等你: 二、相識

呢個故事，要由我中一講起。
佢係我嘅暗戀對象，睿光。佢係一個典型嘅陽光型男孩，咩運動都啱佢，足球、籃球、排球、棒球、手球、閃避球、考固球、高爾夫球都係佢嘅強項，仲要全部都係校隊，精通各樣運動嘅佢，讀書都掂嫁，每次考試都有全級頭十，科學仲次次考第一添。
由中一開始，佢身邊已經有無數個女仔圍住喺佢身邊，仲要全部都係班花。樣貌一啲都唔出眾嘅我又點可能埋到佢身吖？不過我好好彩，喺第二個學段嘅時候，竟然因為一件事而同佢做到朋友。
話說，我不嬲喺班上都係比較靜嘅，食飯都係自己一個。而佢？比夠十圍佢都唔夠坐。無啦啦有一日，隔離班班八婆竟然喺飯堂鬧交。
『喂？你有冇自私啲呀？我平時成日請你食野，你比隻雞翼我食都唔得？』八婆A。
『今日呀媽煮咗一隻比我咋！』八婆B。
『妖你兩個都好煩喎，比咗我算啦！』八婆C。
『都話唔得咯！』八婆B。
重重覆覆，重覆又重覆，都係為咗隻雞翼。
我係一個比較靜嘅人，同時亦比較中意靜，所以果一刻，我要爆喇！


『頂！！！收聲啦！！！』我用盡全力大叫。我好肯定呢一下，全個飯堂嘅人都聽到，包括睿光。
我勁嬲咁拉翻好張櫈坐好，果一刻，我靜係聽到我拉櫈嘅聲，其他乜都聽唔到。我感覺到全部人都喺度望住我。我擺咗個好cool嘅表情出黎，繼續食飯，仲要拓埋頭。開始隱約咁聽到：『好型呀……』，『佢咩班架？』，『我想溝佢呀……』
好型咁食完飯之後，有人喺後面拍我膊頭。
『你好呀！我叫曹睿光呀！你咩班架？』
『我……同你同一班架……』
『係咩？Sorry 呀。咁你係？』
『我叫梁筱螢。』
我同男神，就咁就friend咗。