【夢幻】《我從來冇諗過我會有咁正既女朋友》: 主動出擊
唔遲唔早時間岩岩好！今日既我好熱情咁同其他同事講早晨，平時我只會點頭微笑下就算。
佢地都禮貌上同我講返聲早晨，但點解佢地冇留意到我今日既打扮有咩轉變既！
我咁講係因為佢地既眼神冇停留起我身上多過二秒！ 呢件已經算係我既戰衣黎！
我去親重要場合都係著住呢套衫！我都係第一次咁著返工架炸！
一件恤衫再襯條黑色牛仔褲加埋對運動鞋！乜唔型咩而家！ 平時我都只係會着件T返工架炸屌！
會唔會係因為我平時「毒」既形象已經太深入民心，所以就算我著咩佢地都唔覺有任何轉變呢...唔撚係掛！
腦海裡不禁起浮現一句說話.... 「你一日係毒撚，一世都係毒撚！」
當我腦海裡不斷有把聲同我講「你一日係毒撚，一世都係毒撚 ！」既時候...
「成仔早晨啊！今日著得咁醒神既！」係敏兒把聲啊！佢讚我著得型啊！
無錯！醒神即係chok啦！chok就即係型啦！ 「係咩！其實同平時都係差唔多姐！」我笑哂口咁回答，心入面就暗爽緊！
敏兒覺得我既反應好搞笑，所以佢都笑埋一份！ 絕對係一個好既開始！我氹到敏兒開心咁笑，我自己心情亦都好好！
見到自己鍾意既人笑，自己都會好自然咁笑埋一份！
原來當你鍾意一個人既時候，佢既喜怒哀樂都會轉變成為你既心情！
同敏兒一齊工作既時間過得特別快，得閒偷望下佢，佢亦會問我 關於工作上既問題，我當然好樂意解答啦！
所以我地都相處得好好。 原來佢咁索都只係拍過一次拖!
佢之前既男朋友係做金融，一聽 到之後我已經覺得好自悲。
因為我只係一個office boy… 但佢同我講分開既原因係想搵一個專一錫佢同重視佢既人！
佢係一個唔重視物質既人亦都唔在乎乜野社會地位。 又有幾多對情侶可以做到「金錢同愛」唔掛鉤？
我竟然起現今工作既社會搵到一個只希望一段關係入面，單純有愛已經足夠既女仔！
可能你會話佢只係未認清社會狀況，咁樣諗真係好天真。
我唔知將來佢接獨既野多左諗法會唔會有所改變！我淨係知道呢一刻既佢特別吸引！
有一次佢冇返工，但我事前並冇聽敏兒提起過今日會請假一日，返到公司見唔到佢諗住whatsapp關心一下佢！睇下佢因為咩原因而冇返到公司啦！
Whatsapp最後上線時間係夜晚十點，我發左個訊息比佢 「做咩偷懶唔返工啊！」加一個傷心表情 之後就開始做我自己既工作！
去到晏就放lunch佢都未覆我既訊息！ 平時放lunch多數都係同敏兒一齊食！
起其他同事心目中我地已經係好熟落既關係。又或者係已經超越左同事同朋友之間既一種關係！
我決定打電話比敏兒!
嘟嘟嘟... 嘟嘟嘟...嘟嘟嘟 …嘟嘟嘟 冇人聽電話！
我決定再打多一次！都重係冇人聽！我開始有啲擔心敏兒！
嘟嘟嘟... 嘟嘟嘟.. 「喂！」我冇聽錯係有人接聽左電話，但點解敏兒把聲會咁既！
聲線完全不在狀態，好似好辛苦咁！
「我係仲成啊！你係咪病左啊？點解把聲會咁既？」我好心急地問左一連串既問題！果一刻既我真係好擔心！
「係啊....我成身都發熱...我應該係發緊燒！」敏兒把聲比較低沉，混有雜聲同強烈呼吸聲，聽得出佢好辛苦。
「你休息下，我而家即刻上黎你屋企！」我同老闆講左聲有急事要做，後補請假紙就即刻沖左落樓下的士站搭的士！
同敏兒識左一段時間我已經知道佢屋企住起邊，敏先住起沙田既一個私人屋院！
之前入職既時候佢填左自己既工作地址所以我知道佢住幾多樓！ 我一落車就即刻沖上去搵敏兒！
我從來未試過咁緊張一個女仔！
去到門口，我再㩒門鐘同大嗌左聲 「敏兒！我係仲成啊！開門啊！」我好焦急地一邊㩒門鐘一邊拍對門 過左一分鐘之後我聽到開門聲！
眼前既敏兒軟弱無力，一面病容。 佢開左門之後我抱返佢落床到訓，再用手背感受佢額頭既體溫 。
嘩！佢個額頭真係好㷫！一定要帶佢落去睇醫生！
我再用手腎抱起敏兒，落去佢屋企樓下既診所睇醫生！ 好好彩地好快就見到醫生！
醫生話敏兒只係普通感冒同發燒，食左退燒藥再休息返兩至三日就會康復！叫我唔洗咁擔心！
可能岩岩我入到醫生房既時候表露出非常焦急既神情，所以醫生都睇得出我好緊張！
我聽到醫生咁講個心先淡定返，心跳既頻率亦都回落返！
之後果兩日我放左工都有去煮野比佢食，敏兒都有講過唔洗麻煩我，佢自己可以叫外賣。
但我都堅持要咁做！ 「成仔！多謝你既照顧！」敏兒好充心咁答謝我 可能當你鍾意一個人既時候，並唔會介意自己付出多少！
只要當佢有事既時候可以陪起佢身邊，就已經足夠！
而經過呢件事之後同埋透過對佢逐少逐少既了解，我地之間漸漸地建立更加深厚既關係！
咁咪即係都係朋友？你比人friend zone 左都唔知炸傻仔！鍾意人就快啲去馬啦！到時比人溝左你唔好起道喊苦喊忽啊！
無錯！呢一番說話係出自我既死黨志威口中！
果日約左佢出黎行街同佢講左敏兒既事，佢聽完之後就即刻叫我主動出擊！
「你講到佢咁正又點會唔多人溝啊！你而家慢慢黎又話咩順其自然到時你真係入左friend zone我睇你重會唔會咁講！」志威好激動咁講，比我更加肉緊！
不過我同志威由中學識到而家都係第一次同佢講我有鍾意既女仔，佢應該係太登我開心先會愈講愈激動！
佢真係我一個好好既兄弟！我識到佢係我既福氣！
所以我都決定左主動出擊，就係約敏兒放工睇戲加食飯！
其實我都係第一次約女仔睇戲，所以都唔知睇咩好。
志威同我講睇愛情加笑片實冇死！ 好！一於咁話！還掂我唔信佢我都唔知可以信邊個架啦！
果排有套台灣校園愛情同埋以青春懷舊為題材既大熱電影上畫！
冇錯，就係「我的少女時代」！