【自殺之後，我遇見死神小姐】救贖七個自殺者的故事: Case 1 憧憬希望的絕望少女—(4)

去完冒險樂園之後，Cathy話想去睇戲，所以我哋去咗戲院。

事實上，作為鬼魂嘅Cathy可以自由穿透物質，而旁人唔會見到佢嘅身影，聽到佢嘅聲音，所以睇霸王戲對佢來講無難度。

不過我就唔同，雖然我已經死去，但而家嘅我係有人類嘅軀體。作為一個人，我係要乖乖遵守人嘅規則，而且Cathy都想感受睇戲嘅感覺，所以我我哋去到售票處，乘乘買咗兩張飛。

買完飛，我拎住兩張飛去查票處，職員見我一個人但畀兩張飛佢，用疑惑嘅眼神望住我。

「我諗住用兩張凳，瞓喺度睇戲。」我解釋道，至於Cathy又玩穿透遊戲，喺度用手指插個職員個鼻窿。





Cathy喺度周圍飛，裙下春光隨意飄揚，搞到我有啲唔好意思。

正當我想叫停佢時，我意外地望到啲嘢……

職員撕咗票尾後，我就同Cathy兩個進入戲院，靜靜等待電影開始放映。

Cathy乖乖坐喺我隔籬，不過實際上佢唔係真係坐緊，而係飄浮咗喺度，因為佢根本掂唔到任何嘢，佢個位嘅坐墊都係我拉落嚟。

喺開映之前，突然有個人坐在喺落Cathy個位，穿透咗佢嘅身體，同Cathy重疊起來。





「會唔會有人坐㗎？」嗰個人隔籬個人問佢。

「唔會啦！電影都開始啦，真係有人坐咪叫佢坐去第二到囉，反正大把位！」

Cathy轉過頭望住我，露出無奈嘅樣。而家啲人，連基本嘅自律性同禮貌都無。

「唔該。」我向隔籬個人說。

「吓？做乜？」隔籬個人回應我，佢一頭金髮，露出不屑嘅表情，外表似係MK仔。





「你坐錯位，呢個位有人。」

「吓？你叫你個fd坐去你另一邊嘅隔籬咪得，反正嗰個位無人。」

「總之呢個位唔係你，唔該你坐返自己個位。」我加重語氣。

「我係都要坐呢個位，點呀？」MK語氣亦變得更挑釁。

「如果你唔走嘅話，唔好怪我唔客氣。」我企起身俯視住佢，MK仔開始慌張起嚟。

「使唔使咁呀？周圍又唔係無位……」MK仔本身露出慌張嘅表情，跟住突然笑起嚟，「電影就嚟開始，都重未有人喎……你係被人放飛機，定係你買嚟畀你個FF女友㗎？」

「你講夠未？你最好即刻離開呢個位，坐返自己個位，如果唔係我對你唔客氣。」

我心裡冒起怒火，雖然Cathy只係一個其他人見唔到嘅鬼，但佢係活生生嘅存在！





我狠狠地睥住MK仔，心裡嘅怒氣從眼神爆發出嚟。

「唔坐咪唔坐，好巴閉咩！」MK仔不屑咁返去自己本身個位。

終於可以安靜地睇個戲。

就算周圍嘅人當我發癲，以為我同空氣講嘢都好，都無所謂，因為我知道Cathy係同其他人一樣，有思想有感情嘅存在。

MK仔走咗之後，Cathy轉過頭，

「其實佢坐喺度對我都無影響啫，我可以穿過佢，或者坐其他位㗎嘛。況且我只不過係隻鬼，又唔係真係坐喺度，其實連飛都唔應該買。」

「但係我就係純粹唔gur，就算無人見到妳，掂唔到嘢都好，妳都係人，我唔容許有人做侮辱妳嘅行為。」





「多謝你，天使先生，你果然係個好好嘅gentleman。」Cathy露出嘲弄嘅笑容，「不過男人老狗攬住隻公仔睇戲好似有啲變態！」

「妳！明明我係幫妳拎住咋！信唔信我扔咗佢？」

「我相信天使先生唔會咁做嘅！」Cathy一臉從容地講。

「妳真係……睇戲喇！」我被佢激到無氣。

燈光開始變得昏暗，電影即將開始。今次我哋睇嘅係驚慄鬼片，Cathy又要驚但又話想睇，而我對鬼片無咩感覺，可能生前嘅我唔驚呢啲嘢。

我哋專心至致睇戲。

播到中途驚嚇位，Cathy幾次嚇到尖叫出嚟，合上眼睛但又留一絲眼隙去昅下個螢幕。

「好恐怖呀……天使先生，我好驚呀……」





「驚妳又睇。」

「唔……！」Cathy驚到淚水喺眼眶打轉。

見到佢咁驚青嘅樣，就有種想保護佢嘅感覺。

我不自覺就將手搭喺Cathy隻手上面，佢先係震咗震，然後愕然望過來，之後展露甜絲絲嘅笑容，羞答答咁垂低頭。

唔知點解，我心裡有種慌亂嘅感覺。

或者出於憐憫，又或者出於錯覺，但我好似有種被Cathy吸引住嘅感覺。

而我一直搭住Cathy隻手，直到電影完場。





電影完場，播緊片尾鳴謝，周圍嘅人陸續離開，剩低我同Cathy兩個。

望到仍然搭喺Cathy手上嘅手，我竟然感到怕羞，不由自主想縮開。

「唔緊要，天使先生捉住我嘅手嘅話，我會安心啲。」

同最初嚟商場拖Cathy嗰陣唔同，今次我企起身，鼓起勇氣拖住Cathy嘅手離開電影院。

我都唔明白，點解會有要鼓起勇氣，同埋緊張嘅感覺。