【夢幻】《我從來冇諗過我會有咁正既女朋友》: 仲成的自白
敏兒返左成日工都應該好攰架喇！當敏兒送我出門口既時候，錫左我一啖...係蜻蜓點水既一吻
「今日見你特登黎接我放工又煮野比我食就緊係要比個goodbye kiss 獎勵一下你架啦！」敏兒拖住我雙手再用好sweet既語氣講出呢句說話
每一次敏兒錫我，都總係會有一種心跳加快既感覺...
就算我地拍左幾個月拖都重會有呢一種感覺...
我諗...應該係初戀既味道...
唔知有冇人同我一樣都係獅子座架呢？
前果排咁岩上網見到「十二星座初戀的味道有何不同」呢個post ，咁咪入去睇下囉！點知有幾句真係完全中哂！
「獅子座的感情向來滾燙而熱烈，對他們來說，青春里的第一次悸動、第一次告白、第一次牽手，都在柔軟的心上烙下了不可磨滅的印記，初戀的節奏是簡單明快的。」
點解可以準到咁架！！！！！
平時我都唔係好迷信星座呢啲野，但呢幾句真係完全表達哂我呢幾個月黎既心情！
同完敏兒道別之後，我就走左去搭車揾志威喇！
我諗唔洗同大家講都知我地約地邊到等架啦！
我發覺每次約自己兄弟見面都係約起老地方等，呢個先係真正既「男人的浪漫」！
我話咁快就已經到左酒吧門口，一打開門就已經見到志威嗌定左成打啤酒等我！
「死仔！你終於捨得黎喇咩！」我一入到去志威就搭哂我膊頭咁樣
「Sorry大佬！係我唔岩！我自隊一枝先！」每次見到志威都有一種好放鬆自在既感覺！
「係喎！上個星期六敏兒冇啦啦一聽到話去踩單車就咁激動，佢而家冇野啦嘛？我見你之後都冇call我，我都費事打電話問你啦！諗住等過多幾日約你出黎見到面先再傾！」志威用關心既語氣問敏兒呢排既情況
我諗志威應該係呢個世界上最了解我既人...
佢知道好多野我都係鍾意當面約出黎講！
所以我都將敏兒曾經發生過既痛苦經歷同左志威講...
「我真係估唔到平時見敏兒成日笑面迎人原來佢背後有一個咁悲慘既過去....
重有好明顯佢重未放得開成件事啦...佢話佢呢一世都唔會再踩單車喎！咁就即係話佢個心入面都重有一個好大既心理陰影啦！」當志威知道左成件事之後都同我當時既諗法同感受一樣....
「係…所以我好想幫佢走左呢個心理陰影...」原來我同志威吹水期間，已經不自覺地飲左五枝啤酒，而家手上呢枝係第六枝。
可能係因為我覺得自己好無用...見到敏兒果日喊得咁痛心但我乜野都做唔到...
我連想講安慰佢既說話都唔識開口...我腦海不禁回想起當日既情景...
「志威..其實...有樣野...我想同你講左好耐...但我一直都冇開口 …
其實.....我未認識敏兒之前起夢中已經見過佢架喇...
你記唔記得幾個月之前我有同你提起過我起夢中入面成日都夢到一個女仔...
你當時重以為其實我係想叫你介紹女比我識，但其實果時我唔係亂吹架！
我真係起夢中夢到果個同敏兒一樣樣既女仔，之後先再認識到敏兒架！」
我將我埋藏左起心入面好耐既問題講哂出黎...
而我唯一可以將自己心入面既疑惑同人講出黎既人...
就只有志威一個人...
「阿成，你係咪醉左啊！先第六枝炸喎！」志威覺得我係似醉左起道鳩噏...
「志威！你聽我講！我而家真係好撚清醒！我係太過清醒先會好似而家咁辛苦炸！」我用好憔悴既眼神望住志威講
有人話酒精係會令到人神志不清，但我認為酒精可以令人更加清醒同大膽講出心入面最真實既想法。 「仲成！你係咪記錯左炸..有咩可能你起夢入面見過佢，之後又會識佢架...呢啲真係做戲先有...你當你自己真係因為果一次撞車有左預見未來既特異功能咩...」
我知道好難令志威完全明白我所講既說話，志威佢唔係唔相信我，佢只係覺得可能係我搞錯左。
因為始終成件事實在太匪夷所思，加上又唔係發生起佢身上，就算係志威佢咁同我講我都未必會完全信哂佢啦...
「你問心果句，你識我咁耐我有冇試過同你講同一件事講左成兩次啊！重要兩次都係用咁認真既態度啊！」
我雙眼望實志威，用好肯定冇搞錯既強硬語氣同佢講。
「仲成….做左咁多年兄弟我都係第一次見你咁執着一件事…平時你份人從來都唔鍾意同人爭論，乜野都是是但但。
但今次既你真係好唔同...
我相信你講既說話係真..但你可唔可以一五一十同我講清楚到底成件事係點...」志威用好認真既眼神望住我講，示意我可以開始講成件事情既發展...
我將由頭到尾發生既事同左志威講....
佢聽完之後成個人呆左一陣...
跟住第一句開口講既說話就係...
「你唔撚係真係因為果次撞車而預見到未來會發生既事下話...」志威用好驚訝既表情望住我講...
「我都唔知...但我唔希望會係咁...因為起夢入面既敏兒腫瘤係有擴大既跡象...佢亦都唔可以做手術切除左個腫瘤。
亦都即係話...佢會好大機會昏迷同死...
重有撞車之後我昏迷緊既期間，係我第一次起夢中見到敏兒..
起夢中既我係由醫院探望完敏兒喊住出黎...
如果我真係可以預見到未來發生咩事....
咁咪即係代表最後敏兒會起醫院入面昏迷不醒...
我唔想咁...我真係唔想咁...
但夢中既敏兒同現實中既敏兒比我既感覺真係好唔同，我地之間經歷過既事都好唔一樣...
我而家真係好亂...我都唔知點解會變成咁...」
我情緒開始有所激動，激動到喊左出黎...我識左志威咁多年都係第一次起佢面前喊...
我有講過我覺得喊係軟弱既表現...所以我從來都唔會比自己咁容易流眼淚....
但每次當我諗返起果一個夢，我就會好容易雙眼通紅，啲眼淚就會不自覺地由我眼框滴落黎...
「仲成…你聽我講..唔好諗咁多先...
敏兒咁健康加上醫生咪講左佢復發機會好微囉...
我爸爸都識得好多物理學專家...
我唔知呢樣事情會唔會係同物理學有所關聯...
我可以幫你聯絡佢地！
如果你所講既說話係正真的話，我相信佢地都會有興趣去研究。所以你唔洗擔心咁多，我一有咩新消息就會即刻通知你。」
「志威...好多謝你...」我喊住咁答謝志威，我相信酒精係會令人將本身既情緒放大再釋發出黎..
「做兄弟既野唔洗多講！我相信你所講既說話係真！你放心啦！你係我黃志威呢一世人最好既朋友，我一定會幫你！」
當我可以將收埋左起心裡面好多既疑問都講哂出黎既時候...
我成個人都放鬆左...之後我只係同志威瘋狂隊酒....
我亦都冇再喊...因為我知道而家唔係應該喊既時候！
就係咁...我同志威就結束左呢一個對話...
好快我亦都訓着左....
點解我會入黎左西貢既...我見到前面有好大個牌寫住「西貢郊野公園」....
最奇怪既係...旁邊好多人都準備左天文望遠鏡，全部睇落都好似好專業咁...
「仲成，你估我地會唔會見到流星雨啊？今日係「英仙座流星雨」，我咁大個女都未睇過流星雨架！我真係好希望可以見到啊！」無錯...坐起我旁邊既正正就係敏兒....敏兒用一個滿懷希望既眼神向我講出呢句說話
經過之前咁多次既經驗，今次既我並冇再感到驚訝。
反而呢一刻既我比較想了解下「夢中」既敏兒係一個點樣既女仔...
「我相信我地一定會見到既！」我用充滿信心既語氣回應敏兒
「仲成啊！可唔可以拎你支結他出黎玩下啊?」敏兒望一望我旁邊既一枝結他，如果唔係佢講起，我都唔知原來係有一枝結他擺左起我隔離。
「好啊！」我打開左個袋再小心翼翼拎枝結他出黎..
「你中學既時候已經話會教我彈結他架喇！但到而家中學畢業出埋黎社會工作你都未教我彈啊！」敏兒用一個唔知好嬲定好笑既態度同我講...
「好啊！還掂而家重咁早，天文台都話凌晨時間先會出現流星雨，我而家就教你彈啊！」我拖住敏兒隻手打算帶佢去少人
啲既地方
「真係架！好啊！」敏兒佢好開心咁望住我笑，就好似完成左一個好大既願望咁
我地最後搵左個比較少人既地方坐低...
我再抬頭望一望個天..
今晚個天空真係好靚，我亦都好清晰咁望到布滿繁星既星空。
「你想我教你彈咩歌啊！」我靜靜地凝望着敏兒，等待佢既回覆。
「我冇所謂啊！就彈一首形容到你呢一刻心情既歌啦！」
形容到我呢一刻心情既歌.....
我腦海裡面自動浮現左一首歌既旋律... 就係.....
真‧側田 - 美麗之最
手 願意捐給你拓著頭
做你的安枕剛好足夠
望你的天真可以永久
眼 看你半世還未夠
喜歡你的眉頭 哪怕皺起始終清秀
在某天 未發展 在某間咖啡店
尚記起坐你後面
習慣守望半天 望你從來都溫暖
想一生看下去 還會等一天八十歲
看你髮端灰色的點綴 未來只有樂趣
和你去拖手看新居 雙眼開始像飲醉
尤如觀星 你在這裡
我的雙眼裡 尋找到宇宙之最
https://www.youtube.com/watch?v=UJrL0d0u9Rg
我自彈自唱加上情深款款既眼神望住眼前既敏兒唱出每一句既歌詞....
歌詞裏邊每一字一句都講出咗我心中既想法...
「尤如觀星 你在這裡
我的雙眼裡 尋找到宇宙之最」
呢兩句歌詞亦係我揀唱呢首歌既重點原因...
當我唱緊呢首歌送比「敏兒」聽既時候，我已經冇再諗究竟佢係咪現實中嘅敏兒...
而家呢一刻既我，只係想將內心既感受變換成一首歌曲，送比眼前呢一位敏兒。
當我唱完成首歌既時候，敏兒用佢雙手抱緊我...
同我講左一句令我好深刻既說話....
「仲成，我希望你可以永遠將我埋藏起你心中。」
當敏兒攬住我既一刻，我感覺到佢骨感既體態同瘦削既身材，但最令我真正感受到既係...
敏兒既愛同溫暖...
敏兒既體溫同屬於佢既味道....
我唔識去用文字去形容呢一種「暖暖的」感覺....
敏兒慢慢放開雙手，同我講話... 「我都係決定唔學喇！以後有你彈比我聽咪得囉！你彈得咁好又唱歌咁好聽...」敏兒改變左佢既主意...話以後都有我彈比佢聽...所以佢自己唔洗學喇...
「好啊…你想幾時聽我都一定會彈比你聽架...」我好自然咁從口中講出呢句說話再用一個真誠既眼神望住敏兒
「我地快啲返去頭先睇流星雨既最佳觀賞位置啦！而家已經係凌晨時分喇！我相信好快就會睇到流星雨架喇！」敏兒用佢冰凍而柔軟既手拖住我行...
「而家開始愈黎愈多人喇！好期待一陣見到流星雨啊！唔知會唔會太快閃過而許唔到願望呢....不過應該唔會既...天文台話預測到今晚會有大量流星雨架嘛！」
雖然呢一刻既我係有一下差啲衝口而出想講...「你唔係連天文台講既野都會信下話」....
但望住眼前既敏兒好開心咁訓左起道望住個天空傻笑...我又點忍心咁樣黎打擊佢呢！所以我都講左句...
「我都相信我地一定會見到流星雨架！」不過我心入面都當然好想睇到流星雨啦...因為我唔想見到敏兒失望既樣.... 點解永遠咁小既事都可以令到敏兒咁滿足既...
或者呢種就係佢獨有既性格啦...
過左一陣...空中上有數十粒流星出現，好似「火花」一樣好快起天空中滑過。
「仲成！係流星啊！我地快啲向住流星許願啦！」敏兒好興奮雀躍咁起我旁邊不停拍我
我聽到敏兒咁講之後，都有合埋雙眼向住半空中既流星許願...
許左一個我好希望可以實現到既願望...
流星好快咁起空中略過...消失於半空之中...
「仲成！你岩岩許左咩願望啊！」我睇得出敏兒好期待我向佢講出答案...
但係我只係笑住咁回應左佢一句...
「乜你冇聽過人地講許左既願望如果講左出黎就唔靈架咩！」
「係喎！岩岩太興奮完全唔記得左！咁你千祈唔好講出黎啊！咁難得先見到流星雨，唔係嘥左個願望佢啊嘛！」敏兒天真地說道
其實我既願望咪又係關於敏兒....
我希望無論將來會發生咩事都好，只要敏兒佢可以開開心心咁生活落去我就心滿意足架喇....
雖然流星並沒有太陽般的燦爛、月亮般的皎潔，亦冇恆星般的永恆不變....
但流星既美係來自起一瞬間的光華....
就好似而家既我地一樣....
「慶幸曾經這麼簡單過 ，至少你跟我。」
點解我會冇啦啦咁辛苦既....塊面點解會咁熱既...
「好頭痛啊…」我個頭痛到令我忍唔住大叫左一聲...
「仲成…你做咩事啊？係咪好辛苦啊…我去拎條毛巾比你敷住先啦...點解你飲到咁醉架...」我隱約聽到敏兒把聲
「乖啦仲成..你唔好周身郁啦...比我幫你抹下個身等你可以舒服啲啦....」我感覺到有啲好「濕粒粒」既野痴住我個身
「唔得喇...我好想嘔啊…」
「你唔好嘔住...我去拎膠袋比你..」之前我就聽到跑步聲...
但係真係唔得喇....我真係忍唔住...最後我都係向住個地下嘔左出黎...
「膠袋啊…你嘔起到啦...」敏兒佢遞左一個膠袋比我...
「嘔完有冇舒服啲啊…」我感覺到敏兒佢幫我掃緊背脊
「嗯...我想飲水...」嘔完之後真係舒服左好多...但我好口渴好想飲水...
「你等等我而家拎比你...」之後又再聽到好急趕既腳步聲...
「乖喇...起身飲完杯水食粒藥再訓過啦...」敏兒佢扶左我起身..之後再餵我飲水同食藥...
「可以訓返低喇...你訓教啦...」敏兒佢幫我蓋住張被又比個枕頭我等我可以訓得舒服啲...
我好快就再次訓着左....但分別就係...今次我冇再發到任何既夢...一教訓到天光...