之後果一兩日 

我一直比M既事困擾住 

我覺得我同佢既關係好似越黎越遠 

雖然我唔清楚我地既關係到底係乜野 

亦都唔清楚M對我既感覺到底係點樣 



但係我感覺到我同M之間既感情似乎就黎去到終結 

回想一下過去既半年,M改變左我好多 

同佢一齊經過既事都好奇妙 

所以我想將我同佢既故事記錄低 

於是我選擇左高登呢個平台 





2月25號 

我開左一個名為「毒撚與女神的六個月」既Post 

諗住錄我地既故事 

但係過左兩個星期都仲係「本文共有0個回應」 



於是係3月10號 

我開左一個名為「原來…由始至終我都只係一隻觀.音.兵」既Post 

點知比人推到手動置頂 

當我打到個故事既一半 (即係聖誔節果Part) 既時候我頂唔住諗住去訓 

突然電話響起,我認得呢個係B既電話 

我好奇怪,點解無端端會打比我? 

按「接聽」… 

B = 





 :喂,有冇時間傾下 

 :咩事? 

 :我有朋友同我講,佢係網上面睇到一個Post,佢同我講個內容好似係講緊我,我岩岩睇過果個Post,我想問你係咪你寫架? 

 :係 (呢一刻我個心好慌,連B既朋友都知道埋?!) 

 :我想問你打個篇野入面D野係咪真架? 





我好驚,我好驚連B既朋友都知道既情況下會傳到通哂天,我好怕M會比人唱係姣婆之類既野,我唔想有任何人受到傷害,於是我話 



 :其實入面只係得一兩成係真,呢個故只係我貪玩打出黎,甜野果D唔洗講更加一定係假,係高登仔要求我先夾硬加上去 

 :嘿,我都估到,邊有可能係真丫,如果係真既話,條女都唔抵可憐,咁究竟你同M係乜野關係? 

 :我同M當然只係純綷朋友關係啦,咁你而家仲有咩問題? 

 :我只係想知道成個情況姐,你寫呢篇野既目的係乜野? 

 :其實我只係貪玩,入面寫既野都係假既,咁我應承多你兩樣野,我以後都唔再騷擾你同M,同埋我唔會再繼續寫篇文,咁得未? 

 :我唔係咁既意思,我地做朋友OK冇問題喎 



 :好,但係可唔可以應承我一樣野,就係呢件事得你知同我知,你亦都同你個朋友講果個Post梗本唔係講緊我同你同M,因為我唔想比M知道,我唔想佢受到傷害 

 :冇問題 



收線之後,我好驚,我手震、心跳 

連B既朋友都知道,我好驚D人會傳下傳下傳到M既耳仔度 

M以前都已經試過比人周圍唱係姣婆之類既野 

如果比佢知道佢係網上面比人咁鬧法佢一定會崩潰





我好後悔,我好後悔打左篇故 

雖然我唔確定M係咪真係當我係兵 

但係我未至於要去唱衰佢 

打呢篇故既最大原因只係我想記錄低呢個故事 



我唔敢再繼續打篇故 

即使當時我老母已經比高登仔屌到反皮 

呢個亦都係當時我潛左水成個星期既原因 



而我怕B知道左我知道佢迷姦M既事 

B會對M不利 



所以我速速開一個新POST草草作左一個假既結局同高登仔交代 

果時已經有高登仔睇得出我越打越假 

但係我冇辦法,我好怕B會對M做D乜野



到左第二朝,我同M本身約左今日出去影相玩 

但係我記得我應承左B話唔會再接觸M 

幾經掙扎之後我好仆街咁冇兌現到承諾 

依現出左去,但係我同自己講 

「呢次只係之前有約在先,呢次係最後一次,我唔會再騷擾佢地」 



於是我地係南生圍玩左一日,走果時我係地鐵同M講 

 :M,可能會有一日你會覺得我係一個賤人 

因為打左篇咁既故,如果M因為咁而受到傷害既話我一定原諒唔到自己 

 :傻既,點會有咁既可能 



最後我地各自番屋企 

我好驚,我好驚我篇故會比朋友起底 

我好驚M會比人唱八婆、姣婆之類既野 

我訓唔著,我唔敢番學,我唔敢面對M 

因為如果佢發生咩事 

佢受既傷害係我一手一腳做出黎 

我不斷責備自己



跟住落黎既一個星期 

因為功課關係,我地始終都係要見面 

但係佢同以前唔同左,講野奇怪左好多 

成日同我講「唔該哂你,麻煩哂你」 

又會話「你唔洗對我咁好喎,我唔係想利用你呀」 

甚至連影印既五毛都計番比我 



我覺得一定有D唔妥,可能係B講左啲野比M知 



直至去到3月20日…



我地果經日約左番去做功課 

做到一半我地諗住休息一陣 

M竟然叫我去麥當勞食野 

 :我有D野想同你講 

食到一半 

 :我咩心事都同你講,但係我估唔到你會出買我 

 :…出賣你? 

 :又唔可以話出賣既,但係…我估唔到你連每一句說話都記得咁清楚 

 :你知道左喇? 

 :係,你開Post第二晚佢就搵我,佢將你個故Print左出黎,再用螢光筆Highlight哂,然後逐樣問我故事裡面D野係唔係真 

 :…(B又話應承我唔會同M講,真係一D口齒都冇) 

 :點解你要咁做? 

 :我純粹係想將呢個咁特別既故事記錄低,我冇諗過班高登仔會咁大反應… 

 :原來係咁 

 :你唔覺得我咁做好賤格咩? 

 :覺得呀,我本來以為你係特登想係網上面唱衰我,但係而家知道你既目的唔係咁樣,我就冇怪你啦 

 :但係你係網上面比人咁鬧法,我自己覺得我冇面目再面對你 

 :你唔洗咁喎,呢D小事啦,冇事啦 

 :… 

 :我冇嬲你喇,你依然係我最信任既人 



雖然係咁講 

但係我始終過唔到自己果關 

跟住落黎果兩個星期 

M又變番好似以前咁活潑咁想撩我玩 

但我覺得我已經做得好錯,我唔想再傷害M 

所以我除左上堂同功課之外都冇乜主動同M交流 



直到3月28日…