【自殺之後，我遇見死神小姐】救贖七個自殺者的故事: Case 4 守候了五年的忠犬—(20)
喺我眼前，係一隻約一米長，耳朵同鼻子長長，淺啡色體毛嘅獅子狗。佢一雙誠懇嘅黑眼珠望住我。
「嗚！汪汪！」
「吓……？等等！點解會係狗嚟？」
『有咩問題？』
「問題就大喇！我根本聽唔明佢講啲乜，我點樣可以幫到佢完成心願？」
『呢層由你自己去解決喇，我只係負責安排任務畀你，至於任務內容我一概唔會插手。』
「等等！等等！你唔係話我只要救贖七個人就可以脫離自殺輪迴咩？點解無啦啦會變咗隻狗？」
『啊哈……呢點的確係我無解釋清楚……所謂人呀……其實可以有好多種解釋，除咗係指一種生物物種外，亦可以解釋為一個行為個體，而我所指嘅「人」就係後者。不過呀……呢個都唔係最重要嘅解釋。』
「咁係咩？」我好奇問。
死神小姐收起笑臉。
『有時，狗比起人類，更加有人性，更值得稱之為「人」。』
我望住眼前呢隻狗狗嘅雙眼，雖然我倆語言不通，但彷彿佢就有靈性一樣，我感覺到我哋會心靈雙通……唔係，等等先！就算佢幾有人性都好，語言不通係赤裸裸嘅事實，解決唔到！
「汪汪！」
狗狗再次向我發出友善吠聲，我感覺到佢係想往我親近過嚟。我順住佢反應伸出手，佢慢慢往我行過嚟，抬起頭望住我。我伸出手輕掃住佢嘅背脊，幫佢梳順啲毛，而佢亦乖乖咁企喺原地，享受住我嘅梳理。
「狗狗好得意呀！」小妹妹走過嚟玩埋一份。
『睇嚟佢都幾鍾意你，你哋一定會心靈相通。』死神小姐嘴角上翹地說。
我見死神小姐好似準備走，馬上叫停佢：「等等！唔通真係無方法可以令我哋互相溝通？」
只見死神小姐輕輕一笑，『有啲事情，唔需要語言都可以傳達到，好好加油喇。』
「等陣！」
我說話未完，死神小姐已經消失於我眼前，留下呢隻可愛嘅狗狗狗。係，呢隻狗狗係幾可愛，但莫講話佢嘅心願，我連佢嘅背景來歷都唔知，點可能幫到佢完成心願……？
狗狗精靈地望住小妹妹。
「哥哥，我哋可唔可以養埋狗狗一份呀？」
一個治癒系細佬妹，再加隻可愛狗狗，今次真係唔知點收科。
啊……我諗起喇！死神小姐講過，自殺者靈魂嘅位置就係佢自殺地點附近，亦同其死因有關。狗狗應該死喺呢度附近，一隻狗死喺公眾場所，周圍嘅人點都會有啲認知掛！
換言之，我首要做嘅係向呢個屋邨嘅人打探，睇有無人知道呢隻狗嘅事，甚至來歷。
我踎低，一邊撫摸狗狗，一邊向小妹妹講：「雖然我都想養呢隻狗狗，但更重要嘅係幫狗狗完成佢嘅心願，送佢返佢應該去嘅地方，所以哥哥依家要周圍打探線索去幫狗狗。」
小妹妹扁起嘴巴，露出唔開心嘅表情。
我另一隻手撫摸小妹妹嘅頭，講：「佢並唔係屬於我哋，正如我之前所講，狗狗都有對佢重要嘅人，所以我哋唔可以咁自私㗎，要為狗狗著想，知道嗎？」
「我知道喇。」小妹妹如同小鳥啄米般點頭，「但我想去幫狗狗手。」
「好。」我會心一笑，然後臉轉向狗狗，「狗狗，我依家就幫你完成你最後心願，所以你就乖乖咁跟住我喇！」
「汪！」狗狗好似真係聽得明我嘅嘢一樣，對我吠聲回答。
既然狗狗嘅靈魂係公園到，就由公園開始搜索。我望向捉緊棋嘅伯伯群，就從嗰堆伯伯開始問。
但係……人自殺都可以仲理解，但先唔論狗狗點解要自殺，問題係佢用咩方法自殺……？
問人地有無見過一隻狗喺度自殺，我諗身邊啲人應該認為我係痴線佬，望就望會咁好彩問到喇。
嗰班捉棋阿伯捉得好肉緊，氣場太強，廢時打擾佢哋，先搵下周圍散步嘅阿伯阿婆先。
我見到有個揸住拐杖嘅駝背老伯獨自散步，於是我往老伯走過去。
「唔該。」
老伯好似無聽到，眼神無往我望過嚟，繼續老態龍鐘咁行路。
「唔該！」
我走到佢面前，大聲高呼，只見老伯慢慢抬起頭，望向我雙眼。
「我想問你知唔知最近有無一隻咁大隻，啡色毛嘅獅子狗，死咗喺附近？」我望住狗狗，照板煮碗咁將狗狗嘅特徵描述出嚟。
老伯雙目與我對視，一言不發。我以為佢正在思考，等咗十零秒，佢先用拖慢嘅聲線緩緩吐出一句說話：
「鳩？乜鳩呀？」
老伯似撞聾聽唔清楚咁，於是我提高聲量重覆多次：
「呀伯，我想問你有無喺度見過一隻啡色嘅狗呀？」
老伯皺起眉頭，瞇起雙眼說：「乜乜鳩呀？我都唔知你講緊咩。」
老伯嘅樣十分煩躁，睇嚟佢都唔會知，於是我走去問其他老伯。
「咳咳……狗……唔知喎……」
「咩狗呀？無見過喎。」
「吓？你講乜呀？我聽唔清楚。」
「當年項羽破釜沉舟，今日我就破士吞帥，後生仔呀伯捉緊棋，你唔好嘈住哂。」
「啊你班後生仔淨係識搞搞陣，一時又港獨，一時又佔中，破壞哂社會秩序。」
問咗一大輪，結果毫無收鑊，問到正常嘅阿伯還好，有啲阿伯垂死咁嘅樣，有啲就答嘢九唔搭八，有啲用埋啲唔淡唔鹹嘅廣東話講野，有啲中火十足嘅屌返我轉頭，完全一籌莫展呀！
我望向開始金黃嘅天空，原來太陽都準備落山，而我身體亦感到疲倦。
「睇嚟今日毫無收鑊呀……」我伸咗個懶腰。
狗狗走到我臉前。
「汪！汪！」佢嘅叫聲彷彿好似鼓勵我一樣。
我踎低輕撫著狗狗，狗狗合上眼睛趴落地下，乖乖咁被我撫摸住。
咚—！一個紅色波跌喺我面前，有隻棕色嘅狗跑過嚟，將個波咬起，跑返過去遞畀主人。
我望向狗狗，佢眼神中流露羨慕，我感覺到佢好想玩埋一份，但佢已經死去，無法再接觸到任何事物。
我望住狗狗，忽然感到傷感，明明我連狗狗嘅語言都聽唔明，但呢刻我就好似感受到佢心裡嘅感受一樣。當望住鬼魂對人世依依不捨嘅眼神，呢種情緒好容易就泛起嚟，但望住狗狗，呢種情感變得更強烈，我諗大概因為佢用可愛嘅臉貌去擺出咗傷感嘅表情，令人更加憐憫。
狗狗都有自己想做嘅事。
我暫時幫唔到佢完成心願，但至少都想去滿足佢少少要求，令佢感受快樂。
「哥哥，不如我哋同狗狗玩捉伊人呀？」小妹妹突然提議道。
「捉伊人？」
「係呀。」
我腦海好快回想起捉伊人係咩嚟。
小妹妹畀咗個好好嘅建議！雖然狗狗掂唔到嘢，但同佢玩樂嘅方法都重有！
「狗狗，我哋玩捉伊人好唔好？」
我踎低同狗狗講，但我講完之後先記起狗狗都唔識聽人話，點會明「捉伊人」係咩意思？
但係好神奇地，狗狗對我點頭示意，然後乖乖坐喺原地等待開始。我諗，應該佢以前嘅主人同佢玩過，所以佢聽得明。
遊戲準備開始。
「你望住嗰邊十秒，十秒之後就開始嚟搵我哋！」
我講完之後，就同小妹妹喺公園搵啲狗狗睇唔到嘅窿窿罅罅匿埋，十秒之後狗狗開始搵我哋，狗狗十分靈敏，好快就搵到我哋。我最初以為係因為聞到我味道緣故，但小妹妹一樣被佢好快搵到。
之後我基本上每次都被狗狗搵到，但小妹妹頭幾次被狗狗搵到後就開始出狗招，飛到樹上匿埋，可惜狗狗一樣識飛，結果我哋兩個就好似瘋狂俾人捉一樣。
之後倒返轉由我同小妹妹捉佢，結果狗狗如同密林中嘅變色龍一樣，毫無違和地融入周圍環境，每次都花好多時間先搵到佢。
不知不覺，我哋玩咗好耐，玩到我成頭都係汗。我坐喺張石凳，同小妹妹同狗狗抬頭望向天空，原來太陽已經落山，天空剩低淡紫色嘅雲霞。
淡紫色嘅雲霞，又被稱為magic hour，係太陽落山後同入夜之間極短嘅時段，呢刻天空嘅雲霞會呈現出唔同顏色，當中紫色可以話係極為特別而美麗嘅色彩，出現嘅時機好睇天氣同周遭環境，並唔係每日都會見到。
「個天好靚呀……」小妹妹驚嘆地望住天空。
嗯，無錯。
呢個日落，好靚。
一望見呢個日落，腦海又泛起一堆知識，我以前應該同過我重要嘅人觀賞過呢個日落。
結果雖然搵唔到線索，未能幫狗狗完成到佢嘅心願，但同狗狗開心地玩咗一個晏晝，至少為狗狗帶嚟愉快嘅一日。
我感覺到，就算呢個唔係佢最後嘅心願，但亦算係佢其中一個小小嘅願望。
我將佢拎起嚟，放喺我大脾上，佢乖乖地伏喺度，露出滿足嘅表情。
唔知點解，我想見到佢更多開心同滿足嘅表情。
呢種感覺，大概養過寵物嘅人就會明。
突然萌生一個諗法，如果我同狗狗都重在生，或者我會領養咗佢。
唔知，狗狗生前有啲咩經歷呢……