封鎖區《Blockade Area》: chapter 16:反擊
係Edmomd同我地講解完所有推測之後,佢同會長已經plan好左今晚嘅行動計劃
而依家我地所有人都集合係副翼2樓嘅活動室內,只有少數D班嘅學生同阿奇都冇出席到今次嘅會議
我地眼前嘅黑板畫滿左天台和5樓嘅平片圖以及唔同嘅行動路線圖,而此時Edmond係地圖上畫了幾筆「好...首先係由冰耀嘅第一先鋒小隊,由於天台嘅樓梯都被人封死哂,所以你地只能夠從禮堂旁邊嘅爬梯上去...同時佩備呢d由木枱拆件再重組而成嘅盾牌攻上去...」
肥ken亦企起身補充多幾句「呢d木盾嘅表層同中間都加左塊鋼板係度,所以係可以擋得到狙擊槍嘅攻擊,而且佢用嘅係巴雷特狙擊步槍,只有十發子彈的」
會長接著繼續說落去「所以我地只能夠係佢換彈匣嘅期間,由良生嘅第二突襲小隊負責突擊,而且要注意嘅係敵人肯定未必只係得一把槍,所以絕對唔可以掉以輕心...」
「係!」我同冰耀都不約而同咁回應會長
「其後就係小寧嘅第三支援小隊,你地負責運送傷者以及物資...當然我都已經唔想再有任何人受傷或者d咩唔好彩....」
的確我地失去嘅同學已經唔多...不安嘅情緒,恐懼感,猜疑心等等都日漸咁侵蝕我地嘅心,有唔少同學選擇輕生...
「呯!」的一聲,會長起勁咁拍左黑板一下「長時間被捱打嘅日子已經過去啦,係時候由我地親自連本帶利還返晒比班仆街啦！！」
「嘩~一直守規守矩嘅會長終於講粗口啦喎」
「關你鬼事咩良生...唔好打斷我講野」
然後會長深呼吸了一口氣繼續說道「係時候比佢地見識一下,我地丰耀官中學生永不言敗嘅精神啦！！！！」
「啊！！！！！」然後我們全部人都舉起拳頭一同對着會長歡呼咆哮着
「May the force be with us...」接著我們所有人都無啦啦中二病病發,一齊學star wars咁講出經典嘅金句
正當所有人都散去回到課室作準備嘅時候,Edmond叫停左我同冰耀,只剩下我們以及會長四個人留低左係活動室裡面,而會長係門外檢查完外面沒有人之後便把門關上「叫停你地兩個唔好意思,但有件事係必須要比你地兩個知道...」
我看到會長嘅表情變得凝重之後,便確定接下來嘅話題係不可告人嘅真相「究竟係咩事要留低我地兩個小隊隊長?」
「係關於今晚嘅行動...事實上,頭先所交換嘅並唔係全部內容,而依家我要向兩位講清講楚...」
平日滿臉笑容嘅冰耀都收起了笑容認真起來「究竟係咩事?」
Edmond托了一下眼鏡框後,神情凝重的望着我們「首先係...我要同你地講一聲對唔住,因為我知道我所做嘅事根本係唔值得任何人原諒....係今晚,我地將會以犧牲冰耀嘅第一小隊黎換取勝利嘅局面...」
係說話講完嘅個一刻,我依然係表現唔出任何反應起來
我望向左邊嘅冰耀,他仍然是非常冷靜咁聆聽着「繼續講落去...」
「我同會長計算過...的確今次嘅敵人比我地想像中棘手好多,始終佢並沒有任何嘅行動限制,所以唔排除佢會逃跑去其他樓層度...所以冰耀你地必須死守係上天台嘅唯一通道度...」
「Edmond你咁講係咩意思?!我地唔係講好左兩隊一齊進攻嘅咩吓!!?」
話未說完冰耀拍左我膊頭一下「你冷靜d先良生,比佢繼續講埋落去」
「天台上嘅通風排氣管同四樓嘅chem lab係連埋一齊,所以我地會係你地衝上去之前排放定煤氣上去,然後就由冰耀你負責去引發呢場爆炸.....由你地嘅肉身塞死唯一嘅通道!」
「姐係話,呢個盾只係用黎承受爆炸嘅衝擊,根本係冇打算擋子彈嘅用途....」冰耀行到去枱上拎起改造而成嘅盾牌
Edmond繼續說道「而良生你...將會負責收尾刀,為確保我地係真正殺死條友,無論點你都要將佢身首分離...然後.....」
係佢講野嘅個一瞬間我已經衝上前扯着佢嘅衣領並推到埋牆上「你意思係叫我踩着同伴嘅屍體繼續作戰呀?!開咩玩笑呀究竟...」
「只有咁做...我地先可以百分百取得勝利,如果唔係咁....根本就冇意義...」
「意義?!你認為咁樣犧牲同伴係有意義架咩....答我呀!」
Edmond亦捉着我嘅手臂「係!犧牲小我,完成大我....先係成功嘅關鍵!」
「呀！！！」係我揮拳向佢臉上嘅同時,會長一瞬間衝過黎推開了Edmond,並硬食了一下重拳倒臥係地上....
「你要打嘅對象...咳...係我先啱,因為諗呢個計劃出黎嘅人...就係我....」
「你講咩話?點解你要咁做....唔想再有人犧牲唔係先至係我地嘅目的咩?!」其實我並唔相信會長佢會咁樣做,但呢一刻....佢的確係無言以對
會長慢慢咁爬返起身「的確呢個係我地必須做嘅事...但我作為會長,我必須要以大局為優先,比所有人更快離開呢一度先係我地真正嘅目的！！身為會長,我已經有受所有人批評同辱罵嘅準備!」
見到佢咁有決心嘅眼神,我也只能夠作出讓步「呢件事仲有邊個知道?」
「小k同肥ken都已經知道左詳情,而佢地都已經同意左呢行動計劃...」
這時Edmond拎左一個手扣出來「你可以選擇唔參與今次嘅行動,即使你反對都只係無補於事...我地會鎖起你直到行動完結為止,所以你嘅決定係...?」
我握緊着手中嘅拳頭「真係只可以咁做...?」
「呢個就係我嘅抉擇...良生,呢個行動成敗都好,我都會負上全部責任!」
然後我地都各自離開左活動室回到自己所屬嘅班房作準備
當我回到自己房間嘅時候,見到阿恩佢訓在係我嘅地鋪上「你返黎啦,咁耐嘅」
「呃…因為仲要總結返少少野,所以先遲左」我行近地鋪並坐在上面,而阿恩亦隨即躺在我嘅大腿上
「um...你好似隱瞞左我d咩咁喎,係咪?」有時候我都不得不佩服女人嘅直覺的確係非常之準確
「你太多疑啦...其實...」我不自覺咁望了一望走廊上行過的同學
話未說完,阿恩已經伸出了雙手揑着我塊臉「大話精....由以前已經係咁,每次你想講大話個陣都會望去左邊...」
「吓?!係咁嘅咩.....」我完全唔知道自己有d咁樣嘅壞習慣
「嗯哼...如果唔係阿妤佢發現到,我都唔知原來良生你係唔識講大話,嘿...真係呀...」
是嗎…原來阿妤你以前已經一直都知道,所以無論點都好,你總是會估到我嘅心思
感覺...唔知點解有d不爽咁....
「你又諗野諗到發晒呆啦」阿恩佢真係好中意捏着我塊臉
不過我亦唔執輸,馬上伸出雙手吱佢個肚黎報復「你捏夠啦!」
「哈哈哈哈…你搞到我好癢呀良生...哈哈哈哈…停啦哈哈…夠啦…哈哈哈哈哈！」
一個失平衡我們兩個都攬在一起躺在地上,凝視着對方嘅同時我們都用鼻尖頂撞向對方...而且呼吸和心跳聲都聽得一清二楚...
其實咁樣都唔錯呀...如果時間只能夠停止係呢一刻就好啦,話唔定咁樣可以一齊相處嘅時間,已經所剩無幾了...
就係咁樣我地兩個一直攬埋一齊直到行動時間嘅早上6點鐘,由於依家已經係冬天,即使係6點天仍然未光,而且環境亦是一片漆黑,不過水電供應都已經回復正常
行出走廊嘅時候都已經聽到天台上大水箱「隆隆」的運作聲音
這時我地所有人都已經各就各位,並等待着指示準備開始行動
我地學校主要由三楝建築物所組成,左邊嘅6層教學副翼大樓,中間嘅禮堂大樓以及5層嘅舊翼大樓,而狙擊手係位於副翼大樓天台,所以只能夠由禮堂大樓天台行過去
在此同時我們已經係舊翼大樓嘅4樓stand by,走廊有一道門係直接通去禮堂大樓天台,而另一邊小k同肥ken都已經係chem lab度拎左煤氣罐出黎從排氣管放氣上天台度,同時Edmond亦拎左三罐出黎交左比第一小隊嘅同學
「仲有一分鐘就可以開始行動」說完後Edmond便轉身離開....此時他停頓了腳步並回頭望了我一眼「唔好死...」
「嗯,返到黎我會一拳打毆死你...」
「咁我洗定塊臉等你...」
接着冰耀小隊一共十幾人已經打開了道門,並逐漸行到去連接副翼大樓天台嘅道度準備着
而我個隊只有MK康,許崇德以及他的部下...只要一傳出爆炸聲我地就立即衝過去
仲有5秒...4...3....
「...2...1...0....上啦!!!!!」MK康係我身邊大叫着
「唔好命令我」許崇德睥左MK康一眼之後便跟貼着我一同衝上去連接通道
「轟轟轟隆隆....轟轟轟轟.....呯.....呯....！！！！！」一連串嘅爆炸聲不斷咁係對面天台傳出來,火光熊熊的場景使其他人都突然呆滯了起來
我一邊跑一邊叫道着「繼續攻上去,唔好停止腳步....MK康你連同許崇德佢地一齊救出其他生還者!」
「究竟做乜鳩野呀良生..?!點撚解會爆炸架?!」MK康已經嚇得瞪大着雙眼並且手忙腳亂
這時我已經見到遠處有幾個學生倒臥係地上,我用毛巾包住塊臉跳過其他人嘅身體直接跳入火場...同時間看到冰耀背着兩個同學喘吁吁咁行走着...
「冰耀！！！」我立即上前扶着他幫手背着這個同學,此時我睇到佢左邊臉及左手都已經燒傷晒....
「佢....仲未....」冰耀拼命咁捉實我隻右手「快d搞掂佢....」
忽然間火堆中有個身穿西裝嘅男人衝了出來,並拎着一把手槍指向我們,我二話不說執起地上嘅盾牌擋子彈...
「呯！呯！呯！」連續三槍射過來,盾牌都已經散開左幾部分,我扔開個盾嘅同時推開了冰耀以免佢中彈
「你繼續走呀！！！」我一腳撐開了狙擊手並拎出放係腰間嘅軍刀一下子插向他的膊頭,他馬上退後幾步躲開了攻擊並失平衡撞向欄杆度
眼前嘅呢個男人就係殺死左我地唔少同件嘅兇手...他的臉上有一條又長又深陷嘅疤痕,由左邊額頭一直伸延到右邊下巴位置,而且臉上有着燒傷嘅痕跡
他望着我笑了一下「你地竟然挽到咁大....知唔知道會有咩後果呀！！」
「會有咩後果....?」
一瞬間佢拎左把左輪出黎指向我「就係死呀!」
開槍嘅個一秒間,我將頭漸漸側向右邊,子彈係左輪射過來時有煙霧係槍口噴出來,我望着子彈一瞬間射到我面前並係我臉頰間擦過...
子彈上嘅溫度在擦臉而過嘅一刻,刺熱嘅感覺都隨着血液濺出來時感受着...係同時間我亦扔出了軍刀刺向狙擊手嘅手背度,我們都一同濺出血來
手槍及軍刀都同一時間掉落到我們二人之間,我立即衝上前一拳揮向他的臉上,而他亦以一個膝擊回敬我...
跟著他一下子推開了我,並執起地上嘅左輪打算開槍射殺我,千均一發間我踢開了他的右手,而左輪也被踢飛了
我馬上爬起身撞向佢嘅腹部,他倒地嘅時候我立即扯着佢件西裝拉起了他,再一拳毆向佢個肚度,他馬上吐了一啖口水出來...
接著我繼續揮拳毆向他,突然間他接實了我嘅左拳並用額頭頂向我嘅下巴度,然後再捏着我條頸把我整個人都舉起了
「咳...媽的....咳...」我雙手不斷咁用力拉扯着打算鬆開佢隻手,但根本毫無鬆開嘅感覺
「終於知道點解小丑佢咁着迷於你....小子你果然係個人才...」
「咳.....我完全唔知道你...咳..想講咩...」
狙擊手漸漸緊帶着我行到天台嘅邊緣「可惜...既然係咁,你就係地獄度慢慢諗啦!」
係佢打算鬆手嘅一刻,我立即一腳踢向佢嘅子孫根度....他反了白眼嘅時候手亦鬆開了,我剛好掉在欄杆嘅前面,但因為失去平衡嘅關係,用力咁撞埋欄杆度...
火焰將欄杆嘅支柱都燒毀了,欄杆全都向後甩掉....同時我亦接著一同掉落樓...Fuck!!我立即拉住欄杆連接著天台嘅部分
「咔！咔!咔！」d螺絲都逐粒逐粒彈出來...欄杆愈扯愈開,只剩下少部分仍然連接着天台度,而且支柱上嘅熱力漸漸傳到我手中...
「啊！！！」我整個人都懸吊係空中...手掌中嘅汗也漸漸滲出來,當看到欄杆掉到落下面散落一地嘅瞬間真係嚇到腳都軟埋...
媽的...我仲未想死呀....