「喂,熱水。」
 
岑世英將杯水放喺臺,杯水仲熱騰騰冒住白氣。
 
Veronica兩個黑眼圈勁大,面容憔悴。一睇個樣,就知佢成晚冇瞓過。
 
呢度係偵探所,尋晚嘅驚嚇令到Veronica冇辦法仲留緊嗰緊房,所以岑世英叫咗佢過黎。至於嗰隻斷手,就交咗畀差佬調查。
 
岑世英撓撓頭:「喂,點呀你?要唔要食啲野?」
 




「唔使。」Veronica嘅答案好簡潔。
 
岑世英搖搖頭,攞支煙出黎點著佢。
 
「喂。」Veronica突然間開口。
 
「唔?」
 
Veronica言語中透出疲倦:「你可唔可以唔好喺度食?我唔係好舒服。」
 




岑世英一向「睬佢都傻」,但今次見到佢個樣咁慘,於是搖搖頭,自己出咗門口食煙。
 
「我嗰面嘅調查有啲進展。」岑世英企喺門口出面講:「你而家,想唔想聽?」
 
Veronica冇出聲。
 
岑世英喺門口見到Veronica兩個保鑣:阿tim同阿john,想講嘅野又吞番落肚。佢食完支煙,行番入偵探所。
 
「你暫時住喺呢度先,ok?」岑世英坐番低講。「呢棟野係我地頭,有咩野我都會知,你係呢度會好安全。」
 




「尋晚單野,應該係你身邊嘅人做。可能因為我地開始搵到突破,令某啲人覺得受威脅。」岑世英壓低聲音講。
 
Veronica原本低垂嘅視線望番上黎:「係?」
 
「係。總之,而家開始你要小心啲。呢樣野,你放喺身上。」岑世英將一個小裝置交畀Veronica。
 
「呢樣係…?」
 
岑世英依舊壓低聲音講:「佢會畀我知道你嘅GPS。」
 
等咗陣,佢又講:「上次我畀你睇張會員卡,我黎緊就可以搵到個會所嘅秘密。過埋呢排,我會畀個答案你。」
 
「岑世英。」Veronica突然講。
 
「咩?」




 
「Derek去法國嘅前一日,佢去過個會所。去完第二日就話要去法國。呢樣野,佢之前一向冇提過。」
 
岑世英奇怪:「咁突然?」
 
*************************************************************************
 
陽光普照、萬里晴空,係典型好天氣。炎炎夏日,最適宜做啲同水有關嘅活動。
 
一首白色嘅小型游艇自長洲開船,徜徉海上。
 
船上眾人,有男有女,佢地好興奮咁影張大合照。「yeah~」
 
大合照後眾人開始吹水。
 




「呢位咪沈生?」戴住黑超嘅溫友諒笑住向岑世英打招呼,又向啲侍應點野:「要杯whiskey。」
 
侍應點點頭。
 
岑世英亦都戴住黑超,佢苦笑一下:「溫生,你記性認真唔差,咁都你認得我。」
 
侍應走開咗,去拎咗杯威士忌番黎畀溫友諒。
 
溫友諒飲咗一啖冰鎮威士忌,眯埋眼享受咗陣,然後講:「咁嘅天氣飲埋杯冰鎮whiskey真係人間一絕。沈生,你要唔要一杯?」
 
岑世英擺擺手:「唔使啦。我飲可樂就得。」
 
溫友諒對侍應講:「去拎杯冰可樂畀沈生。」
 
侍應點頭:「係。」




 
冇幾耐侍應拎一杯冰可樂番黎,遞畀岑世英。
 
岑世英講:「溫生,嗰日我喺度諗,你好熟口面。後尾一諗先記起你係個大慈善家。」
 
溫友諒笑咗幾聲:「沈生,過獎啦,虛名姐。我睇,只要沈生想,沈生都絕對有能力做到。」
 
岑世英心諗「哪有錢你老母」,但口頭上講:「溫生,你都幾謙虛,有錢人入面都算幾特別。」
 
「話時話,溫生,你呢度都幾多城中名人有玩。我睇相見到陳耀華都喺呢個會所嘅人。」岑世英啜一啖可樂,扮做漫不經心咁問。
 
成間游艇都唔見陳耀華。最想搵到嘅人偏偏冇出現,冇得同佢對質。
 
溫友諒飲一啖威士忌,眺望海面:「哦,陳生以前一路都時不時黎我地會所嘅活動嘅,今年印象中冇見過佢,我都有啲意外,可能佢有野忙掛。」
 




「以前?」岑世英覺得奇怪。
 
「係。」溫友諒調轉頭望岑世英:「你應該知道失蹤嘅和實集團CEO?」
 
岑世英聽到講呢個名,覺得有啲意外。佢皺皺眉頭,扮鎮靜咁講:「廖家豪?好難唔識佢。當時佢失蹤嘅新聞炒到咁行,全香港都好識佢。點解無啦啦提起佢?」
 
「佢都喺我地會所嘅會員。」溫友諒飲啖酒,又講:「上年有一次船P之後,佢同陳耀華都冇再參加過我地嘅活動。既然你提起陳耀華,我自自然諗起呢件事。」
 
岑世英貶貶眼,問:「咁怪?嗰時發生咩事?」
 
「呢件係上年件事,嗰日船P就黎完嘅時候,我無意中聽到佢地鬧交。」溫友諒開始回憶。「嗰日我放低咗部手機冇為意,後尾我醒起有公事要傾,於是由甲板行入番大廳去拎手機。」
 
岑世英咬住吸管唔出聲。
 
「行近大廳嗰時,我見到陳耀華同廖家豪兩個喺入面係度唔知呦乜野,呦到面紅耳熱。我都唔知佢地兩個幾時入咗黎。」溫友諒繼續講。「我見佢地鬧到咁,我就廢事插手,尊重佢地。我出番甲板。」
 
溫友諒講講下,叫侍應再斟多杯威士忌。
 
「最尾我再入番去房嗰度,佢地已經冇嘈。咁我就以為呢件事已經完咗,都冇放喺心度。後尾廖家豪失蹤搞到滿城風雨,我先一直諗緊呢件事。」溫友諒又講。
 
岑世英聽完講:「嘿,呢啲名人新聞我冇乜興趣。我想周圍行下,失陪,溫生。」
 
溫友諒又唔介意,佢笑住講:「隨便。」
 
游艇上眾女波濤洶涌,睇到岑世英心神蕩漾。
 
「靚仔,做咩咁怕醜唔show你啲肌肉出黎?」一頭波浪長頭髮嘅女人突然搭訕講。
 
岑世英心中暗爽,心諗,自己做窮撚嗰陣,啲女個個退避三舍;而家扮有錢佬,竟然有女主動埋身。
 
岑世英淺笑一下:「我成身冇肌肉,露上身出黎都冇野睇。」
 
「我叫Vivian。」女人還以微笑,一身小麥色健康膚色,加上均稱嘅身材,非常有魅力。
 
「叫我Chris。」岑世英信口胡謅。
 
Vivian擺弄頭髮:「Chris。今日我見你揸間車,我覺得好靚。唔知道,坐入面舒唔舒服呢?」
 
岑世英笑笑:「其中一件玩具姐。到時你入去坐下咪知囉。」
 
岑世英突然見到有啲人入咗客廳入面唔知搞咩。佢問:「Vivian,我第一次黎。啲人行去入面有啲咩搞?」
 
Vivian望咗望,講:「你入去試下咪知囉。」
 
岑世英低頭笑笑:「今次你帶我見識下。下次,我帶你見識下。」
 
岑世英摟住Vivian條腰,Vivian甜笑一下。岑世英都有啲驚訝自己可以做到咁自然。鬼佬形容 “smooth” ,就係咁。
 
行到客廳入面,只見到幾個人圍埋一邊。
 
佢地行到再近啲,見到一個男人大力索啲唔知咩,跟住全身震抖、緊握拳頭,過咗陣先呼口氣:「啊!呼!」
 
岑世英見到個男人嘅人中嗰度充滿住白色粉末,佢轉身想問Vivian。Vivian伸手指做個「殊」嘅手勢,湊近喺岑世英面上印咗一啖,輕聲講:“It’s just for fun.” (求開心姐。)
 
岑世英見到一班有錢佬同女人光天化日喺度肆無忌憚咁吸毒,都覺得幾大衝擊下。有人喺佢會所活動做啲咁嘅野,唔知道溫友諒知唔知道?
 
佢同Vivian行到聚集嘅人度。有個一頭紫髮嘅男人見到佢地兩個過黎,問:「Vivian,呢位靚仔第一次黎?」
 
Vivian望咗眼岑世英:「係呀。阿Chris話想見識下。」
 
「咁就啱啦。呢個係船P嘅精華所在。識玩,一定玩呢啲。」紫髮男人一面講,一面喺臺底拎咗個細袋,然後慢慢喺臺面倒出一列白色嘅粉。
 
紫髮男人擺擺手:「Vivian, 呢啲畀你。」
 
Vivian聽到,烏低身喺臺面用力一索。
 
「吓…吓…」用力猛索之後,Vivian個身都喺咁震,好用力咁呼吸。
 
「哇,好正。」Vivian透順條氣,吃吃咁笑,同紫髮男人講:「畀啲Chris試下。」
 
岑世英掛住睇Vivian喺佢面前食白粉,睇到發呆。而家先反應過黎。
 
「吓?我?」岑世英有啲尷尬。佢雖然生活習慣絕對講唔上健康,但毒品呢啲野,佢從來唔敢掂,毒品,真係唔係人咁品。
 
紫髮男人語氣幾堅持:「靚仔,唔係唔試呀嘛?呢度好多人都食架喎。唔食,等於冇黎過比華利會所。」
 
「呢度個個都食?」岑世英疑問。
 
紫髮男人拎包粉出黎:「好多人你睇樣估唔到,都識得享受呢樣野。」
 
岑世英仲係度猶豫不決。
 
Vivian伸手拎包粉,用挑逗嘅眼神望住岑世英。
 
岑世英不明所以,望住Vivian。
 
Vivian撕開個包,慢慢倒包白粉落心口度,望住岑世英,逼佢望佢嘅姣好身材。
 
岑世英心諗:「今次大檸樂。唔通真係要食?」