等你: 一、前言

『走嗱？』老闆娘用親切嘅笑容問我。
『係呀。』我勉強咁笑一笑。
今日係5月2號，識我嘅人都知我呢日係唔會笑，但係對住出糧比我嘅老闆娘，點都要笑下。我笑唔出嘅原因係：呢日，係佢離開我嘅日子。
自己一個返屋企，望住街燈，有一種孤獨嘅感覺冒上心頭，眼淚不自覺咁流落黎。見到喺身邊走過嘅情侶好甜蜜咁拍拖，睇住佢地你餵我，我餵你，不禁會諗起我同佢以前嘅日子。以前，我地都好似佢地咁，中意餵對方食野，覺得咁樣，啲野食特別好味。
話咁快翻到屋企，乜都冇做，連鞋都冇除，就跳咗上張床度，一路喊，一路喊，喊到我都唔知自己幾時瞓著咗。
我個生理時鐘不嬲好準，唔洗較鬧鐘都識自己起身返工。我起身刷完牙，就著住琴日嘅服裝返工。
我啲同事，甚至係老闆娘都慣咗我5月3號嘅果個會嚇走哂啲客嘅死人樣，因為今年已經係第五年。我係喺糖果店度打工嘅，一個月都有萬五蚊落袋，起碼夠我起居飲食。舖頭黎咗個新人，係有嚴重公主病嘅港女，好典型果種。平時成日比我同另一個員工鬧，成日撞板，重要獲獲新鮮獲獲甘果隻。
『你做咩冇換衫？』公主病患者用佢果對戴咗大眼仔嘅死人眼望住我。
『關你叉事呀？』我背住佢反咗下白眼。
『話我知啦~~』佢……嗲我呀？


『唔洗做呀？』我一路打冷震一路話。
『你咪話佢知囉。』喺度蛇王緊嘅另一個員工，柏浩，叫道。
『頂！』我冇理佢兩個。
『咁，等我話你知啦！』八公柏浩打算話佢知。頂，咁姐係迫我寫姐……