無品神探: 第三節

「阿John你唔可以再成日咁衝動架。再係咁以後你唔洗再返架啦。」
 
Veronica同佢兩個保鑣，坐喺一架奧迪房車上駛離深水埗。
 
「但係小姐，呢個人好明顯就係頭先係走廊襲擊我地嗰個。呢一點呀tim都同意。」阿john抗議。
 
「小姐，雖然阿john係衝動，但頭先你都喺走廊。你都知發生咩事。」
 
「頭先我已經講過，呢個係一場誤會。」Veronica將視線由車外馬路收番入黎。
 




「你地整爛人地度門，加上你地支手杖，人地以為你地係破門賊，專程搵佢麻煩。」Veronica解釋。「同埋打你地既，唔係佢，而係佢保鑣阿強。」
 
「保鑣？」阿tim疑惑。
 
「你知唔知道點解我會搵一個咁既人？」Veronica問。
 
「小姐你一向都識啲老爺唔係咁鍾意既人，不過今次呢位，確實有啲離譜。又無禮又污糟。」阿tim評論。
 
「的而且確，呢個人好rude，衣著好唔得體。但佢喺香港乃至周邊最好既偵探。」Veronica又望向遠方。「全香港得佢一個人，靠警察既獎金為生。」
 




「咩獎金？」阿tim問。
 
「警察既懸紅。香港警察一年有幾萬宗案件要處理，但佢地破既案，唔夠一半。當中一部分罪情嚴重，又無法偵破既，會有懸紅。」
 
「易破既，就唔會有懸紅。當一個人以呢啲懸紅為生，你話呢個人勁唔勁？」
 
「不過黑道中人，都因此對佢有忌憚。佢會請保鑣，其實唔出奇。」
 
Veronica望向佢兩個保鑣。「總之，我信佢會幫我查到Derek既下落。」佢既眼神充滿信心。
 




「小姐，」一直喺前面專心揸車既司機突然出聲。「你仲未講，你想去邊度。請問係咪返屋企呢？」
 
富家女點點頭。
 
************************************************************************
 
偵探所。
 
麻甩佬岩岩醒番，後腦仲係度痛緊。
 
「仆佢個臭街，邊個扑濕我。」佢自言自語。
 
岑世英，行年廿十八，現職半偵探。喺深水埗德廣大廈租有三百呎單位，既係偵探所，又係住處。單位簡陋，只有兩張梳發，一茶几，兩間房，
 
岑世英望一望身邊，富家女同兩位保鑣經已冇左身影，只留低一堆文件同相，堆放喺地下。




 
佢望到地下熄滅左既煙頭，有啲慶幸冇整到火燭，又有啲奇怪邊個咁好心幫佢整熄支煙。
 
「咦？」岑世英見到文件上面，放左張紙。佢撓下頭，拎起身黎睇。
 
張紙咁寫：「岑生，對於啱先既唔愉快，我係度致歉。我想安排第個時間詳細傾下我個case。總之，成功破案有重酬。Call 我。 關芷怡」紙最尾有佢個電話號碼。
 
岑世英連個女人叫咩名都只係啱啱先知。雖然佢啱啱畀人扑濕完，岑世英原本既唔忿氣，睇到「重酬」即刻去左大半。佢知道個有錢女肯定「重酬」得起。
 
「wei！呀英！」門出面一把男聲。
 
*************************************************************************
 
南區深水灣，沿海關氏豪宅。
 




Veronica同兩位保鑣坐奧迪房車返到關氏豪宅，亦即係Veronica既屋企。
 
司機將架車揸入關氏豪宅庭院，停到樓下。
 
香港寸金尺土，擁有獨立屋已經可以算上「有錢」，好多人只係住細單位，甚至劏房。一間豪宅既臨海，又有庭院，可以想象到有幾貴。擁有一間咁既豪宅，可以想象到Veronica家族幾有錢。
 
管家經已喺門口等緊。睇個樣，佢已經等左一段時間。
 
管家向Veronica做個鞠躬，然後開聲：「小姐，已經煮好飯，老爺等緊你。陳生都黎左。」講完笑一笑，做個「請」既手勢。
 
「佢黎左？」Veronica既語氣聽落唔算好開心。
 
「係，小姐。」
 
Veronica唔出聲，落左車，由司機將房車停入車庫。




 
佢同兩個保鑣行入豪宅。