今日黎之前我應承左二家姐係走之前要還原間屋,要做到好似黎之前咁。 

所以係今晚訓之前我決定先dup左包垃圾,費事留過夜同埋怕聽朝唔記得dup。 

我揀左係佢地五個瘋狂自拍同吹水果陣出去dup,反正我都係唔需要係度的。 

我唔係度佢地傾得好似仲開心添哈哈。 
我拎住包垃圾,孤獨地咁行去垃圾站。 

二月既夜晚,再加上微雨加持,令到天氣都幾凍下,我仲要無著到䄛出黎,今次仆街了。 



咁既情況下,我唯有急步行,可惜垃圾站距離有少少遠,我返到去樓下個陣已經連續打左好幾個乞癡。 

不過,我見到一樣令我意想不到既野,就係Anna企左係屋企門口。 

Anna:「dup包垃圾都dup咁耐架你,無鬼用。」 

我:「咁包垃圾重咪搞到我行慢左囉Anna姐,咁你係度做乜..乞癡!」 

Anna:「你睇下你,明知出面落雨都唔著多件衫,嗱,比你架。」 



Anna遞左杯野比我,就咁睇都見到上面不斷散發出蒸氣,一定好暖。 

果然,我用雙手接過之後對手即刻feel到暖意。 

我:「唔該你啊,我成個人即刻暖返好多,但點解你係度既?你地唔係傾緊計架咩?」 

Anna:「佢地攰到入房訓左喇。」 

我:「咁你呢?做乜咁凍仲走落黎?」 



Anna:「係咪真係要人講到出口呀你。」 

我:「唔?做乜?我唔明喎?咁凍你企係度就係為左等我?」 

我講完就飲左啖頭先Anna遞比我杯野,原來係熱朱古力黎,仲有D好細粒既棉花糖。 

Anna:「係呀傻仔明!見你著得件T-Shirt出去怕你會凍親咪沖定杯朱古力等你囉! 」 

真係吖,點解會咁好架。 

我望一望杯熱朱古力,突然有一個主意。 

我:「你想唔想飲啖朱古力?」 



Anna:「嗯?唔洗喇,我一陣自己沖杯咪得。」 

我細細啖咁飲左一啖朱古力,然後一下錫落去Anna度。 

之前唔記得睇過邊套動畫個男主角咁做,覺得咁做好型,一直好想試下。 

不過幻想總比現實好,唔知係我問題定係Anna比我嚇親,當我想送D朱古力去佢個邊個陣,D朱古力就漏哂出黎,搞到成地都係。 

我地兩個各自退後左一步,望住地下個灘熱朱古力,再對望左一下。 

對望個下唔知大家邊條筋短路左,一望到對方大家都大聲咁笑左出黎。 

之後大家都無講d乜,好有默契咁拖住手返入屋。

返到入去一個人都見唔到,果然好似Anna講既咁,全部都入房訓哂。 




我同Anna坐左落左梳化,望住部無開既電視,持續左成半分鐘有多。 

我:「好喇,都夜架啦你去訓啦,我去沖個涼先。」 

Anna:「唔好走..陪我傾多陣先。」 

Anna捉到我實一實,我想走都走唔到,唯有繼續坐係度。 

不過都無壞既,我都好似好耐無咁樣單獨同Anna傾計。 

我:「好啊,咁你想傾乜?」 

Anna:「唔知啊..我地識左幾耐?」 



我:「我諗應該一年多D喇,上年先同你同一班既。」 

Anna:「係囉可,真係識的話應該係一年多少少啦。」 

我:「真係識?即係你係再之前已經識我?」 

其實我係明知故問,因為我之前已經係Anna間房見過我同佢果張所謂「合照」。 

Anna:「係啊,中二果時已經知道有你呢個傻仔啦。」 

我:「咁…」 

死火,我突然唔知應該點樣再講落去添。 

Anna:「當時我仲係度諗點解會有個咁傻既人,心諗一定唔好同呢D人做朋友,點知下一年就同你同班啦哈哈。」 



「不過同你相處落先發現你係個好有意思既人,比起係學校見到既人更有趣。」 

「你雖然唔夠人有錢,係學校又成日俾人蝦俾人玩,但你都無怨天怨地,反而努力咁過好每一日。」 

「你每一件事都會好努力咁去做,我真係好鐘意咁樣既你。」 

哇做乜突然告白既?我一時之間轉唔切台喎! 

Anna放開左我,再係我臉上留低一個吻。 

Anna:「好喇早抖啦,聽朝再見喇我地。」 

講完佢就走左去,留低我一個on99咁坐係張梳化。 

仆街,巨龍哥成日都無乜反應,而家先醒? 

唉以免一陣訓教尷尬,都係沖涼果陣打個飛機先。 

我好快咁沖左個涼同哂左少少時間打飛機,終於可以訓教。 

咦?度門鎖左既? 

仆街!呢間房都鎖埋既? 

全房既睡房都上哂鎖!?唔係咁大整蠱呀老細?? 

咁我今晚訓邊呀?