過左一段時間都係仲係未有咩突破性既消息,我地亦未搵到果幾張邀請咭係係邊度寄出。

所有學會都查過一次,每個學會的確如實上報邀請名單,無漏報到。

去到呢度大家都唔知道再可以係邊度入手調查,所有野都斷哂,無辦法再查落去。

因為係學生呢方面無任何消息,所以我地幾個認為果幾張邀請咭可能係由學校果邊寄出。

但係學校果邊既邀請名單我地係無權查䦧,結果我地都係查唔到落去。



所以呢,我而家都無左理呢件事喇,每日都係專心上堂,之後陪佢地幾個。

嘩佢地幾個之從同完Ash去街之後就好似愛上「出旺角」呢個活動,呢一兩個星期我已經陪左佢地去兩次,每次佢地都可以買一堆野,今日又有一大袋戰利品。

佢地有錢買唔係問題,問題係買完要我拎啊大佬,我拎到就黎可以去奧運舉重啦屌。

Sarah:「咁樣你地之後諗住點做啊?」

我:「仲可以點做啫,咪唔查囉,可能真係只係學校果邊請佢地黎,而唔係有人想害我呢。」



「阿威佢話佢會再幫我查下,不過我諗應該都係一樣結果架啦。」

「可能真係咁岩呢你地話係咪先?」

Ellie:「阿明。」

我:「嗯?做乜呀Ellie?」

Ellie:「點解你係度不斷咁說服自己,令自己覺得無人想搞你?」



Ellie講完之後大家都靜左落黎望左佢。

Ellen:「Ellie點解你會咁講既?你覺得阿明佢有古怪咩?」

Ellie:「係啊,頭先阿明講到呢件事無辦法查落去,正常黎講應該會苦惱先係,但係我唔覺得阿明有咁。」

「相反,阿明仲係度講其他可能性出黎,試圖去否定有人要害自己呢個假設。」

「阿明你其實係咪留意到D乜野?」

我一時之間答唔到呢個問題,我只可以話真不愧係Ellie,睇野真係睇得好通透。

我望住自己杯野飲,沉思左一陣之後先開口,最後決定將自己心入面諗既野講出黎。

我:「我早兩日收到一個Whatsapp,係一個唔識既號碼send過黎,令我諗左好耐。」



「個Whatsapp只係一句好短既說話,就係「藍洛晨無收到邀請咭」。」

「你地點睇呢句野?」

Anna:「咁即係話唔係咁岩請七星黎,而係專登請其中幾個會有機會同阿明你衝突既人啦。」

Ellie:「而且對方好故意避開唔請藍洛晨,應該係有好好調查過。」

Ellen:「咁即係對方特登堵塞左阿明最大既幫手,係想焗阿明你自己去對班七星。」

Sarah:「你地咁講到對方好似一早plan好哂,想一次就整到阿明無得翻身咁…」

Anna:「咁若然對方係存心想害阿明的話當然會想一take過架啦,免得夜長夢多嘛。」



我:「喂你地等陣先…一個不明來歷既Whatsapp你地就信到十足?」

Ellen:「咁好簡單啫,你打過去比藍洛晨問下佢本人咪知真定假囉。」

又被秒殺了。

其實我開始怕,怕到唔敢再去諗呢件事。

若然我打左去問,發現的確有咁既事的話,咁就可以好確定的確有人針對我,想挑起我同七星間既矛盾。

呢樣我都唔怕,我之前都叫面對過呢d人,問題係之前既阿偉阿傑都係擺明車馬同我對著幹。

但今次好奇怪,我唔知對方係咩人,甚至連絲毫線索我地都搵唔到。

各方面既資料都好似俾人完全抹去左咁,直情好似係憑空變出四張邀請咭咁。



收到呢個Whatsapp之後我心入面知道一定唔會係學校方面邀請,但我仍然想說服自己佢地係學校方面邀請。

因為對方在暗,我在明,呢種感覺真係好可怕,我甚至想徹底忘記左呢件事,當無發生過。

Ellie:「我明白喇,咁我想再問多一件事,愛麗絲之後有無再搵過你?」

我:「愛麗絲?無呀,我估佢唔方便同我聯絡掛,佢地講到咁嚴重,又咩有臥底係身邊。」

Ellie:「咁啊…仲打算可以係佢個邊拎到D有用既資訊添。」

我:「係囉,唔知會唔會真係有人去搵佢呢哈哈。」

Sarah:「吓阿明你唔知架咩?愛麗絲早兩日有黎過我地屋企啊。」



WHAT???我完全唔知道呢件事既!

我:「幾時既事呀!我完全唔知道既!」

聽到我咁講,Sarah即刻掩住自己個口,應該係意識到自己講左D唔應該講既野。

Anna:「Sarah,你係咪知道D乜?」

Sarah並無即刻答,而係左望望右望望一陣先,最後先開口。

Sarah:「我都唔係好清楚啊,都係Yui都同我講架咋,佢話早兩日愛麗絲有黎過我地屋企,當時我地都未放學。」

我:「咁愛麗絲有無講D乜?」

Sarah:「我都有咁問Yui啊,不過Yui都唔知,因為二家姐好快就出左黎,帶左愛麗絲去書房傾。」

「我地仲以為二家姐有同你講添。」

我呆左兩秒,諗下到底發生咩事。

即係而家二家姐見過愛麗絲,仲同佢傾過計,但係無話我知。

照道理呢個時勢愛麗絲黎我地屋企都係為左…屌,為左個件事架啦,我已經唔想係咁講有人害我呢四個字。

咁即係話二家姐應該拎到D有關呢件事既料啦,點解佢呢幾日都唔話我知?佢自己收埋D料有咩用?

唔通…

正當我仲諗緊野既時候,Ellen Ellie仲有Anna都拎起左自己袋野。

我:「做咩呀你地?」

Anna:「我地估你而家應該要返屋企,好好搞清楚成件事,我地自己返去得架啦。」

Ellen:「聽日見喇我地。」

Ellie:「有咩諗唔通可以打電話比我架,唔好咩都自己黎。」

Ellen:「都可以打比我架!我會好好咁聽你講架~」

Anna:「喂當我死架?傻仔明!有咩記得打比我!知唔知!」

我:「得啦得啦,我會架啦,返去啦你地。」

Anna:「記住呀!走喇我地。」

Anna講完就同Ellen Ellie一齊走左,剩低我同Sarah兩個仲係café。

Sarah:「阿明…」

我:「返去啦,返去搵二家姐問清楚。」

居然係而家先再走一個問題出黎,真係黎得係時候。

之後我就同Sarah飛的返屋企,途中我諗左好多野,全部都係有關二家姐。

諗極都唔明,點解二家姐要唔話比我知?真係好奇怪,諗極都諗唔通。

不過唔緊要,反正都返到屋企咯,有咩唔明而家就可以問清楚二家姐啦。

Yui:「你地返黎啦?我黎幫你拎野啦。」

Sarah:「唔洗啦我自己拎到~係呢,我買左幾件衫俾你啊Yui~我地快D上去試下啦!」

Yui:「好..不過..阿明…」

我:「哦,唔洗理我架,你地去做自己野啦,我咁岩發緊呆啫,係呢Yui,二家姐呢?」

Yui:「呃…二家姐的話應該係房…我無見過佢出黎。」

我:「好,唔該你,你地去做自己野啦~」

係房啊…

我無一刻既猶豫就行左去二家姐房,我甚至連門都無敲就入左去。

諗返都覺得自己無禮貌,點解我會咁樣做呢。

講返正題先,入到去二家姐房見唔到佢個人,唯一吸引我注意既就只係個三個screen。

Screen上面好似寫左D野,應該係一個關係圖之類既野。

當我想行前去睇清楚呢個到底係咩野個陣,我比一把聲喝止左。

二家姐:「你係我房做乜野?」

把聲係我背後傳黎,所以我立刻擰轉臉,果然見到二家姐。

佢包住條毛巾,不過係包住個頭,大家唔好諗太多,應該係岩岩沖完涼黎。

我頭先有好多好多野想問佢,但呢一刻我居然咩都講唔到,就只係成個人傻左咁企係度。

而家搞到自己係一個賊咁添,真係尷尬。

二家姐並未等我開口就行過左我,一下就熄左個mon。

好明顯,個mon上面既野佢唔想比我見到。

我:「二家姐,你係咪見過愛麗絲?」

自己都已經知道答案既問題,都唔知自己點解會問得出口。

不過咁樣都叫做係一個好既開場白既,唔通一黎就問「你到底知道D乜」咁串咩。

二家姐:「嗯,早兩日佢黎過,同佢傾左一陣。」

我:「佢黎我地屋企..?你地傾左D乜?係咪有關…」

二家姐:「喂,你做乜好似審犯咁審我?而家我做錯野咩?」

我:「Sorry..不過點解你見過愛麗絲又傾過野而唔同我講我會懷疑…」

二家姐:「你懷疑所有野其實都係我做?」

我:「唔係!!只係我會覺得你有野故意瞞住我地啫。」

一聽到二家姐話我懷疑所有野其實都係佢做我成個人都慌左,急急腳否認,仲唔覺意大聲左。

二家姐:「哈哈,我講下笑啫,你睇下你慌張到呢。」

我;「唔好咁玩我啦二家姐,我心血少唔係咁襟嚇。」

二家姐會講笑,真係難得,但係俾人感覺真係唔似講笑,所以我先咁慌。

二家姐:「無錯,我係專登唔同你地講,因為仲有好多事未搞清楚。」

「不過既然你而家都知道左,咁就無辦法啦,我話比你知個日愛麗絲同我講左d乜啦。」

「但係我要你應承我,除左Sarah佢地五個之外,唔好再話俾其他人知愛麗絲黎過我地呢度既事。」

我:「當然無問題啦,愛麗絲其實係幫緊我地既事我連阿惠佢地都無講過架。」

二家姐:「咁就好,雖然要你瞞住你班朋友係唔係幾好,但畢竟人多的話容易走漏風聲。」

「呼~」

二家姐深呼吸左一下,好似準備講D好爆既野。

二家姐:「係第一次愛麗絲黎我地呢度之後大約兩三日,就有人去左搵佢。」

「為既當然係邀請愛麗絲,請佢一齊聯手對付你,等你永不翻身。」

「而搵愛麗絲既呢個人,你都識。」

「係阿傑。」