~我同泳琳互相擁抱...泳琳嘅眼淚就棲息左喺我嘅膊頭上面,
而家我件衫已經濕哂,但係我一啲都唔介意,
因為只要泳琳明白我,就再冇咩好怕啦。

之後我地三個一齊返左我屋企,
我再將我嘅故事從頭到尾講多一次。


「原來係咁呀.....撞車.....子欣?....點解....點解....」
泳琳問題少女上身,不停發問,我都不厭其煩咁逐一解答。




「咁...咁即係子仁你都唔知點變返做男仔啦.....?」最後泳琳咁問我。


「....er.....我都好想知....。」我講。


「咁...咁點得架,我仲要同子仁你.............結婚.....生仔架嗎...!」泳琳面都紅埋,越講越細聲。




「放心啦,小琳,我應承你,我一定會變返做男仔...之後同你...結婚啦...
生仔....生對孖寶兄弟,殺哂所有烏龜,然後攞哂所有寶物。」我講。


「he....傻佬,又講對白...。」泳琳終於開心返哂。


「大家明哂咁就好啦吓,咁你地都要照顧吓我個胃嘅感受架,成朝都冇食過野呀,我好肚餓呀,
一齊出去食野先再講啦。」表妹做左佈景板咁耐,見到我地冇事,終於忍唔住開聲啦。




之後,我地就再落返街食野啦,今次我地都係求其係樓下商場茶餐廳度食算,
而家嘅泳琳又變返原本果個泳琳,同表妹有講有笑,
食完之後泳琳突然提議去返琴日果個大型商場行街。

我即刻一額汗....你地唔知架啦,泳琳有個綽號叫做(shopping 鵰啦星),
比佢去shopping就真係鵰啦星都唔掂,佢唔買到你破產都誓不罷休,
我之前都試過幾次果個月嘅飯錢比佢洗哂,搞到要食捉成個月公仔麵.....。

而今次結果呢...我當然係...產已破啦,不過今次泳琳唔係買衫比自己,而係買哂比我....
佢話依家我身形咁好,真係忍唔住要幫我買多d衫褲喎,好彩都月尾啦,
應該唔洗再食好多日公仔麵姐。

之後我地喺果度食埋晚飯就返屋企。



表妹自己一個走,而我再唔係一個人,我有泳琳,
我同泳琳拖住手一齊行返屋企,依一刻我真係覺得好幸福呀。

返到去我地係後樓梯坐多一陣,就好唔捨得咁各自返屋企。

返到去沖完涼,我坐喺梳化整理吓今日買嘅野,
一堆泳琳幫我揀嘅女裝衫褲裙,其實我都冇咩興趣,
於是我將堆衫放喺一邊,之後係另一個袋度拎左d戰利品出離,
我真正有興趣嘅係...籃球裝束。


今日行過nike果陣諗起,係喎,我依家瘦左都唔小,本身果d籃球衫褲都已經唔係好啱身,
而對腳直頭細左幾個碼添,所以我買返哂d新嘅女裝籃球衫褲,仲買左對女裝size嘅籃球鞋,
咁打起波上離先安全冇咁易受傷架嗎,係咪先。



好...... 聽日一於去試下.....。

就係咁,第二日我一早就起左身,因為泳琳今日要返學校補課所以冇得陪我,
我梳洗完之後,就換上一身女裝籃球衫褲鞋,打底衫,紮起一條馬尾,
就出發去邨入面個籃球場試下變左女仔之後,技術到底會差幾遠。

去到球場,得果小貓三四隻,半個場有幾個中學生喺度射緊key,
有半個場就有個阿叔喺度練緊半場射三分。阿叔果d射姿真係好奇怪,
單手好似擲壘球咁掟出去,但係又真係射得入架喎,真係吹佢唔賬。


依度係有兩個全場嘅,所以仲有兩邊半場係冇人,
於是我就求其行左去一邊冇人嘅場度射波。



拍左陣波,拎返d手感先,因為我本身係打得分後衛,所以控球技術都有返咁上下,
插花,後轉身,crossover 同Inside Out 依d控球技巧都掌握得非常熟練。

拍左十幾分鐘之後,我d手感都返哂離,
同男仔果陣冇咩唔同,但係跟住開始射波就出事啦。


我嘗試喺罰球位一射...竟然......大針.....。

唔係掛?冇可能嘅,再離過...又係大針,如是者,射左四,五球都係大針....。

我真係細力左好多,男仔果時射三分都唔算話要用好多力,
但係依家...罰球都大針,點搞呀!

我嘗試改變一下射姿,模仿平時見到女仔嘅推波射法,


咦.....真係好左好多喎,起馬唔會大針先,
之後就上吓籃咁,都冇咩大問題,係身前多左兩舊肉頂住,
所以平衡會差左小小,而且前面d頭髮好阻住視線,
唯有夾多幾隻髮夾啦。

練左一陣之後,無啦啦有人叫我。


「hi!真係見到你喎,果然冇講大話喎,真係打籃球架原來你?」
係小強,估唔到佢都會咁早落離射波。


「係...係呀。哈..哈」我一路射波一路講。


「係喎...你都知我叫小強啦,我仲未知你叫咩名喎。」小強拍住波咁問我。


「...吓...ar...我叫...子..子欣。」我拍緊波都緊張到甩一甩手,
成個波轆左過對面場班中學生度。


「唔該....」我揮揮手示意對面轆返個波過離,
點知.....佢地三個拎住個波一齊行左過離。


「...hi...不如鬥波囉?我地三個自己一隊,你地三個一隊。」其中一個中學生指一指我,
小強,同坐係場邊拉緊筋嘅小強朋友,之後笑住咁問。

我望一望小強。

「無所謂 ,子欣你ok嗎?」小強答完之後再問一問我。


「...哦...是但囉。」我都想睇下自己依家仲夠唔夠打。


針完開波之後,因為我射唔入,所以比佢地開波先。

一開波肥中學生就將個波傳比我mark住嘅排骨中學生,
排骨一拎波就衝向我,單手拍波用另一隻手臂係咁頂向我心口。

佢掂到我個胸果陣,我下意識向後縮,點知我越縮 排骨 就越頂過離,
雖然話打波緊有身體碰撞姐,但係有心定無意我點會feel唔到吖。


如是者,連續三四球排骨都係咁抽我水,我都唔知點做好,
我覺得好委屈,點解佢可以咁衰....仲要笑哂口咁。

終於到第五球,個波依然傳比排骨,排骨今次衝向我,之後扮跌低,成個人訓向我,
而我就反應唔切,成個人向後跌,比排骨成個人擲左落我身上面。

我即刻推開佢,坐返起身...終於我忍唔住啦,我......
跪左係地下度,耷底頭,雙眼通紅,眼淚已經開始流緊...
雖然我冇喊出聲,但係唳水已經流到停唔到。

係依一刻所有人都靜哂...

突然...~boom一聲...

係小強...佢衝左埋去打左排骨一拳,排骨應聲倒地。


「打波定抽水呀!!!!你要玩野我同你玩!」
小強突然好激動,佢個fd係佢後面係咁拉住佢。


「對...對唔住囉...」排骨兩個朋友一路講一路拉住排骨走...
比小強兇狠嘅眼神嚇到跑住走....。


「 ...小欣....!」小強好溫柔咁遞左張紙巾比我,...真係好man。

如果我係女仔一定會愛上佢。

...咪住先...我而家咪女仔囉..... 痴...線...當我冇講過。

唔係,我係男仔,唔好亂諗野。


「唔..唔該...」我伸手接住小強張紙巾,抺返乾塊面d唳水,之後就企返起身。


「多謝你呀...小強..!」我講。


「傻...傻啦,我應該架嘛,佢地根本就係一心想抽水,我忍左好耐架啦!」小強有小小面紅。


「我..走先啦。」我講。


「真係唔打多陣?」小強問我。


「唔..唔啦,冇心情...」比人非禮完之後,真係咩心情都冇哂。


「咁...咁好啦...下次有心情想打波,記住搵我喎,我隨時都可以陪你架。」小強面紅紅咁同我講。




我地交換左電話,之後我就自己一個人走左啦。

估唔到咁快就比小強抄左我牌,點解我會諗都唔諗就比佢架?....
但係又真係好難拒絕架嗎,係咪先?

就係咁,我一路行,一路自然自語,行左一陣,我feel到有人跟蹤我.....
係一個男人嘅身形,應該係由球場開始跟到離依度。

死啦,唔通係頭先果幾個變態佬想返轉頭強姦我??? 唔會嘅!唔會嘅!拍戲咩,
邊有咁猖狂架.....冇事嘅...冇事嘅,大不了同佢死過,我未必一定打唔低佢地嘅
.....點解變左女仔之後咁多野驚架....真係麻煩。

我專登行去d多人嘅地方,而家係商場入面,應該冇事啦掛,都有小小肚餓添,
一於去食d野先,就食吉吉家啦都好耐冇食啦。

於是我就一個人行左入吉吉家。

「歡迎光臨,買野食依邊吖。」侍應姐姐禮貌地講。


「唔該...輕盈玉子牛肉飯,牛汁 ,飲雀檸小冰。」我講。


好快,香噴噴嘅牛肉飯就放左喺我前面,
我拎住我個餐,行左去一邊小人啲嘅卡位度坐低。


正呀...望落好好食咁,落d七味粉先...然後再倒隻蛋同牛肉落去d飯度撈一撈...嘩....我開動啦。

~好味呀,變左女仔口味依然冇變。

就係咁,我好滿足咁享用緊我嘅午餐,而家我一手拎住杯野飲,一手拎住部s5係度撳緊,
無啦啦有個人坐住落我對面張卡位度,我認得個身影,就係跟蹤我果個人。


我即刻望向果個人,....係佢.....原來又係肥恆。

佢而家雙手放左係檯下面,望住我表情相當緊張,
好似係檯底摷緊d野咁。

.....吓...,唔會想向我露械吖嗎???唔好呀肥恆,細佬都剪左你架。

講就咁講姐,如果佢真係露械我都做唔到d咩架啦,
而家到我好緊張咁望返住肥恆。

唔好呀....唔好呀。

肥恆終於將雙手從檯底拎返上離,手上拎住一個信封。


「可唔可以比....比次機...機會我呀?...」肥恆一邊講一邊張封信隊埋離,塊面紅到冇得再紅。


「ar......唔.....」我都未講完,肥恆就放低封信跑左出去啦。


而家我揸住封信,拎又唔係...唔拎又唔係,最後我都拎左返屋企,
因為我都幾好奇想睇下肥恆到底會寫d咩。

結果內容都係果d,一見鍾情呀...好愛你呀...晚晚訓唔著呀果d啦,肥恆呀,
溝女都比d新意啦,講來講去都係果幾句,你起馬都要話,
對你嘅愛就有如滔滔江水 連綿不絕,又有如黃河氾濫 一發不可收拾,咁先夠創意架嘛。


唉....肥恆,點解你成世人都咁失敗架.....有時做friend嘅我見到你咁都真係會鄧你慘。

肥恆其實係一個心地好善良嘅人離,記得中一果年就識佢,
當時佢成日比人笑佢肥又矮,有次比兩個中三mk學生捉左入廁所想開佢波,
好彩我咁啱經過見到,幫佢打走左果兩個mk,所以肥恆先冇事咋。


之後我地就friend左,我一直都當佢係我細佬咁,有咩事我一定第一個撐佢,
雖然我地其實係同年,而且冇記錯肥恆應該係大過我幾個月添。


至於點解我可以單人匹馬打低兩個mk學生呢......就要由好耐...好耐...好耐之前講起,
大家可能唔記得左我爸爸係福建人,由小學一年班開始到我中三果年,
每逢暑假就會比阿爸佢捉返福建泉州(少林武術學校)度被迫受訓。

阿爸話作為福建人點都要識d功夫,咁先唔會比人恰喎,所以我每個暑假都會喺果度學習,
正所謂南拳北腿,喺福建南少林主要都係教授拳法,咩野少林拳呀...五祖拳呀...白鶴拳...等等。

就算前年暑假因為同泳琳一齊,所以我堅持唔返福建,
但係都喺香港上左個跆拳道課程,所以我可以輕鬆ko果兩個死mk。


睇完肥恆封信之後,我就求其將封信劈埋一邊,
跟住都好無聊咁上嚇網,之後就沖涼訓覺啦。

講起沖涼,我此終都仲係好唔習慣,每當洗到胸前兩點同下面陰暗位,到會好敏感,
有小小唔舒服又好似係舒服嘅感受,總之就怪怪咁啦。

沖完涼,把長髮又要吹好耐先會乾喎,所以真係好麻煩,
我終於知道點解d女仔出街要搞咁耐啦,原來做女仔真係唔易。

  好攰呀.....真係要訓啦....吖嗚~。