「續寫」無啦啦多左幾個家姐同阿妺: 很滿足
我：「啊~真係開心~估唔到開放日係咁得意架，居然仲有五月天睇，真係開心！
」May：「係咩…我覺得麻麻咋喎。
」我：「唔知道邊個好似著左魔咁，死都要幫羽晨贏隻啤啤熊返黎呢？
」哈哈，俾我講中左就成塊臉紅哂，呢個細妹真係可愛。
May：「咁…羽晨話好想要隻熊仔嘛。而且我唔憤氣我會贏唔到區區一個射靶game嘛。
」我：「係係~點呀羽晨你又玩得開唔開心呀？」
羽晨：「開心吖~二家姐送左啤啤熊比我，明哥哥又請我食棉花糖，仲有好多得意野睇！」
我：「嗯~~咁就好喇！Yui呢？」
Yui：「開心…
」哎…開心都講到咁樣既。
我係梳化一躍而起，走埋去大大力咁搓Yui塊臉，搞到佢連野都唔可以正正常常咁講。
Yui：「大家…姐…」
我：「係開心的話個表情就同我開心D，笑都唔笑同我講話開心？」
原本係想話下Yui既，但搓下搓下見到佢而家個樣反而係我自己笑左出黎先添。
羽晨：「哈哈Yui姐姐個樣好好笑吖，好得意吖！」
Yui：「痛…」
唉呀，一時無為意力度，整痛左Yui添。
一聽到Yui話痛，我嚇到即刻停手，改為輕輕咁摸佢塊臉。
估唔到咁樣一摸，Yui就即刻笑左出黎，仲要係會心微笑果種。
阿明佢肯定成日咁樣對你你先會咁開心喇傻妹。
我既細妹全部都咁可愛都有既，我呢個大家姐真係幸福~~
我：「聽日去唔去多次好呢~聽Sarah講好似話會有CNBLUE表演。」
May：「唔好去喇，去到你又會阻住佢做野架啦。」
我：「佢？邊個佢啊。我去開放日啫，又點會阻住人做野呢。」
May：「唉你又唔知自己特別麻煩…你會搞到阿明…Sarah佢地唔可以專心做野，要分神去照顧你。」
我：「哦~~原來你係擔心阿明。」
May：「夠啦家姐，開夠玩笑喇。」
嬲喇佢，我要停喇，唔係的話佢一定會發脾氣的。
不過講起佢地，應該都係時候返到黎先係架…
「呀~~~返黎喇~~~攰死我喇~~~
」一講曹操，曹操就到。
羽晨：「明哥哥！」
羽晨一見到阿明返黎就衝左上去，但係行到埋去又縮退左兩步，唔知咩事。
羽晨：「明哥哥個身好臭！
」明：「啊，哈哈，唔好意思呀羽晨，頭先打左陣波。
」Sarah：「都叫你沖個涼先返黎架啦，明明學生會室有浴室都唔肯用。
」明：「呃…咁我無帶替換既衫嘛，都無諗過會有人無啦啦叫我打波。
」我：「唔好講咁多啦，阿明你快d去沖個涼先啦，可以食飯架啦。
」明：「哦知道大家姐，唔洗等我喇你地食先啦。」
阿明講完就一支箭咁跑左上房。
心情睇落好似好好咁bor…滿臉笑容咁。
May：「好喇咁食飯啦，羽晨頭先都話肚餓。」
羽晨：「好吖好吖，我好肚餓啦。」
我：「好啦既然阿明頭先都話左唔洗等佢，我地就食飯啦，邊食邊等。」
就係咁，我地就無等阿明，五個人開始食飯。
「係呢Sarah，我地走左之後有無咩特別野或者好笑野吖？」
我一邊夾舊魚比Sarah一邊問佢，佢一聽到我咁問表情就非常雀躍，好似好想即刻講咁，可惜口入面有啖飯。
等佢一吞下啖飯，佢就開始講了。
Sarah：「有啊有啊，好多添呀，你地咁早走真係哂左。」
「五月天表演完之後我同阿明仲有Ellie Ellen就返去學校果邊啦，點知一返去就有好多人圍住我地喎。」
「開頭我地諗咩事啦，原來係大家想多謝阿明，話頭先場show好正。」
「大家送左好多野比我地，好似毛公仔啊，免費撈金魚，一d小食之類咁。」
「之後仲有籃球隊搵我地去打波，臨時搞左場學生會對籃球隊既比賽，好好睇又好好笑。」
「大家睇落都好鐘意阿明，好支持佢咁。」
我：「哇，咁我地真係走寶啦，睇唔到明仔打籃球添。」
「不過咁樣Sarah你驚唔驚會多左好多情敵吖？」
Sarah：「唔怕啦，佢已經走唔出我地既手心架啦~~」
阿明：「咦傾乜傾得咁開心呀？大家笑成咁既？」
我：「哦！講緊你吖！估唔到…」
May：「夠喇家姐，有乜食完飯再講啦，再講D餸就會凍哂架啦。」
我：「咩喎，大家一齊食飯傾計咁開心，你係都要掃人興既。」
May：「咁Daddy都有講過食不言寂不語嘛。」
阿明：「呃…唔好嘈啦，我都肚餓啦，學二家姐講既咁有乜食完飯再講啦。」
既然阿明講到咁，我都唯有乖乖咁收聲食飯啦。
食完飯，我就行左出泳池打算吹下風，點知見到阿明都係度。
我：「咦阿明你係度既？」
阿明：「係啊，突然想出黎吹下風嘛。」
「因為我個心到而家都靜唔到落黎。」
我：「靜唔到落黎？點解咁激動啊你？」
阿明：「我都唔知，但今日我真係好開心，到而家我都不斷諗起今日發生既各種事。」
「每個人係開放日都玩得好開心，仲有人特登走埋黎同我講多謝，話個開放日好正。」
「一諗到咁，我個心就好滿足，開心既感覺不斷咁湧上黎。」
「我好似終於都做到D野令人認同同埋令人會感激，同以前既自己好唔同。」
「以前我係學校係俾人恥笑，今日既我雖然都係令人笑，但兩種笑已經係好唔同。」
「啊，唔識講，總知就係唔同啦！」
佢好似諗唔通d野，突然好用力咁摷自己個頭。
我：「大家姐明你想講乜~唔洗咁煩惱！」
我一下就捉住佢，攬到佢實一實。
我：「總知你就係對今日既事好滿足啦係咪？」
阿明：「嗯，我希望以後都可以好似今日咁，大家都咁開心，咁先似一間學校架嘛。」
咁講又係喎…聖所羅王書院好似改變左好多，似返一間正常學校。
我：「你一定可以既~你係我細佬黎架嘛！」
我又摸下佢個頭，搞到佢成個頭亂哂，成個人郁黎郁去，個feel好可愛。
無諗過阿明會咁樣諗，居然想大家都開心。
加油啊，我既好細佬，我信你可以架。