中環。和實集團。會議室。
 
「好,我地散會。」關誠天坐喺主席位講。「阿怡,你留底。其他人可以走。」
 
聽到呢句會議室嘅人走曬。陳耀華望咗關氏父女兩個幾眼之後都行咗出去。
 
「爹哋,搵我咩事?」Veronica覺得有啲奇怪。
 
「阿怡,」關誠天講:「其實我呢幾年都有呢個諗法,到呢排尤其係。我覺得,和實集團係時候要畀多啲新一代掌舵。」
 




Veronica聽到出佢老豆意思:「爹哋,你嘅意思係…?」
 
「係我面前,有一個好叻嘅女仔。和實集團嘅大小業務,交到佢手上,我都可以高枕無憂。」關誠天笑咗笑:「如果呢個女仔,肯專注喺公司嘅業務,一定大有可為。佢爹哋亦可以唔使再兼任公司CEO。當然,要佢應承先得。」講完呢句關誠天望咗望佢個女。
 
Veronica聽到佢老豆咁講有啲愕然。
 
「…爹哋,」Veronica講:「Sorry我未ready。」
 
「阿怡,我經已畀咗好長嘅時間畀你準備。」關誠天個樣有啲唔高興。「你係咪唔理爹哋嘅感受,要佢一把年紀理曬公司啲野?」
 




「爹哋,我唔係咁嘅意思…」Veronica即刻解釋。
 
「阿怡,唔理你同耀華之間點…」
 
「我同佢之間冇咩。」
 
關誠天搖頭笑咗笑:「唔理你地點。未來女婿又好、契仔又好,咁多個人入面,我最信自己個女。」講完佢拍咗拍關芷怡膊頭。
 
關誠天意味深長咁講:「我覺得,黎緊公司會有一番風浪。到時…我想你準備好。」
 




*************************************************************************
 
深水埗。街市摩扁接踵,充滿住買餸嘅人。喺香港,通漲永遠輕鬆跑贏人工。連M記都三十蚊個餐,要生存,就要先諗好一日三餐點搞。
 
「阿英,呢度計埋,計你二十蚊啦。」賣菜阿叔將一袋菜遞畀岑世英。
 
岑世英打打眼色:「明叔,你今日好精神,好英偉喎,十蚊啦。」
 
明叔搖搖頭:「冇計傾。次次都係咁,上次都畀平咗你啦!」
 
岑世英環觀左右,壞笑:「明叔,呢啲有來有往姐。元朗個場冇我睇住嘅話,明叔你都玩得唔順興啦。仲有,我把口一向好密實,從來冇揚過。」
 
明叔有啲尷尬:「得啦得啦,唉。色字頭上一把刀。」
 
「多謝明叔。」岑世英笑咗笑,喺褲袋拎咗十蚊出黎畀明叔。




 
明叔喺度抱怨:「唉,都唔知點解去滾都會關你事。」
 
「細佬自有方法。」岑世英講。「明叔,你好我好姐。」
 
岑世英拎住抽菜同之前買嘅豬肉行出街市,行番德廣大廈。街市同佢住嘅地方好近,只喺五分鐘路程。太遠固之然差,但太近亦慘,「街市咁嘈」係唔少老師最鍾意嘅金句,唔理係小學定中學。
 
佢行到番佢偵探所門口,偵探所度門仲未整番好,只係用紙皮喺咁求求其其擋下算數,而家入面只有一間房嘅門個鎖係用到。間屋根本就得垃圾,冇野值得偷,所以岑世英門都費事整番好,由得佢。
 
不過,有不速之客黎咗呢個根本冇野值得偷嘅地方。
 
紙板門虛掩,偵探所入面傳出雜聲。
 
岑世英睇清楚,確實係佢嘅垃圾細單位,冇行錯。佢皺眉,閉氣咁慢慢推開度紙皮門,慢慢咁行入去。
 




屋入面,有個人!
 
岑世英即刻行入佢間屋。
 
係一個女人。
 
一個長頭髮嘅女人聽到佢返,望住佢。
 
「終於見到你,岑生。」個女人講。
 
「關小姐,咁係咩意思?」岑世英眼都大。
 
眼前係關芷怡同佢保鑣阿john。
 
「岑生,你prefer長啲解釋定一個短啲嘅解釋?」Veronica問。




 
「一個合理嘅解釋就夠。」岑世英仲好疑惑,佢一邊講一邊放啲餸喺臺。「我都係出去買個餸姐,小姐你知唔知道擅闖民宅犯法架?」
 
「Well. 我三番幾次搵個偵探,求個答案,點知個偵探潛咗水,我以為佢死咗先上門黎查喳。明明應承咗個客做野,唔知先生你又知唔知道咩係職權操守?」Veronica不以為然。
 
「沙啦啦—」廁所突然傳黎沖水聲。
 
岑世英即時警惕,閉氣行近廁所。
 
「舒服曬。」關芷怡嘅保鑣阿tim喺廁所行出黎。
 
「屌,仲自把自為用埋我廁所。」岑世英講。
 
「呢啲野我控制唔到架嘛。」阿tim擺擺手。
 




Veronica見到佢頭先表情懶嚴肅,笑咗。
 
岑世英擺出講數款:「喂。之唔係我唔想查,問題我保鑣而家要請請假,一時行唔開。」
 
「喂,關小姐,我希望接下來可以兩個人傾。」岑世英望咗望關芷怡嘅保鑣,暗示要佢地走。
 
「小姐…」阿tim同阿john等佢小姐嘅意思。
 
「得啦,我冇野。你地去休息下先。」Veronica同佢嘅保鑣講。阿tim同阿john聽完自動自覺出咗間屋。
 
「我信唔過你身邊嘅人,關小姐。重返正題,單case我仲做緊野,不過…」
 
「不過咩?」Veronica打斷咗岑世英。「我想要嘅answer,你肯畀我未?」
 
「咩answer?」岑世英一時之間反應唔過黎。
 
「嗰日你send畀我段電話錄音,話『姓廖嘅男人送咗番香港』」Veronica望住岑世英:「呢個『姓廖嘅男人』係咪講緊Derek?」
 
「你睇,呢個就係問題所在。」岑世英解釋。「我當初接呢單case,冇諗過會搞到咁大,連中國大使館都有關係。再查落去點知會唔會再關係到啲高官權貴?」
 
「咁即係『係』啦。」Veronica神色沉重。
 
岑世英走入自己房,喺暗格摷喺中國大使館拎番黎嘅證物:廖家豪嘅armani西裝同公事包。佢將呢啲野放喺臺面:「嗱,我唔係冇做野架。」
 
Veronica見到呢兩樣神色大變,即刻拎起件西裝睇。諗起身昔日時光嘅甜蜜同呢佢表情又擔憂,又想喊。
 
當Veronica睇緊件西裝嗰時,岑世英點著支煙,講:「呢兩件證物我冒生命危險拎番黎。不過而家我保鑣有事要請假,暫時查唔到。我過一排,會盡快重新啟動調查。」
 
「所以你而家冇保鑣?」Veronica問,講完又咳咗幾聲。
 
「係。但我一向牙齒當金使,應承得你就會做落去。」岑世英指指臺面嘅公事包。「而家請你睇下廖家豪嘅公事包。」
 
Veronica聽完打開佢男朋友嘅公事包。
 
「包入面,喺佢一啲個人物品。其中,最引我注意嘅,有兩樣野:第一樣係佢部手機,上咗鎖,你有冇辦法開到佢?」岑世英又食啖煙。
 
「我有識啲咁嘅人。」Veronica答。
 
「搵個信得過嘅。」岑世英望住Veronica,壓低聲音講。「你身邊有老鼠,我諗呢點你都應該清楚。」
 
Veronica唔出聲。
 
岑世英喺個公事包拎咗張卡出黎,問:「第二件喺呢個。你認唔認得?」佢拎住嘅,喺一張會員卡,寫住“Beverly Club”。