聽到出面有開門聲，好似有人黎左。 

我打開少少度門，見到原來係Cherry黎左，仲同美星講緊野。 

仆街！ 

我唔小心俾D雜物kick一kick，成個人衝左出廳，俾佢兩個望住。 

屌真係柒到想搵窿捐… 

哎！死就死啦！ 

我：「對唔住，我好無用。」

Cherry：「吓..？」 

佢好似俾我呢個突如其來既道歉嚇親。 

我：「我唔記得左呢幾年既事，好對唔住，但有件事我已經搞清楚，你係我女朋友，我係愛你既。」 

Cherry：「lulu…」 

我：「雖然咁樣好似有少少強人所難…但你可唔可以繼續陪住而家呢個我，直至我記返起所有野？」 

我唔敢望住佢講吖，呢D野邊好意思，我只敢望住個地板講。 

咦，無反應既？ 

我發現我前面突然有個影，我忍唔住抬起頭望下咩事，發現原來佢企左係我前面不足一米。 

「當然可以啦，就算最後你都記唔起呢幾年既事都好，我都會係你身邊，因為…」 

「我想要你，仲有你既世界。」 

佢講完就上前攬住左我，攬到好實。 

「我想要你，仲有你既世界。」 

呢句野… 

我而家成個人好混亂，個頭突然間又痛，但個心又出奇地暖… 

我身體不由自主咁郁起上黎，攬住眼前呢個女仔。 

抱歉… 

眼淚都突然流出來，我都唔知點解。 

可能，因為我潛意識入面記得自己好愛佢掛。