【中學時期，我竟然被一個女仔改變晒】: 三、正式開學

三、正式開學
我早左番去，見班房冇乜人，我就是但揀左個位黎坐。
 
十分鐘過左去，呢十分鐘夠我食個早餐、Gel個靚頭。人都開始番齊，只係我格離果個位一直都冇人坐。我唔知係呢個位既主人未番，定係因為呢班既人唔敢同我坐。不過，我直覺話我知，後者居多。因為佢地成班一番到黎就用一種猜疑既眼光望過黎。
 
後來先知係因為另一個同我同班既留班生喺兩日內已經同左成班講我係個衰人。我心諗︰頂你個肺，我大不了咪呃下女仔，乜挽到咁大呀師兄。
 
不過算數，孤獨都有孤獨既好，所謂「寂寞是最無敵」，你地凡人懂個春？
正當我自High到FF緊今年努力讀書屠爆你班粉腸果陣。
 


有個小肥仔坐埋黎，目測78，I mean Kg，望着我講左句︰「望咩啫，係咁架啦，遲到冇位坐咪同你坐囉，唔係點呀，你教我啦。」
 
見你個小肥仔咁串，我唔串番你，點對得住我娘親？
我︰「冇，見你咁肥，怕你唔夠坐。我就建議你坐地下，唔知閣下點睇？」
小肥仔︰「食屎啦你。我叫黃浩源，點稱呼？」
我︰「叫我小白得啦，肥源。」
 
就係咁佢就做左我朋友，你叫我又點估到佢對我既影響係好大。