仲可以訓邊吖我,唯有做廳長啦今晚。 

痴線既訓教鎖門都有既,仲要唔只一間房喎,三間房全部都係上鎖既,真係俾你地吹脹。 

我有諗過爆門入去架,但費事嚇親佢地,所以我決定左都係乖乖咁做廳長。 

好彩張梳化夠冧夠舒服,訓落去好似張床咁,我先有覺好訓。 

一睜開眼,個天已經光哂,佢地五個仲好似去睇熊貓咁係度望住我,嚇到我即刻彈左起身。 



Sarah:「訓醒嗱你?我地隨時行得架啦。」 

Anna:「都唔明你做乜有房唔訓走黎訓梳化。」 

有房唔訓?你地仲好意思講既!明明就係你地用哂D房!仲好意思講! 

我:「咁你地用哂三間房..仲要鎖埋門..我咪唯有訓廳囉..」 

Ellen:「咩呀,我地留左樓上果間房比你架。 」 



樓上間房?噢!!係二家姐果間房!! 

成個二樓係得佢一間房架啫。一定係講緊呢間。 

大家姐千叮萬囑叫我千其唔好搞到呢間房架,佢地唔係入左去呀? 

我:「果間房?你地唔係入左去呀? 」 

Ellen:「入左呀,有乜問題?」 



我:「你地無搞到入面d野吖嘛?間房..」 

Ellie:「間房咩都無架啊明,只有張書檯,衣櫃同埋張床。」 

咩都無?咁點解大家姐千叮萬囑咁叫我唔好入呢間房? 

唉,都係唔好諗咁多喇,快D同佢地走人,費事佢地再走入去呢間房搞搞震。 

就係咁,我野都未食就帶住佢地返去,逐個逐個咁送佢地返去佢地屋企。 

Anna:「學校見啦傻仔明。」 

Ellen:「唔好唔見個樽呀你!唔見左的話我會殺左你架。」 

Ellie:「快D返去食野啦,你起身到而家我都未見你食過野。」 



最後,我就同Yui仲有Sarah一齊返屋企。 

返到去果陣,大家都仲係度食緊早餐,你話可想言之有幾早。 

我:「我地返黎啦。」


Uncle:「咦你地返黎嗱?我頭先仲同佢地講話估你地食埋lunch先返黎添。」 

我:「無啊無啊其實我連早餐都未食,而家好肚餓。」 

Uncle:「咦咁快D坐低食啦,反正佢地一時無為意整埋你地果份,食完有野想同你傾。」 

有野要同我傾?唉唔理咁多喇我而家好撚肚餓,有乜等我食完野再算! 



我同Sarah佢地放低個袋,行埋餐檯食野,Yui仲要拎住支玻璃樽埋去,被羽晨係咁追問係咩黎。 

我就一於少理,專注係食果方面,事關我真係好肚餓,嫌我煩我都要講多次。 

雖然我就係好專注係食度,不過對耳就好得閒既,仲可以聽到佢地傾計講D乜既。 

大家姐:「點呀你兩個尋日同阿明出去玩得開唔開心?」 

Sarah:「開心呀!阿明帶左我地去睇同玩好多得意野!Yui手上呢個玻璃樽都係阿明送比我地架!我地每人都有一個!」 

羽晨:「個樽好靚啊!可唔可以比我睇下呀Yui姐姐?」 

Yui:「唔可以..!呢個係..」 



咦?我係咪聽錯?Yui拒絕羽晨既要求? 

就算我食緊野我都忍唔住抬高頭望下對面,睇下到底發生咩事。 

只見到Yui緊緊咁攬住個可樂樽,羽晨就一臉愕然咁,成個場面有少少尷尬。 

我:「羽晨,哥哥都有一個呢D樽啊,不如一陣我拎比你睇,你就唔好搞Yui姐姐啦。」 

羽晨:「知道!對唔住Yui姐姐。」 

Yui:「唔係應該係我講對唔住先係..」 

大家姐:「哈哈兩個傻豬,快D食野啦D野凍啦!」 

Yui:「知道。」 



羽晨:「係既大家姐!」 

無事就好了。 

Uncle:「阿明,食飽未?食飽就跟我上書房,有重要事要同你傾。」 

我:「哦,我食飽架啦,但我想去洗手間先。」 

Uncle:「好,咁我地係書房等你。」 

我好快咁去左個洗手間,洗好臉執好個人就去書房搵Uncle。 

食飽飯先記起正經野,唔知Uncle搵我咩事呢? 

我輕輕敲左兩下門,之後就推門入去,見到Uncle坐左係張大班椅度,不過令人意外既係二家姐都係度。 

佢橋埋雙手咁企埋係一邊,雙眼緊閉住。 

Uncle:「黎左嗱?坐低先啦阿明。」

Uncle:「黎左嗱?坐低先啦阿明。」 


睇電視見D人叫你先坐低多數無乜好野,Uncle到底想同我傾D乜。 

檯面上仲要有個公文袋,二家姐仲要咁樣企係旁邊,真係搞到我好不安。 

我戰戰競競咁行去書檯前坐低,一直係度觀察Uncle既臉色,睇下可唔可以從中大慨估下咩事。 

不過佢個樣仲係同平時一樣,笑笑口咁完全睇唔出佢想講乜。 

Uncle:「好嗱阿明,無謂說話我唔講咁多免得浪費時間,你知道李生好欣賞你架?」 

我:「係..我知道,都係李生佢睇得起我啫..」 

Uncle:「佢想你代表佢既李家,成為七星代表既一員。」 

我:「吓?你講笑咋?」 

仆街一時口快講左出黎添。 

Uncle:「今次唔係講笑,佢真係咁同我講,仲有好好咁同我解釋理由添。」 

我:「理由?咩理由呀?」 

我忽然激動起上黎,因為而家呢件事對我黎講好重要。 

Uncle:「佢話因為你既行動,七大家族入面既其中三個家族都無左代表,其餘既家族開始蠢蠢欲動。」 

吓,雖然係我拖冧左你個孫啫,但你都無理由要我頂上架?更何況七星代表都係一班口靚仔,可以做咩? 

Uncle:「你要知道,若然可以搶到「七星第一」呢個名,對於果個人既集團自己既發展絕對有利。」 

「正因為咁,李生需要一個有能力既人,所以就想搵你。」 

我:「吓但係我只係一個外人,又點幫佢?」 

Uncle:「若然你應承的話,李生佢會同你上契,咁你就可以代表李家。」 

「李生希望你唔好有咩負擔,想你當七星係一份parttime咁做,公文袋入面既會係你既人工。」 

「係一間屋同五百萬港幣,你自己考慮下喇。」 

嘩屌!咁多?邊度有partime有咁多既人工呀!? 

「雖然我唔係好想自己既仔女參與呢D權鬥,不過若然阿明你..」 

Uncle講到一半電話就響,打斷左佢既發言。 

「喂?係我係。咩話?我而家即刻返黎!準備開會!」 

聽到「即刻返黎」呢四個字,二家姐睜開左眼,望住Uncle。 

二家姐:「Daddy係咪有乜事..?」 

Uncle:「無,無乜事,但係我而家要返公司一轉,呢件事我地遲下再傾喇。」 

Uncle講完即刻拎起身邊既西裝䄛奪門而出,留低我同二家姐係書房。
Uncle走左去,搞到氣氛好尷尬,我又唔知點同二家姐打開話題,都係三十六計走為上計。 

我:「咁..我出返去先喇二家姐。」 

我企左起身,轉身準備離開。 

二家姐:「你會點做?應承定唔應承?」 

二家姐突然問我呢件事,令我停左係度,仲差少少仆街。 

我:「我諗我都係會拒絕架啦…始終呢D野唔岩我,我去呢d party連呼吸都會唔舒服,仲做乜鬼七星。」 

二家姐:「但你自己應該好清楚七星代表權力同財勢架,你唔想得到咩?」 

「好老實講,我地屋企過多三世都無可能做到七大家族,而家有個咁既機會你都唔要?」 

我:「呢d野的確係好吸引,但係我已經受過一次血淋淋既教訓,我唔敢再黎多次。」 

「你應該都好清楚架,當時我直頭好似顛左咁,差d連朋友都無哂,我真係唔敢再黎多次。」 

「就算回報係咁豐富都好,我始終唔敢再冒呢個險。」 

我懶係型咁拎起檯面個公文袋,結果居然界親隻手指,爆缸。 

屌,成件事即刻柒哂。唔係而家應該要止血先,有無人有紙巾? 

二家姐:「雖然仲係咁on9,不過睇黎你真係稍微成長左少少。」 

「止左血之後就去搵Yui貼膠布啦。」 

二家姐拎左張紙巾,幫我禁左一下出血既位置,之後就係我身邊離開。 

咁其實佢想做乜?我唔明喎。