【自殺之後，我遇見死神小姐】救贖七個自殺者的故事: Case 4 守候了五年的忠犬—(19)

我向小敏辭別後，同小妹妹離開，走到街上。

「哥哥，點解叔叔會變成一粒粒光點，然後消失嘅？」小妹妹又問多次。

「叔叔，去咗個好遙遠嘅地方，去搵佢最重要嘅人。」

「喔？但係姐姐唔係就係佢最重要嘅人咩？」

「姐姐都係，不過佢去搵個另一個最重要嘅人。」





「原來係咁。」

小妹妹睜大圓碌碌嘅雙眼，若有所思地輕輕點頭。唔知佢係咪真係明，不過有個妹妹做吉祥物，感覺好似幾治癒。

我同小妹妹喺街上行走，人來人往令小妹妹感到壓力，小妹妹捉實我嘅手。

「哥哥，頭先見姐姐好似見唔到叔叔咁，其實叔叔係咪都同我一樣，周圍嘅人見佢唔到㗎？」

「嗯，叔叔同你一樣。」





「咁我會唔會有日好似叔叔咁消失㗎？」

「叔叔無消失，只係返去自己所屬嘅地方，見最重要嘅人。」

「咁我幾時會消失……？」

「我都唔知……但總有一日，妳一定會知道自己嘅身份，離開呢度，返去自己所屬嘅地方。」

「我好驚……」





「點解？」

「因為離開咗呢度之後，就唔可以再見到哥哥囉……」

「但係一定會有更重要嘅人等緊妳。」

「所以話，我最重要嘅人就係哥哥你囉！」

「唔係……雖然妳唔記得，但我相信喺遠方一定有個對妳好重要嘅人。」

「我唔要，我淨係要哥哥妳！」

呢個妹妹，真係識扭計……不過佢而家同我一樣無哂所有生前記憶，有日佢記返所有嘢後，就會明白。

我以微笑作回答，然後繼續拖住佢嘅手前行。





烈日當空嘅下午，我是但搵間餐廳醫飽肚後，等待死神小姐到來，開始下一個目標。

死神小姐神出鬼沒，但當完成一個目標，我無嘢做嘅時侯，佢就會好快憑空出現喺我眼前。

喺公園大概呆等咗幾個字後，一如既往妖艷打扮嘅死神小姐突然憑空出現喺我面前。

「等咗妳好耐。」

『啊哈！估唔到你都幾快手。』

我觀察到死神小姐講嘢時，眼神由我身上掃咗去小妹妹到。

『呢個……就係你講嘅孤魂野鬼呀……』





「妳真係唔知佢嘅來歷？照妳嘅講法，佢唔係我嘅救贖對象，點解我會見到同接觸到佢？」

『啊……我都唔知呀！我淨係可以講，你見到嘅應該都係你要救贖嘅人。』

「妳真係唔知係咩一回事？妳身為死神，點會唔知呢啲事情？」

『吓？我幾時講過我係死神呀？重有，唔好用命令嘅口吻同我講嘢……』死神小姐板起嘴臉，『依家主導嘅人係我。』

第一次見到死神小姐擺出咁嘅態度同口臉，睇嚟一係佢真係唔知，一係……呢件事會係一件佢不得不隱瞞嘅事情。

小妹妹望住死神小姐，擺出一副大惑不解嘅表情，然後瑟縮地靠喺我身旁。

「哥哥，佢係邊個呀？點解佢會飛喺天到？」

「佢唔係壞人，係嚟幫我嘅人。」





小妹妹無作聲，緊緊依靠住我，如同雛鳥喺母親嘅懷抱中。

『不過呀……睇嚟佢都幾黏你咁……算喇！反正佢唔會影響到成件事，你鍾意嘅話就留住佢喺身邊囉！』死神小姐意味深長地望住小妹妹，感覺有啲令人唔舒服。

『好喇！我哋入返正題喇……你哋真係蹺，呢度就係第四個被救贖者嘅地點。』

「救贖？姐姐係度講緊啲乜呀？」

「哥哥依家去幫緊其他好似妳一樣嘅人，幫佢哋完成心願，等佢哋再無牽掛地離開世上。」

「完成心願……？」

「妳跟住我，就會明白我做緊啲乜。」





我周圍望望，公園到除咗有幾個阿伯喺度捉棋同談笑風生之外，就無其他人。

我見到有個伯伯企喺棋局旁邊，但無同其他伯伯有交流，可能佢係鬼所以先無同其他伯伯講嘢……不過為免搞錯，直接去問死神小姐就好。

「被救贖者……係邊一個伯伯？」我指一指嗰邊嘅棋局。

『被救贖者唔係任何一個伯伯。』

「吓？」我環視周圍，都肯定呢度除咗得啲伯伯喺度，就無其他人。

『你真係蠢，咁都唔明白。』死神小姐向下方指一指，『今次你嘅救贖對象就喺度。』

我望住死神小姐所指嘅方向，心裡面即刻「吓」咗聲出嚟。

「咩話？係佢？」

『係呀，呢度得佢一個係鬼魂嚟㗎咋，今次你嘅任務就係要幫佢完成心願。』

救贖任務一次比一次麻煩。我感覺到，今次嘅任務比起上次更要麻煩十倍。



因為喺我眼前嘅，



並唔係一個人，



而係一隻狗。