【夢幻】《我從來冇諗過我會有咁正既女朋友》: May姐

我約左志威放左工起尖沙咀一間樓上bar到見面，基本上果到係我地既約親必去既「老地方」！   

今日返到公司好快手咁做哂手頭上既工作，交埋份報價單比老闆，一放工就準時閃人！  

 我放工之後立刻坐的士去尖沙咀揾志威，一上到樓已經見到志威嗌左幾枝啤酒。

 志威見到我好熱情地同我打招呼： 「你個衰仔啊！做咩呢排冇搵我啊？識左新女啊？屌你啊！有女都唔同我講聲 ！」  

志威一輪嘴講哂佢想講既野先肯停低比我出聲！   



「志威我想問你一個問題，你諗清楚先好答我」！佢見我一面認真既態度都由本身好輕挑而變到開始認真起黎！

  「我之前發生過一場車禍你重記唔記得？」 

 「緊係記得啦！果日醫院冇啦啦打黎話你入左廠！嚇撚到我仆街啊！我咪即刻趕過去囉！去到你已經入到急症室！之後重入埋ICU，真係好驚你就咁死撚左啊屌！」 

  「我未撞車昏迷之前，有冇同你提起過我身邊呢排有冇識左咩人？同埋有冇咩特別事發生左？」  

「下！醫生明明話你冇撞到失憶架！你唔拿係有咩後遺症下話！唔好嚇我喎死仔！」



  「唔係啊！我咩事都冇！你答左我先啦！我有冇同你提起身邊既人啊！」我繼續追問志威！  

「冇喎真係！講真你身邊最好既朋友都係我架姐！平時約你你都冇話咩唔得閒啊咁！咪好似平時一樣囉！你最多都係得閒屌下你個老闆咁！冇咩轉變喎你！」志威好認真咁回答我既問題。  

聽完志威咁講，我開始懷疑自己既猜測係錯誤！

因為佢係我身邊最親近既人，我相信如果佢冇察覺到我有任何既轉變，咁即係代表我既生活都好正常！  

志威打斷左我既沉思「發生咩事姐你！要唔要天日同你去仁安check下個腦啊？」



  「唔洗啦！我真係冇事！講咁多做咩姐！飲啦仆街仔！」  我拎起手上枝啤酒同志威乾杯，佢亦都好識做冇問落去！

果一晚我地飲左好多好多酒！

可能係我呢排真係太攰太多野思考，我的想用酒精黎麻醉自己！

  到我清醒返既時候已經係凌晨時份，我訓左起屋企張床到！我冇驚訝，因為估到係個死仔搵人送左我返屋企！  

我亦冇再諗咁多，還掂天日day off 我都係繼續訓教。     

一起身既時候已經係夜晚，落街食個飯再返屋企打陣機hea下咁就渡過左一日！ 


 今日一如既往準時返到公司，之前咪提過下我間蚊型公司重有一兩個未結婚既“中女”既 ，其中一個佢叫阿May !  



佢今日就好似食左屎咁罕有地同我好熱情咁打招呼！

  打招呼都只係前奏，原來佢今日真正目的係想同我講佢“終於”嫁得出！   

「成仔啊！我扣埋之前儲落既假期，今日係我last day啦！ 因為我要結婚啦！唉！我老公佢唔想我返工咁辛苦索性叫我辭職唔好做喎！」我唔明點解佢要同我哂命..  

「係啊！恭喜晒你啊！」真心係恭喜佢嫁得出唔洗做「剩女」

  「多謝你！重有呢我介紹左我表妹入黎做啊！佢同你一樣大都係22歲！你同佢差唔多年紀，應該會比較岩傾。記得比面我有咩就幫下佢啦！」原來呢個先係佢最真真正正既目的！  


「好啦！我會架啦！祝你新婚快樂！」幫下佢？點幫？連我自己都係起食物鏈最底層啊！求其應左佢就算撚數！