又到左第二日 

今日到我唔洗番學 

晏晝大約兩點左右M係MSN震我 

 :我而家係學校,陪緊B上堂,呢堂根本就唔關我事,我只係陪佢 

 :咁點呀? 



 :我想走都走唔到,因為個個都好專心 

 :仲有一件事,本來我琴晚都想搵你,但係太夜我怕嘈醒你 

 :咩事呀? 

 :原來幾日前B送左個女仔番屋企,而家個女仔就坐係幾行隔離,B係咁同個女仔用唇語溝通,我都唔知我係咪有虐待病,咁都可以忍受 

 :你係咁架啦 



 :我知這不是我想要的,可能我先係佢地之間既第三者,可能我諗多左啦,但係我真係想終止呢段不知所謂既關係 

 :你邊會忍心呀 

 :我由第一日識佢開始我就飾演一個好人,太好人,呢一切慢慢變成習慣 

 :咁你而家諗住點? 

 :佢而家扮唔識我咁,我坐係度只會影衰佢,我陣間一定走,費事獻世,我覺得忍夠 



 :咁你打算點做? 

 :我想講分手,但係我會唔開心,我會唔想番學,我會嚇親媽咪… 

 :咁你諗住痛一段時間定係繼續委屈落去? 

 :長痛不如短痛? 

 :係掛,但係你都唔會聽我講架啦,你自己衡量下 



我以為過一陣就冇事,但係直至果晚…





夜晚八點左右收到M既電話 

原來佢同佢媽咪有少少誤會,冇番到屋企 

黎左我屋企樓下搵我 

於是我就走左落去陪佢 

傾傾下,B打比M 

佢兩個就開始嘈交 

嘈嘈下,M嗌左句 



 :夠喇,我地分手啦! 

跟手就Cut左佢線,跟住就攬住我嗌 

 :我講左啦大鋼砲!我終於講左出口喇! 

我就不斷安撫佢 

跟住就係M既媽咪打黎 

M傾緊既時候有B既電話入 

但係M冇理,傾傾下仲隊左個電話比我叫我同佢媽咪講 

最後兩母女都總算和好 



收線之後收到B既SMS寫住 

「你連我最後既耐性都用埋,我諗我地以後連朋友都冇得做喇」 

M睇到之後大喊 

 :我唔想咁樣呀! 

跟住係咁打比B,但係B一直唔聽電話 

打左十幾次終於通喇,M就叫我行開等佢傾完 

一等就等左佢一個鐘 



傾完之後就送佢番屋企,將佢交番比佢媽咪



兩日後我地約好左去睇舞台劇 

睇睇下,M無端端撩我玩,對我摸頭摸頸咁 

我見佢兩日前先失戀,咁樣好似唔係咁好 

於是我話 

 :唔好咁啦,我又唔係你男朋友 

佢聽到我咁講,望一望我,默默咁點一點頭 

呢下點頭既意思就彷彿講:「原來你係咁諗既」,跟住開口話 

 :你記住你講既野呀大鋼砲,我以後都唔會掂你 

見佢咁既反應,我個心又離左一離,我係咪又講錯野? 

跟住我不斷咁同佢道歉解釋 

 :對唔住呀我唔係咁既意思呀 

 :得架喇我明架喇 

直到完場後去搭地鐵都唔係咁愉快,開始有D說話 

 :之前仲話點鍾意我,又話叫我比D時間你,又叫我等下,點知… 

 :話左我本身係鍾意你,我係迫不得已,你覺得我係MEGABOX講大話既話你咪當我呃你囉 

 :… 

跟住佢用一副好寸既嘴臉同我講 

 :係喇你咪當我呃你囉,咁叻你咪去搵過第二個囉  

聽到佢咁講我真係好唔開心 

雖然愛情呢家野唔係有付出就有回報 

但係佢始終點都有專登令我花左好多心機時間係佢身上 

而家佢一句「你咪搵過第二個囉」就算 

咁算點先? 



又或者係我太過執迷不悟掛…



第二日 

就已經又有朋友同我講 

琴日見到M同B拖住手行街 

我朋友話應該M都見到佢 

聽到咁樣我個心慨嘆左一聲 

我朋友話M知道比我朋友見到之後個樣好驚 

我自己都唔知當時係乜野感覺 

失望?妒忌?傷心?定係其實我已經乜野感覺都冇哂? 



今日番到學校 

M就問我 

 :你有冇朋友話你知見到我呀? 

 :有…咁又點呀? 

 :每次比你知道我同B一齊既時候我個心都會好唔舒服,我好怕你會唔開心 

 :超!有乜所謂 (我個心已經好唔舒服,但係除左咁講我唔知點回應佢)