【夢幻】《我從來冇諗過我會有咁正既女朋友》: 後記－ 作者自白
【後記】
無錯...
我選擇左起呢個位到完結個故事...
五月一號係我第一日「post文」。
「香港迪士尼樂園」作為仲成第一次見到敏兒既開始，
所以最後尾我都選擇左起「香港迪士尼樂園」做完結。
漫淇同仲成講過...
如果想返去本身屬於佢既「平行時空」，就要起二月二十九日再「撞多一次車」或者玩多次「飛越太空山」。但呢個只係
漫淇既「猜測」！無人知道會唔會係咪真....
最後呢幾篇，仲成因為見到眼前有一架車向住敏兒前方駛進
情急之下仲成用本能反應推開左敏兒
所以仲成佢係撞左車....
而最後果一篇...當係敏兒問佢： 「你重停起到做咩啊！快啲入去玩啦 ！我好想玩飛越太空山啊！」
呢一句對白兩個唔同「平行時空」既敏兒
都有起「迪士尼樂園」講過呢一句說話。
所以...
最後…我選擇唔交代...「仲成」到底有冇返到去原本屬於自己既「平行時空」
留返比讀者去思考...
因為無論「仲成」有冇返去原本屬於自己既「平行時空」，都係傷害左其中一個敏兒。
如果真係要明確表明仲成「有返」定「冇返」屬於自己既「平行時空」，
咁樣呢個既結局就係「交代哂」所有一切事情。
讀者會覺得係happy end 定 sad end 呢？
我知道..一定唔會個個人都鍾意呢一個ending...
但我想講...就算「仲成」真係返左去屬於自己既「平行時空」，都唔代表起醫院昏迷緊既敏兒會醒架。
而家比讀者有返自己幻想既空間..咁樣唔係重好咩？
由一開始構思呢一個故事，我已經係決定唔交代哂全部。
講完故事部分，就開始講下我自己個人感受...
首先最緊要係好多謝各位讀者既支持！作為第一次起高登寫故既新手，有人支持，有人留名，有人正評，對我黎講已經係
一種好大既鼓勵！
如果故事個ending令你地覺得好失望，我想起到同大家講聲..「對唔住」
另外有一樣野都要起呢到想同大家再次講聲....
對唔住...
其實我係一個十七歲讀緊中學既女仔黎！我唔知有冇讀者會發現到呢！
雖然我一直都冇承認自己係男仔，但我的而且確係誤導左讀者！
我想寫呢篇故既原因係因為想起十八歲之前做啲我一直都好想做但冇去做既事！
高登寫文係其中一樣，亦都係最想做既一樣！
另一個原因就係我好鐘意睇一位高登作者既故
佢就係....墨說！
我諗大家對墨說巴打既實力都毋庸置疑啦！所以我都好想試下自己起高登出文係一種咩既感覺....
順帶一提，新版《我被陽光照耀的日子》出左實體書喇！我已經叫朋友幫我買左本架啦！
利申真係非打手！！！
重有起呢道我好想多謝呢一位朋友。
其實我而家係起外國讀緊中學，所以同香港係有七個鐘時差。
星期一至星期五多數都係呢一位朋友幫我出文！
但如果係晏就同11:00pm就係我自己出文！
呢兩日既結局篇都係我自己出返，因為好重要所以唔想假手於人。
喂！你知我係講緊你！多謝你冇嫌我成日煩住哂，幫我出左文咁耐！感激不盡！放心啦！唔會係食新廣發lol
雖然當我好興奮咁你講「我而定同啲讀者好似friend左好多」既時候..
你覆返我話..「其實好多都唔frd架！因為人地果啲太多讀者，係得你先咁有時間慢慢同啲讀者係咁吹水囉！」 真係sad but
true，當你見到我咁打既時候唔洗感到驚訝！因為我係好記仇既人黎！
講笑姐，真心好多謝你！
但之後佢都有再補返一句話：「讀者同朋友一樣，唔需要多 但求真心！」
識左你咁耐都未聽過你講啲咁有意思同內涵既說話lol
如果冇呢位朋友既「出心又出力」支持，我未必會完到個ending！放心啦！講左唔會起你底啊！
一直冇公開我係女仔既身份最主要原因係因為我係用李仲成第一身去寫呢一篇文！所以我都想令到讀者投入到去個角色
到！
其實用男仔身份寫一篇文，最困難既事就係...
我要點去形容敏兒呢個角色有幾咁吸引！
要一個女仔去形容返一個女仔幾吸引，對我黎講真係一件非常之困難既事情。
每次去形容敏兒我都會花好多時間去修改，因為我想令到成件事變得更加真實。
同志威既對話我亦花左不少心血去構思，就算係講粗口都盡量會令到自己寫得比較男性化！其實我都好難想像打出黎又真係好男仔feel ！
其實睇返我篇文又真係唔似出自一個女仔手筆，可能只要我一開始打文就會連自己都投入左李仲成既角色！
我真人同仲成既性格係完全相反，我自己係唔鍾意打機同毒起屋企。
但有一樣野係相似...就係我做咩都好容易放棄，成日都半途而廢...
所以今次呢篇故可以話係我17年黎，最認真去做既一件事。
所以我係好重視呢篇故！雖然頭個一個星期，好多時候出完文F5既時候，都係得好少人留名。
老實講， 我曾經有一次「真係」有諗過棄故算。
當時既我係緊發悔氣咁諗..
但當我見到有一位由一開始就支持我既讀者同我講左一句說話..
「你必需出盡全力，才顯得毫不費力。」我希望你知道我係講緊你啦..
我想講好多謝你，亦都係你呢一句說話令到我當然冇放棄，一直堅持落去直到今日既大結局。
我亦都冇太多既工作經驗，所以講男主角關於職場上工作既時候，我都係比較困難去描述！所以成個故事都只係講佢係一個office boy！
我知道自己既文筆真係有待改變，好多者各位讀者由五月一號開始追文追到而家！ 有幾個讀者成日留言我係會特別深刻！真係好多謝你地！如果冇左你地成日留名支持我...可能我真係會愈作愈頹....有機會
頹到作完自己都唔敢睇返！
一開始出文既時候，我發覺自己回應讀者真係太過客氣。
可能係因為我第一次起高登寫文比較緊張，唔想有任何既失言！
走左外國讀者呢兩年期間，我冇再作過文！因為平時都係起中學中文堂先會作，純粹係為左交「功課」，兩年後既今日呢個故事係我一次再寫文。
亦都係我人生，最多字既一篇文！應該有接近7萬字...
平時做功課都係幾百字寫完就算
對我黎講...係好多架喇..
重有我成日打錯字唔係因為我中文差，係因為我「眼殘」lol
希望大家唔好怪我...我會改下架喇！ 下個星期會有一個final exam , 完左exam六月頭會返香港放暑假。所以暑假呢段期間有機會再寫文！但我唔肯定會唔會用返
「皇帝企鵝」呢個名！
如果第日真係用其他名出文，好希望會有人估到我就係「皇帝企鵝」啦！
其實我都有自己既特色架...
就係瘋狂打錯字haha
最我post左最後一篇文既時候，真係興奮到大叫左一聲！
最後最後...我真係好多謝好多謝好多謝好多謝好多謝好多謝好多謝好多謝
一直支持我既讀者
大家都對我非常之友善
開頭重好擔心係咁比人「插」我文筆差..打5p字
冇你地支持 係唔會有今日呢個ending
=16px好老土都要講句....我地後會有期