「續寫」無啦啦多左幾個家姐同阿妺: 交給我

點查，的確係一個問題。

阿威：「我有一個諗法。」

我：「咩諗法？快D講啦阿威。」

阿威：「之前Ellen咪有份form list哂所有邀請卡既，由果度查起可能會查到D線索。」

阿惠：「我唔明喎，有果份野又可以點查？解釋下好唔好。」

阿威：「一時三刻又好難解釋比你知，尤其係你呢種資質…」

「我地咪有放比各個學會既邀請qutoa既，用果份野就可以知道邊個學會無用盡所有quota，咁咪或者查到果四個七星既邀請卡係邊度出黎囉。」

聽落好複雜，唔係好明，但好似會work，阿威呢D聰明人講既野特別有說服力。

我：「喂阿威，咁不如你做指揮，帶我地查，因為我始終都仲係唔係好明應該點做。」

阿惠：「贊成~~威哥咁聰明肯定好快查到。」

Alex：「我都係咁話，最重要係查到，阿威個方法好似可以查到D野，咁不如就由阿威你做指示，我地跟你。」

阿威：「唉太聰明都係一種麻煩，好啦一於交俾我，為兄弟辛苦少少無所謂啦。」

我：「麻煩你啦兄弟，不過今次唔只為我架，仲係為左聖所羅王。」

「一日唔了結呢件事，聖所羅王都仲有可能發生更多事，影響到大家。」

阿威：「知道啦，我地偉大既學生會主席。」

之後我地四個就返返去上堂，呢件事我亦叫做暫時放埋一邊，等阿威吩咐。

啊~~好似好耐無好好咁上堂喇，之前都掛住忙呢樣忙果樣，無時間乖乖咁坐定定上堂。

數學好深，英文好難，通識好眼訓，死啦我咁樣成績一定會好差，點算好。

我好認真咁樣上堂，但係好多野都聽唔明，話咁快就已經過左一個上午，又有得食lunch。

Anna：「點呀傻仔明，想去邊度食呀？」

我：「唉…是但啦…食乜都無所謂啦…」

Anna：「做乜呀你？突然間成個人謝哂既？」

我：「無呀…只係突然覺得D野好難，好多我都唔識啫…」

Anna：「吓，呢d都唔係第一日既事架啦，做乜突然間咁著緊自己成績？」

我：「吓eh…唔知喎，都係突然醒覺啫，我以前好hea咩？」

Anna：「哈，自己以前係點都唔記得，正傻仔，阿威阿惠你地一唔一齊食呀？」

阿惠：「唔啦，我佳人有約，況且我唔會咁唔識做阻住你地拍拖既。」

阿威：「我都唔啦，我想快d去查下份list，等我可以快d同Alex傾下分工。」

我：「辛苦哂你啦，不過唔好阻住Alex同Ash拍拖呀，同埋你自己都要食飯呀知唔知？」

阿威：「Anna姐，學生會主席幾時管埋學生既飲食架？」

Anna：「我都唔知佢，仲煩過我阿爸，行喇傻仔明，Sarah佢地等緊架。」

就係咁，我就被Anna拉左去新校舍果邊會合Sarah佢地，Anna佢仲衰到一黎就同Sarah講我擔心自己成績既事，引黎佢地幾個既大笑。

我：「喂呀我而家想讀好書都係好笑野咩。」

Sarah：「哈哈哈，我地唔係咁既意思，只係呢段日子你咩都有緊張過咁濟，係無緊張過讀書，而家居然先黎緊張讀書，係呢樣野好好笑啫。」

「如果你真係有野唔識的話可以去問下二家姐吖，佢呢排都得閒。」

一諗起二家姐平時咁鬼惡，我就真係唔係咁想去搵佢求教。

我：「唔係呢，你地教我咪得囉，麻煩到二家姐唔係咁好既…」

Ellen：「你估我地真係咁得閒呀？我地唔係一定要隨時隨地陪你架先生~」

哇講野咁有骨既，係咪仲嬲緊今朝Anna攬住我件事呢。

我：「咁你地今日有咩做咁唔得閒呀小姐？」

Ellie：「我地今日約左Ash去行街啊。」

我：「點解既？去邊度行呀？」

Ellen：「有乜點解啫，你又唔帶我地去行街囉，我地咪自己去行囉。」

係喎，之前好似應承左佢地話會同佢地行街，無左回事添。

咁既然係我唔岩在先，我都無資格說三道四啦。

我：「好啦好啦係我唔岩，你地去啦，萬事小心呀，唔好買咁多野吖，有乜就打比我啦。」

Anna：「你今日做乜鬼野咁多口水啫，我地自有分數唔洗你理！」

關心你地都要比你地鬧，唉好男友真難做。

於是我放學就孤孤獨獨一支公咁返屋企，自己做功課自己溫書。

無左佢地嘈黎嘈去，真係好唔慣。

屌，D數一題都唔識做添，點算好。

一題都唔識，Sarah返到黎肯定笑我，一定好無臉。

哎，去唔去問二家姐好呢，去就被人鬧，唔去就等比人笑，揀邊樣好呢？

算啦，我揀被人鬧，起碼可以學下野。

我拎住本數學作業，戰戰競競咁行去二家姐間房，嘩真係一歩一驚心。

不過我敲左好耐門都無人應門，唔通二家姐今日咁岩出左去？唉我真係唔好彩，等俾Sarah笑啦唯有。

再唔係去搵大家姐囉，我居然唔記得左仲有大家姐，哈哈。

二家姐：「你搵我？

」

嘩屌！！！嚇死人咩！！！

二家姐突然出現我背後，嚇到我成本野跌左落地下，仲俾二家姐見到本野。

二家姐：「哦？呀係喎Sarah頭先Whatsapp左我，得喇有咩唔明快D問啦，我好忙。」

我：「eh…若然你好忙的話咁就算啦，我自己再諗下得架啦，唔阻你。

」

二家姐：「唉唔好咁婆媽，交俾我！有咩唔明即管問我！我最鐘意教人！

」

咦，二家姐做乜突然咁興奮，好似轉換左人格咁。

當我仲思考緊性格呢個問題既時候我已經比二家姐拖左去坐係佢張書檯度。

嘩，坐係二家姐張書檯既感覺好正，嗱唔好會錯意呀，我係想話二家姐張書檯既設備好正咋。

一張書檯有三個mon，打機肯定一流。

咦二家姐今日無上高登喎，佢睇緊咩呢？

二家姐：「專心D！唔好咁八卦！」

二家姐一手就熄哂三個mon，令我連𥄫野既機會都無。

二家姐：「邊度唔識呀！」

我：「eh…呢度呢度仲有呢度…」

二家姐：「屌！呢D你都唔識？你點升Form 4架？」

「屌唔係咁計呀，個x係呢個時候要掉去另一邊，咁先可以…」

就係咁我上左一堂不斷被人屌既補習班，百屌終於成材，我終於做哂份功課。

我：「終於搞掂啦…」

二家姐：「係？俾我睇下…」

！！！！