「藍洛晨…」 

仆街偉望一望巷口之後up左三個字出黎,應該係果五個人其中一個人既名。 

「估唔到你仲記得我喎哈哈。 」 

果然係咁,其中一個人行左入黎,條友又高又靚仔,男神級。 

偉:「走,唔關你事。」 



男:「咁又未必喎,我係良好市民,有人被人打我點可以唔理?」 

「除非比人打個個係你啦呀李二公子。 」 

嘩,句野好有骨。 

偉:「個女仔係我未婚妻,個仆街搞佢,我咪打佢,我有乜錯?」 

男:「未婚妻咋?一日未結婚人地都仲可以揀,放開佢地先喇。 」 



偉:「你係都要阻住我?以前又係咁,而家都係咁。」 

男:「嘛,我覺得以前阻住你既人應該係你阿哥… 」 

人地句野都未講完,仆街偉就已經一拳西埋去。 

但係,個男仔接住左個一拳,反應快得可怕。 

男:「就係因為你只係識咁,所以你先永遠比唔上你阿哥。 」 



「唔好再拎我同佢比! 」 

仆街偉又突然變得好激動,同果個一直冷靜得嚇人既男仔形成強烈既對比。 

每次提起佢阿哥佢都好似會好激動,到底咩事?
「成功既人係唔會怕同人比既,你咁唔鐘意同佢比係因為你知道自己比唔上佢。 」 

偉:「放開我! 」 

仆街偉不停係度嘗試掙脫,但都fing唔甩,仍然被個男仔捉住。 

男:「你叫你D跟班放開果兩位我咪放開你囉,再唔係咪自己再試下囉。 」 

班保鏣聽到咁之後就開始咬耳仔,應該係討論緊應唔應該去救仆街偉好。 

其中一個負責捉住Sarah既保鏣係傾左一陣之後就即刻撲上去,試下去救仆街偉。 



「十四!」 

個男仔無啦啦大叫,另一個男仔聽到即刻跑過黎禁住左個保鏣,我都嘩左一聲。 

呢班友咁好打既..連保鏣都揪得贏? 

男:「放開果對男女,我就俾番你地位少爺仔同你地個同事你。 」 

唔知係咪因為見識過呢班中學生係幾咁好打,今次班保鏣聽到就即刻放開我同Sarah。 

男:「行出黎啦哥仔,帶埋你身邊位女仔出黎。 」 

捉住仆街偉果位男仔好氣定神閒咁講。 



我見機不可失,就忍住痛咁急急腳帶Sarah出去,去到巷口仲有一對男女扶我地。 

仆街偉:「陳煒明!! 我唔會..」 

男:「靜D。 」 

個男仔唔俾仆街偉講完,用手指一下彈落仆街偉個額頭,之後掟佢返佢堆保鏣度。 
堆保鏣接返仆街偉同另一個保鏣之後就留低我地七個係條巷度,頭也不回咁走左去。
頭先捉住仆街偉果位男仔好淡定咁走埋黎我地度,仲面帶笑容。 

「Hi,我叫藍洛晨,傷得唔重嘛?去唔去醫院? 」
我:「我無事,晤洗去醫院啦。」 

雖然我係咁講但我已經企都企唔穩,要Sarah扶住我先得。 

「呢條MK仔都幾有女人緣,上次一個今次又另一個。 」 



一個企係藍洛晨後面既男仔突然開聲,頭先就係佢同一個女仔接住我地。 

晨:「真係架魯路修?哇咁哥仔你都幾勁喎。 」 

魯路修?咩名黎架, 

我:「都唔知你講乜..」 

魯路修:「嘛,睇你個樣果晚都係斷左片架啦,果晚..」 

「唔好再講啦,離開呢度先啦。 」 

企係魯路修旁邊個女仔開聲,把聲好甜仲好熟,好以係邊度聽過。 

晨:「嗯,講得岩,帶佢兩個上cafe得唔得吖魯路修?」 



魯路修:「無乜問題既,呢個時候鋪頭應該無乜人。 」 

晨:「咁就行啦,十四你扶呢位哥仔啦。」 

「知道。」 

頭先禁住保鏣果個男仔一下就扶起左我,開始去唔知邊度。 

我:「喂你想帶我地去邊..」 

晨:「去搵個可以坐底慢慢傾偈既地方囉,你應該有好多野想問我架。 」 

點解佢會知我諗乜? 

無錯,我有好多野想問佢,因為佢好似知道好多有關仆街偉既事。 

或者我可以靠佢救返Sarah。