【夢幻】《我從來冇諗過我會有咁正既女朋友》: 洋蔥
我地去左旺角西洋菜南街...
起呢條街到，我好快就留意到之前起夢中見到用個頭頂住勁多碗既阿伯起道表演緊！
我停低左起條街道上，望住個伯伯表演。
敏兒見我突然之間停低左就問我：「仲成，你做咩事冇啦啦停左起到既？」
「冇野啊！我地繼續行啦！你諗好想食咩未啊！」其實我係諗返起，起夢入面我都有同敏兒行過呢一條街...
但唔知點解...就算係同一條街...睇緊同一個表演...起我旁邊都係同一個人...但比我既感覺就好似發生緊兩件唔同既事情一樣...
我地最後去左旺角既沙嗲王食晚飯，呢個決定係由敏兒提出！
因為敏兒佢知我好鍾意打機，所以主動提出話想去食沙嗲王今期既主題餐！！
今期沙嗲王既主題餐就係....
街霸既新作《STREET FIGHTER V》！！
敏兒真係一個好細心既女朋友...
成餐飯我都食得好開心同好滿足！！
起食飯既期間我特登提起話不如搵日去敏兒公司接佢放工，之後再一齊去買餸返屋企一齊煮飯食！
敏兒諗都冇諗就應承左我，即係佢完全唔介意比人知我就係佢男朋友啦！
其實今日撞到果個「側田」既時候，我都有諗過敏兒係因為當時我企起佢隔離，逼於無奈底下先介紹我係佢男朋友....
我唔知點解會咁諗敏兒....
當我岩岩問搵日去佢公司接佢放工好唔好，佢兩話不說就應承左果一刻....
我真係對自己感到羞愧...
明明岩岩起摩天輪上高既我地已經認定左大家係真愛，係會想一齊走下去既伴侶....
過左一日都冇...我又已經開始懷疑岩岩發生既情景又係咪真實...
人地話當你鍾意一個人既時候用個心係會感受到...我絕對感受到我係真心愛敏兒....
可能因為呢排真係發生左太多事...搞到我個人都有啲精神分裂..
起夢中既我係同敏兒好開心踩緊單車一齊欣賞長州既景色..
但起現實中既我一提起踩單車，敏兒就攬住我好傷心咁喊....
我成個人都好亂....我決定逼自己唔好再諗咁多！
而家最緊要做既事就係幫敏兒走出埋藏左起佢內心好耐既「陰暗面」。
過左兩日之後，我放工既時候就打算搭車去敏兒公司接佢收工啦！
我事前特登唔同敏兒講會去佢公司接佢放工，因為諗住比個驚喜佢啊嘛！
但當我行緊去佢公司門口既時候，就見到敏兒準備由佢公司行緊出黎喇！
正當我諗住嗌敏兒既時候，我見到敏兒旁邊有個男人同佢一齊由公司裡面行緊出黎！
因為而家企緊我呢個角度望唔到個男人係咩樣！但當佢一轉身既時候...我好清楚見到佢既「衰樣」...
無錯...呢個人就係果舊「側田」！
當我見到係果條「煩膠」又企起敏兒隔離有講有笑既時候，咁就緊係即刻行快兩步啦！
首先我發出一個比較有震撼性既聲線去叫住敏兒
「仲成！點解你會起到既！」敏兒一見到我就緊係即刻行埋黎我身邊啦！
「你幾時黎左架！」敏兒佢再用一個好驚喜既語氣問我幾時黎左
「冇啊！都係岩岩先到！諗住比個驚喜你啊嘛！」無錯！起呢個時候我就緊係拖住敏兒隻手宣示主權架啦！
如果我唔咁做的話果條Justin實當我毒撚好恰，擺明車馬明知敏兒有男朋友都重要照溝佢！
話口未完，條攝青鬼已經攝到埋黎！
三日之內見到佢「第三次」已經係會想忍唔住同佢講「get the fuck off 」！
但佢永遠起敏兒面前都硬係要扮到好有禮貌，好似懶係教養咁撚樣。
我真係好想知道如果敏兒呢一刻唔起到佢會點樣西口西面！
「Hey ! Good to see you again！」我唔知點解佢每次見到我都要Hey我！
不過我最想講既係..你Hey我好喇！唔好Hey我條女！
「係囉！」我都費撚事彩佢...只要一見到佢成日好似隻狗咁跟住敏兒我就好燥底
「What are you going to do tonight ? 」我心諗... It’s none of your business !
不過佢既然咁問都係一件好事黎！
因為我打算同佢講...
「我同敏兒打算而家去supermarket買餸返屋企煮飯食！」我擺到明係想同佢講唔好阻住哂我同敏兒返屋企兩人世界啦！
佢聽到之後即刻面無笑容！果下我個心不知幾爽！
「Where do you live ? 要唔要我順路車埋你地啊！」我屌你啦！有車大哂啊！我坐果架都幾百萬啦咩啊！地鐵真係要幾百萬一架架喎！
「唔洗啦！我地行先喇！拜拜！」我轉個靚身，連眼尾都冇望下佢就拖左敏兒走！
但係我發覺呢條友既面皮真係厚過我屋企塊主力牆，真係無人能及！
點解我會咁講？因為當我拖位敏兒掉頭去既時候...
「敏兒啊！你今日問我既questions我今晚再whatsapp explain比你聽啦！！Is that okay ? 」佢竟然以工作為理由黎接觸敏兒！實在太過分喇！明明已經放左工點解重要contact啊！ 你地話條hihi係咪離哂大嫂先！
當我心中不段咒罵緊佢既時候...
「好啊！冇問題！唔該哂你！聽日見啦！拜拜！」唉....敏兒真係....
我見敏兒應佢，咁好自然地我都會再望一望佢架啦！點知比我見到佢好得戚既眼神...
其實條友係咪真係心理變態....明明佢見住我拖實敏兒，佢都可以擺出一個勝利者既姿態望住我...
我真係笑佢on9都費事....早啲同敏兒返屋企玩「煮飯仔」好過！
我地去左supermarket買今晚晚餐既材料！我知道敏兒最好鍾意食肉醬意粉，咁岩我又好鍾意食！好味得黎又簡單易整！所以肉醬意粉真係冇得輸！
當我地起supermarket行緊既時候感覺就好似老夫都妻一齊行緊一樣！
我都好想第日同敏兒再帶住兩個小朋友一齊去買餸啊…
我相信「這些機會是屬於我的」！！！
自從同敏兒表白成功左之後，我開始會慢慢搵下自己既優點！
雖然真係諗左勁耐先諗得一兩個，就我都起碼叫慢慢開始學識欣賞自己啊！ 果兩個優點就係....唔怕蝕底同細心.....
大家比下面求其扮下野認同下我啦..我真係諗左好耐先諗得出呢兩個優點架炸....
其他重潛在緊既優點就緊係留返比敏兒慢慢發掘架啦！
我地話咁快就買完要用既食材之後就返左敏兒屋企喇！
之前都同大家提起過敏兒住起沙田既一個私人屋院架啦！
間屋係起佢細個既時候已經買落，所以有佢好多小時候既回憶...
我相信呢個亦其中一個過左咁多年敏兒都唔肯嘗試去踩單車嘅原因....
敏兒間屋都幾整齊，主要都係以白色為主。比到人一種好舒服既感覺。
相比起我間房就真係...冇得比...所以我都費事講我屋企係點樣喇...我諗唔洗講你地都會ff到架啦！
可能你地又會想知點解我地兩個都自己一個人住會唔同居咁奇..
原因好簡單..我地兩個都習慣左自己一個人住，加上拍拖既時間又唔係話好長，所以都係打算遲啲先再決定！
你問我想唔想同敏兒同居？
如果你係我有敏兒咁樣既女朋友，你地又想唔想呢？
我就緊係唔洗問都個好想啦！習慣呢啲野其實都可以改架姐....
我又搵到我一個優點喇！！
就係我既適應能力好強，所以改變一個人住既習慣一啲都唔難！
重要同敏兒一齊住喎！最唔習慣應該就係一起身唔係見到自己頭都亂哂既「褦襶」樣...
而係一起身就見到猶如「跌落凡間的天使」既敏兒！
不過最後我都係會尊重返敏兒既決定既....始終呢個係我地兩個人之間既決定！
都係講返敏兒先啦！
一入到去敏兒已經換返起屋企着既家居服，敏兒佢着住一件白色既連身恤衫，真係好有「賢良淑德」feel啊！！
我發覺敏兒真係好鍾意着白色衫，白色比人一種好純潔既感覺。
我真心覺得呢隻顏色真係好適合敏兒！
比埋圖你地都應該會完全明白點解我會用「賢良淑德」呢四個字黎形容敏兒啦！
「仲成啊！你可唔可以去切左個洋蔥去啊！」敏兒一邊講一邊準備緊煲水
「好啊！冇問題！」呢個會令人「流淚」既洋蔥就交比我啦！等我黎征服佢啦！
當我切緊洋蔥既時候，好自然地眼淚就開始流落黎...
更加因為咁樣而令到我既視線開始有所濛糊....
起呢一瞬間...我個腦海裡面冇啦啦出現左一個畫面....
點解會係出現呢一個畫面既...
點解我會起一間K房入面唱緊K既....
而起我旁邊既...就係拎住枝咪唱緊歌既敏兒...
聽佢唱緊果首歌既旋律...正正就係
楊宗緯 - [ 洋蔥 ]
如果你願意一層一層
一層的剝開我的心
你會發現 你會訝異
你是我最壓抑最深處的秘密
如果你願意一層一層
一層的剝開我的心
你會鼻酸 你會流淚
只要你能聽到我看到我的全心全意
https://www.youtube.com/watch?v=bAf9zKF3b6I
呢首歌既意思應該係因為女主角總係盡力掩飾自己既感情，一層一層的偽裝下先係佢真正既心意...
所以用洋蔥一層層黎比喻 ….
係一種令人憐憫既聲線...
敏兒點解會唱呢首歌唱得咁有感情同哀怨既感覺呢...
仲成…你做咩呆左啊? 」敏兒從我後面拍一拍我
「敏兒...我想問你鍾唔鍾意唱K架？」我用好奇既表情問敏兒
「麻麻地啦...因為我覺得自己唱歌又唔係話好好聽，所以平時都好少去, 除非有朋友生日叫到我先會去。做咩冇啦啦咁問既？」敏兒用一面天真既表情回答我既提問。
「冇野啊…咁你如果去唱K會鍾意唱咩style既歌架？」我繼續追問落去...
「嗯...冇咩話特別鍾意唱咩歌架喎！不過如果一定要揀，我諗應該係輕快啲既歌，我最唔鍾意就係唱埋啲慘情既歌架喇...因為我份人係比較容易受身邊發生既野影響，如果唱啲好sad既歌有時都會搞到自己唔係幾開心。」敏兒諗左一諗就回答左我既問題
最唔鍾意就係唱埋啲慘情既歌....
咁岩岩我腦入面閃過..唱緊一首sad到爆既洋蔥果個敏兒又係邊個黎...
呢一次係我第一次唔起夢中入面見到「敏兒」...
「你咁問係唔係想去唱K啊？」敏兒應該係以為我想去唱K先問佢呢堆問題...
「唔係啊！我都好少去唱K ! 」無錯...我好少去唱k係真...
但如果你地問我，我有咩長處，我相信會係彈結他加唱歌既自彈自唱。
不過已經係一兩年前既事，我亦都冇再玩結他好耐...
所以都冇同敏兒提起過我識彈結他..不過都好既，如果遲啲有咩特別節日咪可以彈結他比佢聽囉！比個驚喜佢都好啊！
「你切好哂啲洋蔥同蒜頭未啊！我想拎去炒啊！」敏兒佢知道左我咁問唔係因為想去唱k之後都好快就轉左其他話題。
「我搞掂哂喇！而家拎過黎比你啊！」我亦都冇再諗岩岩果件事，雖然成件事真係好奇怪..
大佬！我又點會諗到自己切切下洋蔥冇啦啦腦海閃過左敏兒真係唱緊「洋蔥」先得架...
我打算將呢件事同志威講..
因為我想問下佢熱戀中既男仔，係咪做乜都會ff起自己女朋友..
即係好似「暏物思人」咁呢！
搞左好耐我同敏兒最後都好成功咁炮製出一個「超好食」既肉醬意粉！
係咪想問下點解明明整個咁簡單快捷既肉醬意粉都要搞咁耐呢！
因為起煮野食既期間，我同敏兒掛住起道打情罵俏關係，所以整左好耐
我成日都將啲醬汁「hi」落敏兒塊面到...敏兒又會報復整返我，我又再還擊，佢又再加倍奉還...
所以就係起不停係咁loop既情況底下...我地兩個都完全唔記得左我地係煮緊野食喇！
不過情趣呢啲野你地識條鐵咩！
我地最後將意粉上碟，再放左兩個蠟燭 ，營造一個「燭光晚餐」既氣氛！
亦都係我人生最有情調既一餐晚飯！因為你冇理由自己起屋企頹食緊公仔麵既時候放兩舊蠟燭起枱面架嘛！
唔知真係會以為有人死咗你係度悼念緊佢...所以都係我咁大個仔第一次既「燭光晚餐」既！
成程個氣氛都好好，低調得黎又帶點浪漫。
所以我亦都好享受呢一種感覺。
食完晚飯我同敏兒一齊洗碗！我平時真係最憎洗碗，但唔知點解同敏兒一齊洗碗我又唔會話唔鍾意喎！
所以好多時候，重點係你同咩人一齊做咩事。
但如果只係得我一個既話平時食公仔麵就一定會用返個一個「煲」黎食！
一來又洗少左一樣野，二來又環保啲唔洗浪費咁多水喎！
你地都知啦！我地香港人飲緊既水大多數都係由大陸既東江「恩賜」比我地架嘛！
點解我會冇啦啦咁講？
因為我重好記得上年既一場中港足球比賽賽前睇facebook見到生果日報有個post 寫住 「內地網民：港隊不放水，就閘東江水。」
果下我真係著撚左...我心諗係就快啦！我地又唔洗再飲鉛水，睇下香港每年比左幾多錢買啲重金屬東江水！重要衰到年年加價！
對唔住...又扯遠左少少！講返同敏兒洗碗先...
當我同敏兒洗洗下碗就收到志威whatsapp問我今日出唔出黎飲野！
話時話呢排又真係少左見志威...我知你地實屌我重色輕友架啦！
不過如果你地既女朋友係「敏兒」，我諗你地都會好難選擇啦係咪先！
但今次我絕對冇重色輕友！因為岩岩發生左「洋蔥」事件，所以搞到我成個人都有少少心不在焉，加上我都想同志威傾下呢排發生左既事！
我好快就覆左志威whatsapp話晏啲出去搵去！
我同敏兒洗完碗坐低睇左一陣電視我就準備離開。