無品神探: 第二十五節
見到溫友諒由食物引伸到咁多野講，搞到岑世英已經唔知道講咩好，只好望住對方。
明亮嘅大廳入面，侍應安靜嘅企喺四角候命。
「沈生，你明唔明？呢個世界其實好虛無，名同利，同埋好多野，都係human construct。人造嘅。」溫友諒陷入沉思。「正所謂『生不帶來，死不帶去』，就係咁解。」
「就係虛無，所以應該有一個信念，或者有一樣野好好抱持住。咁樣先唔會白過。」岑世英終於諗到野講，仲要聽落都唔失禮。
溫友諒似乎冇聽到岑世英講嘅野，只係繼續講：「duality，兩個對立嘅概念，其實可能兩者比想象中都接近。」講完，拎起部手機㩒咗幾下。
現場開始樂韻悠揚，播起咗爵士樂。岑世英環視幾下，又望番張臺。
「就好似『聰明』咁，字面意思就不言自明。但如果人講『太過聰明』，呢個時候『聰明』就等於佢嘅反義詞。」溫友諒停咗一下，又講：「不過，其實或者更應該形容一個人『唔夠聰明』，因為佢唔夠醒去分析局勢：邊啲事要聰明啲，邊啲事要冇咁聰明。」
「就好似你咁，究竟你係屬於『聰明』，『太聰明』定唔夠『聰明』？沈生？」溫友諒微微坐前個人，講：「抑或稱呼你做『岑生』？」
岑世英聽到呢一句心頭一震，懶意全消，亦知道自己身處何方。佢望住對方講：「你一早知？」
「其實我知啲咩，根本冇意思，亦冇必要話你知。」溫友諒直視住岑世英，淡淡咁問：「反而係你，明眼人都知道呢個係陷阱，你都照黎呢度。你係『聰明』定『唔夠聰明』？」
「我做人，從來唔怕難。」岑世英不卑不亢咁講。「做衰人、做人渣、順住生物自私本性做野，根本毫不費力。做好人、照原則做野，呢樣野先難，先考驗到人，唔係人人都做得到。所以，我永遠跟自己原則做人。」
「鍾意挑戰，有原則係一件好事。」溫友諒低頭一笑：「不過，只怕你都係屬於『唔夠聰明』嘅人。」
岑世英冷哼一聲：「當中國大使館都牽涉在內，我都繼續查落去嘅時候。你就好清楚，我唔係一個怕難嘅人。」
「哈哈哈哈，有膽識，我都知道係你做嘅。我只係使少少錢，叫佢地幫我個小忙。」溫友諒笑咗幾聲，不過好快轉做惱怒嘅樣。「佢地真係低效率，即使我一早叫佢地收好手尾，隔咗一年都依然留低證據。早知我就親自飛過去監督一下。」
岑世英望住溫友諒，問：「你講嘅幫個小忙，就係捉廖家豪返黎？」
溫友諒笑咗笑，講：「佢同你都好似。都係唔夠『聰明』，唔識得分析邊度要醒啲，邊度要冇咁醒。去人地嘅地方玩，竟然仲特登理埋人地嘅私事。」
「私事？咩撚野私事？啲長洲失蹤嘅人，睇怕都畀你殺咗啦？呢啲都叫私事？」岑世英有啲憤怒。
「就以我做例子。」溫友諒慢慢咁解釋：「雖然我做公益事務，有自己公司，但亦有我嘅私人時間。我以個人身份，喺我私人時間做嘅野，就係私事。呢度係我私人地方，你而家就係侵犯緊我私隱。」佢講嘅野，同講野嘅語氣，似曾相識。
岑世英憤怒嘅指住對方講：「你學撚咗六八九？你講乜撚野呀？」
「你唔使咁激動。」溫友諒保持住一向嘅平靜，講：「而且，殺殺聲咁難聽。我會講，佢地被賦與新嘅使命。」
「新…新嘅使命？」岑世英狐疑地問。
「人體唔少部分都好有用。」溫友諒輕皺眉頭，沉思住講：「身體可以用刀雕刻，滿足下創作慾。一般黎講，女人會好啲，可以滿足下性慾，畢竟性係生物本能黎。係喇，仲有臺面呢幾道菜。」
岑世英不可置信咁望對方，內心排山倒海咁充盈住想嘔嘅感覺。
「你個死變態…」岑世英瞪住溫友諒。
「你睇，人永遠只係睇表面就妄下定論。睇書都唔可以只睇封面。」溫友諒一副司空見慣嘅樣。「頭先你都話好味，一知道係咩黎就扮曬反感咁，你唔覺得好虛偽咩？點解唔可以好好享受，好好欣賞大自然天賜嘅禮物呢？」
「黐撚線…」岑世英瞪住對方，只感到極度反胃，諗起身自己食咗人肉落肚，實在控制唔到身體打冷震。
岑世英身體微微顫抖，問：「你殺廖家豪，因為佢發現咗你嘅真面目，係咪？」
溫友諒只係微微笑住，唔出聲。
「你殺完人，廖家豪去你會所嘅時候，發現咗你行凶。所以你想殺埋佢，但礙於佢嘅身分地位，一時唔成功。」岑世英瞪住溫友諒講。「佢知道你追殺佢，於是走去法國避難。」
「於是你就使錢叫中國大使館嘅人，捉佢返黎，再殺人滅口。又驚畀人知道你殺廖家豪，於是老屈人地做新移民『鄺寶萊』。」岑世英繼續。「但你百密一疏，估唔到大使館做野咁低效率，要銷毀嘅證據仲喺度。亦估唔到有我咁嘅人，大使館都夠膽搞。」
「拍。」
「拍。拍。拍。拍。」
溫友諒緩緩而充滿節拍咁拍掌，成個大廳都聽到佢嘅掌聲。
「真係一個好好聽嘅故仔。」溫友諒一邊拍掌一邊講。「就好似一套電影咁。你想象力咁豐富，其實可以考慮下做編劇，一定前途無限。你講咗咁耐，係咪會以為我會講曬所有野出黎？我點解要咁做？」
「不過，呢個世界上只有一種解釋？如果我話，廖家豪佢同我根本一樣，佢都識得好似我咁享受人嘅味道，佢手機嘅相，就係佢自己嘅戰利品。佢之所以死，係因為得罪咗人呢？」溫友諒目光直透人心底。「又譬如話陳耀華，你覺得佢好乾淨？你覺得你玩偵探遊戲嗰陣，查到咁多佢嘅野，純粹係關我事？」
岑世英諗番起自己查案嘅時候，的確總係查到關陳耀華事。佢覺得陳耀華可疑，其實因為佢本身真係好可疑。不過溫友諒會知道咁多佢查案嘅野，明顯監視或者監聽過佢，肯定亦脫唔到嫌疑。
「其實你永遠都唔會有所謂『真相』，最多只係會知道一啲『事實』。兩樣野其實有啲分別。我嘅話，會鍾意睇住人帶住不解咁離開人世。」溫友諒講：「好啦，聽夠你嘅故仔。都冇乜有趣嘅野，我厭啦。」
溫友諒敲敲臺面，大廳驟時操入一堆兩排身穿黑衣嘅彪型大漢，一排五人，一共十人。大隻佬全部手執武器，唔係刀，就係鐵通。驟時間，大廳入面殺氣騰騰。
「你睇，做人有時都係隨波濁流好啲。捨易取難係要付出啲代價。」溫友諒擺擺手向啲大隻佬，對住沉默嘅岑世英笑。
「陳耀華。」岑世英終於開口。「你搞咁多野想誤導我查佢，其實無謂。」
溫友諒只係保持笑容，面容興奮。
「Cindy吓嘛？」岑世英冷哼一聲。「你其實唔應該搵一個比華利會所嘅人黎誤導我。」
「你知唔知道，我點解要喺殺你之前，同你講咁多野？」溫友諒側住頭，眯住眼問。
「自大？你覺得自己好威？」岑世英講。「好想話畀人知？」
「係期待。嗰種知道我下一分鐘會隊冧你嘅感覺。」溫友諒吞一吞口水。「呢種感覺…令我血脈賁張。正如前戲往往更令人興奮…」
岑世英流緊冷汗。
溫友諒上下打量岑世英：「可惜呀。如果你係女人，我可以『食』完你之後，再真係食你落肚。係男人，就只可以乖乖地，做雕刻品、做食物。」
「哦，你想搵你保鑣？」溫友諒見到岑世英流曬冷汗嘅樣，用挑釁嘅語氣問。
岑世英答：「係。而家可唔可以？」佢其實都一直想問阿強去咗邊。
溫友諒即刻大笑：「哈哈哈哈！哈哈哈哈！」笑聲響徹大廳。
岑世英跟住苦笑。
「你要保鑣呀嘛？好，就畀保鑣你。」溫友諒連拍兩下手掌。
等咗陣，大廳入面一道門打開咗，有兩個人行咗入黎。
「嗱！你要嘅保鑣到啦！哈哈！哈哈哈！」
岑世英笑唔出，佢望住行入黎嘅兩個人，一臉震驚。
行入黎嘅兩個人，一個低壯一個高大，手執手杖，面無表情。
Veronica嘅兩個保鑣：阿Tim同阿John。