「續寫」無啦啦多左幾個家姐同阿妺: 代價

咁之後Uncle都返左黎，好似頭先大家姐咁問我點解要去做七星。 

我原本諗住不厭其煩咁再解釋多次，不過大家姐係呢個時候走左出黎，係Uncle耳邊講左幾句，Uncle既表情就180度轉變，開心到顛。 

Uncle既反應非常誇張，不斷拍我膊頭猛讃我生性，我個膊頭幾乎被佢拍爛。 

不過除左讚美既說話之外，Uncle亦提我叫我小心d，前面既路未必易行，之後就放我走。 

我出左書房之後第一件想做既事就係去搵二家姐，但好快就打消左呢個念頭。 



二家姐而家嬲到咁，我自己咁快去搵佢真係分分鐘會俾佢打。 

都係等大家姐佢同二家姐傾下先。 

如是者又過左幾日，呢幾日我都無見過二家姐，佢好似一直留係自己房。 

新年假已經放完，今日又要返學。 

Sarah佢地個個都容光煥發，好似放左一個美好假期咁。 



相反我就好似十日無訓過，渾身無力。 

啊七星果件事我無同Sarah佢地講，算係自己一個少少既秘密。 

其實係因為我仲未諗到應該點同佢地講好，唔知點開口好。 

不過呢個祕密keep唔到好耐，因為我仲有幾位朋友。 

阿惠：「喂阿明你要做七星呀？ 」 



屌你老母咩阿惠…成十幾日無見你一黎就講呢D？


阿惠一講完我就俾Anna同Ellen係左右兩邊捉住我。 

Anna，Ellen：「係咪真架阿明？」 

我：「係…我應承左李生代表李氏做..」 

Sarah：「幾時既事架！點解我會唔知！」 

我：「因為我都唔知點同你地講好..咪諗住遲下先同你地講，我唔係有心瞞你地架。」 

阿惠：「咦我突然醒起有D野要做，我都係走先，一陣見喇阿明同埋各位阿嫂。」 



喂你爆完我大鑊之後就想就咁走左佢？邊有咁易！ 

我：「喂你企係度！」 

Ellen，Anna：「陳煒明你同我企係度就真！」 

仆街，我居然會被佢地一下禁住，郁都郁唔到，佢地點解會咁大力？ 

Anna：「你要好好咁同我地解釋一下到底係咩一回事。」 

屌，我開始流汗，唔通我驚？ 

不過點解佢地聽到七星會有咁大反應？聽落仲要係負面反應居多。 

就係咁，我係完全動彈不能既狀態下被佢地四個押左去學生會室。 



一入到去，我就被掟左去坐低，係差在佢地無拎支檯頭燈照住我，如果唔係就十足十審犯咁。 

Ellen：「講！點解要去做七星？」 

我又再一次複述返之前同大家姐講既野，今次既聽眾聽完無乜反應，只係得Sarah一個衝左埋黎攬住我。 

Sarah：「對唔住呀阿明我頭先咁重語氣，我唔知你係為左屋企先…」 

我：「無事無事，七星啫，又唔係黑社會，唔怕既。」 

Anna：「你真係咁諗？你會唔會太睇小七星？」 

我：「吓？即係咩意思？你想話七星其實係黑社會？」 



Ellen：「都係差唔多既野啦，唔通你以為真係就咁坐係度傾下生意咁簡單？」 

「佢地之所以可以長期保持係全香港最有錢既七個家族，係因為佢地會一齊合力剷除潛在既對手。」 

「令到個市場始終對佢地有利，無人會威脅到佢地。」 

「而且手法更係層出不窮，再污糟既野都會做得出。」 

Anna：「Ellen講得無錯，我Daddy有朋友試過比七星搞到公司要執左去，我怕阿明你唔夠佢地玩。」 

Anna講完之後大家都靜左落黎，你眼望我眼咁。 

最後，沉默由我打破。 

我：「Ellie，我想聽下你意見。」




之所以會係Ellie係因為我一直覺得Ellie係我地咁多個入最醒最冷靜，要問意見一定係搵佢。 

而且，由頭先開始我就留意到佢一直都用一個好開心既表情望住我。 

Ellie：「我覺得無乜野吖，我相信阿明啊。 」 

Ellen：「Ellie！ 你都應該知道…」 

Ellie：「我知啊家姐，我知道要阿明佢突然去面對所有七星可能會有D風險，但一直以黎唔係都係咁架咩？」 

「阿明佢一直以來都好努力，我相信佢今次都可以安然面對。」 

「而且佢仲有我地啊，如果我地都唔信佢，咁仲有邊個會支持佢？」 

「既然阿明都應承左囉，我地可以做既就係支持佢同相信佢。」 

我聽完之後差D忍唔住拍手，好彩有人開門入黎，係阿威。 

阿威：「咦乜咁人齊？」 

Anna好似仲係唔服氣咁，將成件事一五一十咁講哂俾阿威知。 

Anna：「嗱，阿威你點睇？我始終唔想俾阿明去，風險太大，可能要付出好大代價。」 

阿威：「唔…我就咁諗，今次未必係壞事既，只要阿明仍然係我地識既阿明就得啦。 」 

「而且我有可以降低風險既方法，不過一黎就要阿明咁做的話唔知班七星要阿明付出咩代價。 」