無品神探: 第七節

兩日後。
 
「Welcome to Paris.」
 
讀完法文之後，機師又用英文，歡迎乘客黎到法國巴黎。
 
坐喺飛機上面嘅岑世英有啲唔知點算，畢竟佢唔識法文。飛到法國黎查案，會查到啲咩，老實講佢幾擔心下。
 
好彩佢唔係隻身一人。
 




坐喺佢隔離嘅保鑣阿強講：「大佬識你咁耐都唔知你識法文喎？」
 
「邊個話你知我識？」
 
阿強有啲驚訝：「吓？咁我地黎巴黎咪戇鳩鳩？」
 
「未必。」岑世英打個喊露，打開佢本手札黎研究。
 
「用另一個思路諗下，個客識法文，黎咗呢度一個月都冇料到。我地會查到啲咩？」岑世英從容咁講。
 




「係喎，大佬，你真係醒。咁我地黎做咩？應該即刻去買番張回程飛喎。」阿強有啲疑惑。
 
「屌！你就真係戇鳩鳩 ！」講完岑世英抦咗阿強個頭一下。
 
「唔好打，大佬！痛架，大佬！」阿強即刻求饒。
 
「唔打唔得啦，咁蠢，幾時先開竅。」岑世英講完又抦一野。
 
「唉呀！」
 




「廖家豪都唔識法文，佢去嘅地方，應該唔會太過地膽，除非有人帶。所以我地兩條友唔識法文可能查到啲個客查唔到嘅野。」岑世英解釋。
 
「係喎，大佬你真係醒。估唔到你咁有把握。」阿強係度稱讚。
 
「其實我冇。」岑世英好坦白。
 
「咁如果冇料到咁點？」阿強問。
 
「冇點，收皮返香港囉，可以點。一個人被報案失蹤，唔係生，就係死，當然都有永遠搵唔番嘅個案。而家查下睇下有冇料度先啦。」岑世英聳聳肩。
 
「大佬啲人走曬啦喎。」阿強指指身邊嘅座位。
 
「屌，唔提我？」岑世英講完又抦阿強個頭一野，收起本手札落機。
 
*************************************************************************




 
昨日。會客室。
 
「Hello。相信大家都明白呢個會面係傾咩，我份人唔多鍾意廢話，亦唔想阻你地返工做生意，ok?」岑世英叼住支煙。
 
「岑生，我當然欣賞你直腸直肚，但唔好意思，我地公司個policy係禁止吸煙嘅。」坐喺對面陳耀華講。
 
「唔得咩？唔食囉。」講完岑世英整熄支煙。
 
「岑生今日想傾啲咩？」陳耀華笑著講。
 
「陳生聽講你好有機會做和實集團接班人喎。」岑世英講，係度咬牙簽。
 
「唔敢當。我只係專心做好自己姐。」陳耀華擺擺手。
 




岑世英坐直個人，講：「好似廖家豪失咗蹤，你接任你契爹關誠天，只不過係時問題喎。」一路講，佢一路觀察陳耀華。
 
陳耀華摸咗摸自己下顎，講：「Derek係一個好好嘅CEO，佢失咗蹤，成間公司都好唔開心，士氣受損。」
 
岑世英講：「同我聽嘅版本有啲唔同喎，陳生。」
 
「唔同？有咩唔同？」陳耀華皺眉。
 
岑世英坐前一下，講：「我聽講廖家豪喺和實集團唔算好受歡迎喎，點解你同我講，成間公司都為咗佢失蹤而士氣受損？」
 
陳耀華微笑咗笑，問：「係邊個同你講架？」
 
岑世英有啲愕然：「有咩關係？」
 
「係咪阿怡同你講架？」陳耀華問。




 
「你指Veronica?」
 
陳耀華點點頭。
 
佢見到岑世英唔出聲，低頭又笑咗笑：「係阿怡嘅話唔出奇，佢好著緊Derek。」
 
陳耀華開咗支烏龍茶，飲咗啖，繼續講：「我地咁嘅規模，要做每項決定要好小心。賺，可以賺好多；蝕，亦可以蝕好多。傾重要野，有時傾到面紅耳熱，好正常。阿怡佢好著緊男朋友，見到呢啲場面，就以為公司啲人同Derek唔啱嘴型。」
 
陳耀華又坐前個身，望入岑世英兩隻眼，望到後者起曬雞皮：「阿怡並唔係有心呃你，佢只係好著緊Derek，甚至…太過著緊佢，著緊到過咗頭。岑生，睇你咁聰明，你都明好多野冇表面睇起身咁簡單，唔係每個人講嘅都可信，即使係個客。」
 
*************************************************************************
 
岑世英喺酒店房嘅床度回想陳耀華尋日同佢講個野，打咗個突。的確，關芷怡講嘅野唔可以全信，但對陳耀華唔可以消除疑心。佢覺得呢個人，唔簡單。
 




「大佬，出發做野。」阿強戴好帽講。
 
「好。」岑世英起身，佢又戴一頂帽：「做野。」