[找數][外傳]「空白的五年」: 告白

「黎學校後山個公園搵我吖，我係果度等你。」 

同肥豬Jason佢地傾傾下計突然收到個whatsapp，係Cherry send過黎。 

後山？又想搞咩呢佢？ 

我望一望個天，嘩就黎日落，行上去既話應該會好熱。 

不如打個電話比佢叫佢返落黎？我唔係幾想行上去。 



「你而家應該有個地方要去？ 」 

晨哥突然拍左我背一下，嚇到我幾乎跌左個電話落地。 

最近唔知做咩好易嚇親，可能係因為處於一個陌生既環境？ 

我：「eh…好似係吖。 」 

晨哥：「咁你就去啦，唔洗理我地。」 



我：「不過…」 

一聽到「不過」兩個字，晨哥突然入左認真mode，望到我實一實。 

大佬而家我又唔係差你錢或者殺左你全家，唔洗啤到我實一實既，去咪去囉。 

就係咁，我就同佢地講左聲再見，離開左學校。 

「啊，真係好熱…快D上去接佢返屋企算…」 



我企係學校門口，望住去公園既路係度自言自語。 

我點都無諗過，呢段咁短既路程會令我咁辛苦。 

真係好辛苦，我好想放棄。 

唔知點解，行到半路中途，我個頭突然好痛，痛到就快裂開咁。 

種痛楚係前所未有過既，比起呢次頭痛，之前全部都不值一提。 

個腦不停閃過好多唔同既影像，全部都係係呢條路，只係天色唔同，而且影像入面我有時身邊有個人。 

果個人係一個女性，係每段有佢既影像入面佢都好似同我講緊野。 

但係我記唔起佢講乜，甚至連佢個樣都好糢糊。 



睇黎我去緊既地方應該係呢幾年對我好重要…個腦無間斷咁閃過呢度附近既野…  

我咬緊牙關，慢慢一步一步咁向前推進，經過二萬五千里既長征之後，我終於到達公園。 

我無留意自己用左幾多時間先行到上黎，但我到果陣已經可以見到黃昏。 

黃昏..？ 

個腦又開始閃過幾段黃昏既畫面。 

我忍唔住掩住自己額頭，坐係公園長櫈上面休息。 

行上黎既呢段路體力消耗唔算大，但精神上既消耗就大得誇張，成個人都已經無乜力剩。 



佢係邊呢..？又叫我黎搵佢，而家又唔見人。 

唔理了，休息一陣先再搵佢，我而家真係無哂力。 

「好遲喎你。」 

正當我岩岩合埋眼，我就聽到佢把聲。

我放低隻手，開始四圍咁望，試下搵佢，但周圍都唔見佢。 

我深呼吸左一下，企左起身，準備開始搵佢。 

個公園唔算好大，但都有幾個設施，係耍盲雞既好地方。 

好奇怪，我一黎就行過去同我距離最遠既韆鞦，好似有種魔力吸我過去咁。 



果然我係黎過呢度… 

因為我係韆鞦度見到佢。 

佢坐左係鞦韆上面，仲換左衫，換左校服。 

我幾乎無辦法直視佢，因為太陽係正佢後面，我只好用隻手擋住陽光。 

其實我都唔知眼前呢個人係咪Cherry，但從身形上判斷，都應該係佢架啦。 

「咁快就搵到我既？我仲以為你會係公園轉幾個圈先添。」 

係佢啦。 



我一確定左眼前既人係佢之後就放低左隻手，望住眼前呢個無啦啦換番校服既女仔。 

我：「我都唔知吖..可能係因為直覺，又可能因為我潛意識記得掛..」 

Cherry：「咁就好啦，咁就已經夠喇..」 

佢對住我笑，一個令人好窩心既笑容。 

咦..？ 

個腦突然浮現左一個同而家近乎一樣既畫面。 

但係今次，我個頭無痛。 

唔通我… 

Cherry：「魯路修。」 

Cherry叫我個名，令我既注意力重新返去佢身上。 

我：「吓？」 

「我想要你，仲有你既世界。」 

「佢之後會錫我左邊臉。」 

我個腦突然彈左呢句野出黎。 

咦..？左邊臉？我記得？ 

但Cherry無咁做，而係再繼續講。 

Cherry：「所以，返黎啦，好唔好？」 

佢講完先錫我，仲要唔係錫左邊臉，而係錫嘴。 

突然，個腦被一大波記憶既洪流衝擊，令我成個人都呆左一呆。 

呢一刻，時間好似停滯左咁，唔係，係直頭好似playback返去六年前咁。 

我諗，我記得返了。 

好多野都記得返了，去海洋公園，倒數，聖誕節之類之類… 

Cherry再一次既表白，威力居然咁厲害，勁過催眠。 

果然，我係你架，Cherry。