「續寫」無啦啦多左幾個家姐同阿妺: 交易
要係Uncle返黎之前搞掂呢件事。
我：「Eh..我諗呢件事唔係好方便係度講，可唔可以請你稍移玉步上書房？」
李生環顧四週，之後點頭示意無問題，於是我就帶左佢同佢兩個保鏢上書房。
去到書房我並無帶佢去平時用黎傾野既書檯度，而係帶左佢去旁邊既細梳化度。
記得以前睇書講過，要同人講數必須要同對方處於同等或者高於對方既位置，講數先有力。
講到尾，即係話係氣勢上唔可以輸比人。
但對方係全香港最有錢既人，用一個高高在上既態度黎交涉係無可能既事。
所以我唯一可以做既就係盡力令自己同佢處於對等既狀態，呢套梳化就係最適合，因為坐落去大家都一樣水平，無分主客。
李生：「係到就無問題喇，點呀考慮成點？」
我：「我可以代表你去做七星，但係有條件。」
李生：「條件？幾得意吖即管講黎聽下。」
我：「一口價，五千萬，你俾五千萬我我就做七星。」
聽到五千萬呢個數之後，李生身後果兩個保鏢即刻有反應，相反李生仍然無動於衷，果然係有錢人。
李生：「你憑咩覺得自己可以同我講條件？要我俾五千萬你呢個乳臭未乾既細路？你訓醒未？」
「要我出一筆咁大錢去請一個人坐係一個咁高既地位？大把人唔洗錢都肯去做啦。」
態度突然轉變得咁快，由一個和藹可親既老伯變成一個極具氣勢既商業家，我不自覺咁縮左一下。
但我好快就重整旗鼓，因為我知道我唔可以衰，成家靠我架今次。
我：「因為我知道你需要係而家七大家族既混亂狀況入面搶佔先機，但你身邊又無可用之材。」
「你個孫受盡其辱既事一早已經傳遍成個商界，你無可能用佢，因為咁只會令李氏蒙羞。」
「所以你並無選擇，除非你想拱手相讓出七星首席所帶黎既效益。」
呼，好彩仲記得Uncle講關於七星既野，先可以拋下佢。
而家就睇下佢有乜反應。
雖然我有好強烈既理據去支持我自己，但佢始終無所動容。
李生：「香港咁大，你覺得我一定要用你做代表？」
「就算香港無人，我都可以係我公司搵到人用。」
「「唔好以為自己係特別既一個啊後生仔。」
「只要我想的話，你甚至會即場死係度。」
聽到「死」呢個字，我feel到自己後頸涼左一涼。
因為我知道佢真係可以做到。
唔通真係無辦法說服佢..？我要求佢？
「或者你話俾我知，點解你覺得自己值五千萬咁多？」
唔係…我仲有機會…
其實我開五千萬係預左佢會還價，但無諗過佢講價都唔講，直接追住「錢」呢個point黎咬我。
不過既然而家佢問點解我覺得自己值五千萬，即係話我仲有機會去說服佢。
好，振作啊陳煒明，仲有機會架唔好灰心。
我：「咳咳。」
先清一下喉嚨，增強下氣勢，俾個下馬威佢先。
我：「因為我覺得自己已經係你地個階級入面打響左名堂。」
「我相信你都好清楚，你個孫阿偉同埋貴為七星楊氏同劉氏既代表既阿傑係因為邊個先會有而家既下場。」
「無錯，係因為佢地同我鬥。係因為我既行動，佢地先會一敗塗地。」
「年初二既晚會，我發覺有好多人係知道我既身份之後都會驚，證明我已經出左名，唔係咩？」
李生：「繼續講落去。」
「至於人際關係方面，我既女朋友分別係曹，陳，江三家既千金，雖然唔係七星，但財力都有返咁上下。」
「而且另一位七星，藍洛晨，佢係我朋友，咁即係話我有大量關係，可以話係有好強既後盾。」
「有咁多好牌係手既我，你仲可以搵到第二個去代替？五千萬絕對值啦李生。」
我一鼓作氣咁講完一大輪野，口都乾埋，不過對方都係無乜表示。
但係我今次無好似上次咁頭dup dup，因為我知道自己係漸入佳境。
我一一咁列哂我有既條件之後我就覺得佢會應承，信心即刻返哂黎。
李生：「我轉個問法啦不如，你點解要五千萬先肯去做七星。」
聽到呢個問題我即場打左個突，因為呢樣係我既弱點，但我知道瞞唔過佢，所以我決定坦白從寛。
我：「因為曹Uncle公司出左…」
「哈哈哈哈！你仲有好多野要學呀後生仔！」
吓？
我又打多個突，完全唔知發生咩事。
我望住佢，佢居然笑到四萬咁口。
李生：「任何時候都唔會向對方露出底牌呀阿明，你要記住。」
「我欣賞你！年紀輕輕都夠膽同我呢個係商界打滾左咁多年既老野講數，仲要係為左屋企人，抵讚！」
「而且係聽完你sell自己之後我更覺得自己無揀人，你有本錢亦有潛質成為商人！ 」
我：「咁即係話…」
李生：「交易成立！五千萬我俾！」
「我俾」呢兩個字只係傳入我耳仔短短一秒，我就成個人開心到彈起。
我終於得左，咁樣的話大家姐佢地都唔洗為錢而煩，Sarah佢地亦可以繼續過而家既生活，太好喇。
我總算為呢個屋企做返少少野喇..
李生：「不過阿明，七星唔係咁易做架，你要有心理準備。
」 呢個時候你講呢d野我又點會聽得入耳吖。
「咦？黎左架李生？阿明你都係度既？
」 係Uncle喎，時間岩岩好，我岩岩已經解決左問題啦。
李生：「哦，係阿曹呀，我頭先冋阿明傾七星D野啫。」
Uncle：「哦，我之前都係同佢提過，或者遲D我再同佢傾，睇下佢意願，我地不如傾返正經野先。」
係喎，李生黎搵Uncle到底咩事呢？
李生：「哦，果件事唔洗傾啦，我聽日就過一億比你。」
嘩一億既大生意傾都唔洗傾就拍版？
Uncle：「我地唔係傾話五千萬賣我公司5%股分比你咩？幾時變左一億咁多。」
李生：「股分唔洗賣啦，呢一億當我借又好咩都好啦，唔洗太介意。」
Uncle：「吓咁點得呀，大拿拿成億喎。」
李生：「你個仔非常有意思，絕對值一億。」
Uncle：「我唔係好明你咩意思。」
李生：「你個仔頭先為左你地同我講數，要我出五千萬佢先肯做七星。」
聽到李生咁講Uncle即刻用一個好錯愕既眼神望住我。
我：「係，我係有咁講..」
Uncle：「阿明..你要做七星？唔洗為左屋企勉強自己去做架喎。」
而家都已經洗濕左個頭，返唔到轉頭啦..
我：「唔緊要啦，應該無壞既。」
我好想反悔架，但我怕我而家反悔的話屋企會一蚊都拎唔到。
我真係無得返轉頭。
Uncle聽到我咁講之後好似好失望，我諗佢真係好唔想我做七星。
李生：「唔洗咁喎，咪俾佢試下體驗下我地個圈子囉，反正你日後都諗住比佢繼承你公司架啦。」
「我好耐無見到有人咁有膽識，佢好有潛力，一定可以做好既。」
Uncle：「既然你都咁講，咁好喇…」
李生：「細節既事我遲下再黎搵你地傾啦，我仲有野做，走先喇。」
Uncle：「咁我送你，阿明你留係度，我一陣有野要同你講。」
我：「哦我知道喇。」
睇黎佢想炳我一鑊，唉…
之後Uncle就送左李生出去，留低我一個係書房。
過左無耐，我就聽到開門聲，估唔到Uncle咁快就返黎。
但原來開門既唔係Uncle，而係大家姐同二家姐。
大家姐同二家姐黎做乜？Uncle叫埋佢地黎傾野？
不過細心D留意下，發現大家姐同二家姐兩個既表情非常唔同，可以話係天淵之別。
一個一臉哀愁，一個就好似食左炸藥咁，額頭直頭好似寫左個「嬲」字係上面咁。
至於邊款表情係屬於邊個，相信大家都知道喇。
我：「大家姐你地…」
大家姐：「阿明你係咪要去做七星..？」
我：「係.係啊，岩岩應承左…」
大家姐：「點解啊..為左乜？」
為左錢，無理由咁樣同佢講架。
正正因為我猶豫左短短一下，二家姐就大發雷霆，衝左埋黎捉住我。
二家姐：「問你點解去做七星呀！答喇！！
」 我真係嚇親，完全無諗過二家姐會咁激動。
二家姐：「你果日明明同我講話唔會去做七星，怕再出事，你轉個頭就去應承人？」
「係咪因為見屋企有事所以就去搵定後路呀！想保住自己呀？？」
「我真係睇錯左你，以為你成長左少少，原來係倒退，呸！」
二家姐好似一把機關槍咁連環發炮，我完全搵唔到位應佢。
佢講完就放開手，推開左我，揮䄂而去。
而我仍然搞唔清楚到底發生咩事，成個人呆左咁坐左係地下。
直至大家姐佢拍我膊頭，我先回過神來。
大家姐：「對唔住呀阿明，係咪嚇親你？我都無諗過阿May會有咁大反應。
」我：「哦…我無事，但係點解二家姐佢會咁樣..」
大家姐：「黎啦坐返好先再講，我會話你知既，不過係咁之前，我想你話我知點解你會突然應承左做七星先。」
反正呢度得我同大家姐，都唔需要隱瞞D乜，我索性一五一十咁講哂俾大家姐知。
大家姐聽完之後將我成個頭塞入佢個胸度，仲係咁摸我個頭，搞到我幾乎抖唔到氣。
以前大家姐咁對我的話巨龍哥一定會起身，但今次居然無。
可能因為我而家無心情掛…
大家姐：「你真係好生性呀阿明，阿May佢真係怪錯左你，你根本唔係為左自己，而係為屋企，仲犧牲左自己。」
「不過你真係傻豬黎，話左錢我地會搞得掂，做乜自己去搵李Uncle傾啫。
」 我：「無…我只係覺得自己好似無為呢個屋企做過d咩啫…
」 大家姐：「傻豬！有呢份心意就已經夠喇，記住下次做D大決定之前同大家姐商量一下先！知唔知！
」 大家姐輕輕咁推開左我，捉實我膊頭，用一個好堅定既眼神望住我，搞到我有少少怕羞。
我：「知..知道啦大家姐。」
大家姐：「咁就乖喇。
」 我：「咁大家姐..二家姐點解會有咁大反應既…」
大家姐：「哦…佢以為你知道左屋企有事之後就想自己一個獨善其身，唔一齊諗辦法。」
「你之前仲要同佢講過唔會再玩呢d權力遊戲，但而家又..所以佢先咁嬲..」
「不過我諗最主要既原因係佢特別討厭七星掛。」
我：「討厭七星？點解既？」
大家姐：「因為佢認為七星個個都唔係好人，全部都只係識玩弄權勢，無人性，當然晨仔係例外喇。
」 咁講又好似岩…已知既七星入面三個有兩個都無品，只係當其他人係物品咁。
「我估就係因為咁，佢先對你決定做七星有咁大反應，佢擔心你會變到果班人咁。」
「所以呢，你無錯，但阿May都無錯，只係大家有誤會啫，我一陣會去同佢好好講下架啦！唔洗咁擔心！」
老實講，我對自己都無乜信心，我都怕自己會變到果班人咁。
不過大家姐話二家姐擔心我…